Pe a Poloai mai le Alii
O le usitai ma le faamaoni, tusa lava po o le a le tele o le galuega, o le a aumaia ai le taitaiga a le Alii, fesoasoani ma le filemu.
E i ai se tala i ni tamaloloa se toalua e fiafia i gaoioiga i fafo, ma sa la togipauina se tamai vaalele e momoliina i la’ua i se vaituloto tuufua mo sa la’ua fagotaga faaletausaga. Ina ua maea le gaoioiga faamanuiaina, sa toe foi atu le pailate e aami i la’ua. Peitai, sa vave ona ta’u atu e le pailate i le au faifaiva, e le gafatia e lona tamai vaalele i la’ua, o a la meafagota ma mamafa faaopoopo o i’a o le la faiva. E manaomia se malaga lona lua.
Ia, sa le fia totogiina e le au faifaiva se isi malaga. O lea, ina ua uma ona folafola atu o le a teu faamaopo lelei ma totogi se tupe faaopoopo, o lea na ioe ai ma le musuā le pailate e fai le malaga.
Sa soisoi alii faifaiva ma le iloa lelei a o faalele faamalosi atu e le pailate le vaalele i le ea. Peitai, i ni nai sekone mulimuli ane, sa faifai malie le vaa ma pa’ū atu ai i se vaega faataufusi tele i le pito o le vaituloto.
Sa faifai malie le vaalele a o lele atu ona o se tulaga ua lauiloa e ta’ua o le ‘aafiaga o le latalata tele i le eleele.’ ‘O le aafiaga i le latalata tele i le eleele e afua pe a omia le ea i le va o apaapa o le vaalele ma le fogatia—pe a felata’i. O le tulaga lea, a o masii ae le vaalele mai le ‘aafiaga o le eleele’, sa manaomia ona lele atu le vaalele i lona lava paoa, ae sa le mafai ona faia.
O le mea e laki ai sa leai ni manu’a matuia, ma ina ua toe maua le malamalama, sa fesili atu le tasi o faifaiva i le isi, “o le a le mea na tupu?” Sa tali atu le lona lua, “Sa pa’u le vaa ina ua masii ae i luga—pe tusa ma le selau iata (91 m) mai le mea sa tatou taunuu i ai i le tausaga lea!”
E faapei o faifaiva e toalua, o nisi taimi tatou te talitonu ai faapea e tatau lava ona i ai se auala e faigofie atu, se auala ‘alo po o se fetuunaiga o tulafono a le Alii o le a taulimaina ai o tatou tulaga taitasi. O mafaufauga faapea, e le iloa ai lena usitai maua’i i tulafono a le Atua e aumaia ai Ana faamanuiaga, a o le le ola ai i Ana tulafono e oo atu ai i taunuuga fuafuaina.
I le taimi o lona valaauga o se Peresitene o le Ekalesia, sa saunoa ai Peresitene Harold B. Lee, “O le saogalemu o le Ekalesia o loo taoto i le tausiga o poloaiga e tagata o le au paia… . A latou tausia poloaiga, o le a oo mai faamanuiaga.”1
A tatou filifili e le usitaia se poloaiga e masani lava ona: (1) Ua tatou faatalitonuina i tatou lava o poloaiga e le faatatauina ia i tatou; (2) tatou te le talitonu e taua; po o le (3) ua tatou mautinoa ua faigata tele ona usitai.
1.O lenei poloaiga e le faatatauina ia te au.
