Manatua Pe O Ai Oe!
E leai lava se isi vaaiga e sili atu ona matagofie nai lo se tamaitai talavou e susulu atu i le malamalama o le Agaga, ua mautinoa, ma lototoa aua e amio mama o ia.
O i tatou o ni afafine o lo tatou Tama Faalelagi. E alofa o Ia ia i tatou ma e tatou te alolofa foi ia te Ia.1 Ua ou maua lava le lotomaualalo ma le agaga faafetai ina ua tatou mafuta. Ua faamanuiaina au e le Alii i se malamalama manino i o outou faasinomaga, ma le pogai o lo outou i ai i lenei lalolagi i lenei taimi. E alofa le Alii ia te outou ma ou te iloa tou te alolofa foi ia te Ia. Ua faaalia i o outou foliga, i a outou aga tausaafia, i lo outou naunau e filifili le mea tonu ia outou tautinoga ma tumau ai i le amioatua ma le mama a’ia’i. Sa tatou fefaasoaai faatasi, ni taimi matagofie faaleagaga. Sa tatou tuuina atu ni molimau i tolauapiga a o faataaliolio i se afi tafu, i falelotu, ma faeasaite. Ua faamafanafanaina i tatou e le afi o lo tatou faatuatua.
Sa tatou fe’a’ei i mauga ma a tatou tagavai auro sa faaagiagia—mai Pasila i Bountiful—e faailoa atu ai le tautinoga loloto i totonu o o tatou loto e tumau i le amioatua ma ia agavaa e le aunoa e ulu atu i le malumalu. Sa tatou tatalo, faitau le Tusi a Mamona ma talitaliē i aso uma, ma faatasi ai ma o tatou tina, tinamatutua, ma taitai o loo tatou galulue i lo tatou Alualu i Luma o le Tagata Lava Ia. Ma, o lea faatoa tatou amata!
O se taimi ofoofogia lenei e ola ai i le fogaeleele ma avea o se tamaitai talavou. O loo tumau pea la tatou vaaiga mamao. Ia agavaa lea ma tausia feagaiga paia ma maua sauniga o le malumalu. O la tatou sini aupito maualuga lea! Ma o lea o le a faaauau ai pea ona tatou taulamua e faafoi le lalolagi i le mama—toe foi i le amio mama ma ia mama a’ia’i. O le a faaauau pea ona tatou faia mea uma tatou te mafaia, e fesoasoani ai le tasi i le isi ia “tutu i nofoaga paia”2 ma ia mauaina, iloa, ma faalagolago i le Agaga Paia.
O le a faaauau pea ona tatou tautalatala ia Keriso, olioli ia Keriso, ina ia iloa e i tatou taitoatasi le faapogai tatou te saili i ai mo se faamagaloga o a tatou agasala.3 Ioe, o le a faaauau pea ona tatou tutu mausali tusa lava po o a matagi malolosi e afatia ai i tatou, aua ua tatou iloa ma molimau atu “… o luga o le papa o lo tatou Togiola, o le Keriso lea, o le Alo o le Atua, e tatau ona [tatou] atiina ae ai [lo tatou] faavae … o se faavae afai [tatou te atiae [tatou] te le mafai ona pauu ai.”4
O le apoapoaiga a le Alii ia Iosua o Lana apoapoaiga foi lea ia te outou i le aso, le “autalavou o le tupulaga tautupu.”5 “Ia e faamalosi, ma loto tele; aua e te fefe, aua e te mata’u; aua o Ieova lou Atua o loo ia te oe i mea uma e te alu i ai.”6 E le o tuulafoaiina oe! E ui atonu e na o oe le Au Paia o Aso e Gata Ai i lau aoga po o le potopotoga o au uo, po o lou aiga, e le o tuua lava na o oe. E mafai ona e faalagolago i le malosi o le Alii. E pei ona ta’u atu e Iosua ia Isaraelu, “Ina faapaiaina ia outou e outou; aua o a taeao e faia e Ieova o vavega i o outou luma.”7 O le valaau lea a Iosua ia toe foi mai i le mama ma o le valaau foi lava lea e tasi mo i tatou i le aso. E le mafai ona tatou faia le galuega na faapolopolo i tatou ma saunia e fai, sei vagana ua mafai ona tatou maua le malosi ma le mautinoa e maua mai i le ola ai i se olaga mama.
O outou o tamaitai talavou o le faatuatua maoae. Na outou o mai ma aumai lo outou faatuatua ina ua outou o mai i le lalolagi. Ua aoao mai i tatou e Alema e faapea, i le lalolagi o le muai olaga na outou faaalia ai “le faatuatua tele ma galuega lelei.”8 Sa outou tau ma lo outou faatuatua ma le molimau e puipuia le fuafuaga na tuuina atu e le Atua. Sa outou iloa e lelei le fuafuaga ma sa outou iloa o le a faia ma e mafai e le Faaola ona faia mea sa Ia fetalai mai o le a Ia faia, aua sa outou iloa o Ia! Sa outou