I toe tausaga o le nofoaiga a le Tupu o Solomona sa ta’u atu ai ia te ia e le Alii e ala atu i Lana perofeta, “Ou te … saeeseina le malo ia te oe, ma ou foaiina atu i lau auauna.”2
E lei leva ae iloa e le perofeta o Akia le auauna o Ierepoamo o se alii “toaga” o ia lea na faia e Solomona ma “pule i galuega uma e faia e le aiga o Iosefa.”3 O tiute o Ierepoamo sa manaomia ai lona malaga mai atumauga o Efaraima, i le mea sa nofo ai o ia, i le aai o Ierusalema. I se tasi o na malaga, sa faafeiloa’ia ai o ia e Akia i le ala. Na fetalai mai le Alii e ala mai ia Akia “Ou te … tuuina atu ia te oe ituaiga e sefulu… .”4 Sa ia faatonuina foi Ierepoamo, “… afai e te … savali i o’u ala, … ma e tausi i a’u tulafono ma a’u poloaiga, … ona ou i ai lea ia te oe, … ma ou foaiina atu Isaraelu ia te oe.”5
Ina ua uma ona faalogo atu i le valoaga a Akia, sa saili loa Solomona e fasioti ia Ierepoamo, ona sola ese ai lea o Ierepoamo i Aikupito. 6 Ina ua maliu Solomona, sa toe foi mai Ierepoamo mai lona faaaunuua ai i le vaega i matu o Isaraelu ma amata ona taitai ituaiga e sefulu i matu.7
Peitai, o le fuafuaga a Ierepoamo e pulea le malo, sa aofia ai ma se suifeifiloi o le lelei ma le leaga. Sa ia faatuina Sekema e fai ma laumua o le atunuu, o se aai e maoae le tulaga faalelotu o ona tagata. Ae peitai, e faanoanoa aua sa ia amatalia ai faiga faasatani ia latou tapuaiga.8
Sa faatalitonuina e Ierepoamo ia lava, o nisi o poloaiga a le Atua e le faatatauina mo ia. O le taunuuga o ana faatinoga, sa fasiotia ana fanau uma ma ona o faiga leaga sa ia faia ia latou sauniga paia, na iu ai ina tutuliesea ai ituaiga e sefulu o Isaraelu mai lo latou tofi.9
E pei lava o le lele ese mai i ‘aafiaga o le eleele’ faatasi ai ma se faaopoopoga o le mamafa e sili atu nai lo le mea e gafatia e apaapa o se vaalele, o le a tau atu ai i ni taunuuga pagatia, o lo tatou faaituau po o le filifili o tulafono a le Atua e ola ai, o le a tatou le maua ai faamanuiaga atoatoa o le usiusitai.
O lenei poloaiga e le taua.
I le tele o tausaga mulimuli ane, ona malaga atu lea o Naamanu, o se alii e pule i ‘au Suria, o se “toa malosi”10 mai lona atunuu moni i Isaraelu ma talosagaina le tupu, o Ioramo, e faamalolo lona lepela.11
Na faasino atu Naamanu i le perofeta o Elisaia. “… Ona auina atu lea e Elisaia o le auauna ia te ia, ua faapea atu, Ina alu ia, ina taele faafitu i Ioritana, … ona e mama ai lea.”12
E ui lava i lenei folafolaga faaperofeta e faamalolo ai, ae sa tiga Naamanu ona e lei faafeiloaia aloaia o ia e Elisaia, ae na atili ona tiga ona o le faatonuga a le perofeta e taele faafitu i le Vaitafe laitiiti ma le palapala o Ioritana. O lona faamaualuga na ia manaomia ai se mea e sili atu ona aloaia ma mamalu, se mea e fetaui ma lona tulaga ma lona tofi i le nuu ma le malo.
O le mea e lelei ai ona sa faatalitonuina Naamanu e ana auauna e tusa lava po o le a le mea e faatonuina o ia e le perofeta e fai, afai e usitai i ai, o le a aumaia faamanuiaga a le Alii. Na fufui e Naamanu o ia lava i le Vaitafe o Ioritana e pei ona faatonuina ai ma o le taunuuga o lona usitai, sa faamaloloina ai lona lepela.13
O le usitai i poloaiga a le alii, tusa lava po o le a le laititi po o le le taua o lo tatou talitonu i ai, ae o le a mautinoa lava le aumaia ai o Ana faamanuiaga folafolaina.
3. O lenei poloaiga ua faigata tele.
Ina ua mavae le poloaiga a le Alii, sa ave e le perofeta o Liae lona aiga i le vao. I nai aso muamua o le malaga, sa faatonuina ai e Liae lona atalii o Lemuelu ia “mau ma mausali, ma le le faagaeetia i le tausiga o poloaiga a le Atua!”14
Peitai, ina ua oo mai le faatonuga faaperofeta e toe foi i Ierusalema e aumai papatusi apamemea o loo i ai se “tusi o tagata Iutaia,”15 sa fouvale tama matutua e toalua, ma faapea atu, “Ua faigata lenei mea.”16
E ui i le muimui o ona uso matutua, ae o le faatuatua ma le usitai o Nifae i poloaiga a le Alii na iu ai ina maua mai papatusi apamemea. Sa fausia se malo, sa faasaoina se gagana ma sa aoaoina le talalelei a Iesu Keriso mo augatupulaga i le lumanai.
E i ai taimi atonu tatou te fetuunaia ai faapea o le a malamalama le Alii i lo tatou le usiusitai ona e i ai tulaga faapitoa e faigata ai ona gauai atu i Ana poloaiga, faamaasiasi ai pe tiga foi. Ae peitai, o le usitai ma le faamaoni, tusa lava po o le a le tele o le galuega, o le a aumaia ai le taitaiga a le Alii, fesoasoani ma le filemu.
Na tagi atu le Perofeta o Iosefa Samita i le Alii i ni taimi se lua ma fesili atu pe mafai e se uo lauiloa, o Matini Harisi ona ave, le uluai 116 o itulau ua uma ona faaliliuina mai le “tusi a Liae,” mai Haramoni, i Penisilevania, ma toe foi atu ai i Palamaira. O taimi uma lava na, sa fautuaina ai Iosefa e le Alii, e aua nei tuuina atu le tusi i le alii o Harisi.
Sa saili Matini e faaaoga le tusi ua faaliliuina e taofi ai ana uo mai le faasalalauina o tala e uiga i le la faigauo ma Iosefa Samita. I le talosaga lona tolu na talia ai e le Alii le talosaga a Iosefa.17
Na leiloloa ia Matini le tusi ma o le taunuuga na aveesea mai papatusi mai le Perofeta o Iosefa Samita mo se taimi faaumiumi. O se lesona tiga lenei mo le Perofeta o Iosefa lea na ia saunoa ai: “Ua ou faia la’u tulafono: A poloai mai le Alii, fai loa.”18 E mafai foi ona avea lena ma a tatou tulafono.
E mautinoa lava le tali mai a le Alii pe a tatou usitai i Ana poloaiga. Ua ia folafola mai: “Afai e te tausi i a’u poloaiga ma tumau e oo i le iuga, o le a e maua le olaga faavavau …”19
E le gata i lea, sa Ia fautuaina i tatou: “O a’u le Alii, ou te alofa mutimutivale ma faapalepale i e matata’u ia te au, ma fiafia lava e faamamalu i e auauna mai ia te au i le amiotonu ma le upumoni e oo i le iuga.”20
O le usiusitai i poloaiga a le Alii tatou te maua ai le talitonuga mautu i lo tatou ala filifilia, tatou te agavaa ai mo Lana taitaiga ma faatonuga a o tatou tulimataia a tatou taumafaiga ma maua ai le tulaga gafatia e avea ai faapei o lo tatou Faaola, o Iesu Keriso ma toe foi atu ai i le afioaga o lo tatou Tama.
Ou te tatalo ia maua mai i tatou i aso taitasi o taumafai e usitai atili i tulafono, sauniga, ma poloaiga o le talalelei a Iesu Keriso ina ia mafai ai ona faamanuiaina atili e Ia o tatou olaga.
Ou te molimau atu o le usitai i poloaiga a le Atua e aumaia ai faamanuiaga o le lagi, o loo soifua lo tatou Tama Faalelagi ma Lona Alo, o Iesu Keriso, o le Tusi a Mamona o le afioga ia a le Atua, ma o Peresitene Thomas S. Monson o le perofeta a le Alii i o tatou taimi, i le suafa o Iesu Keriso, amene.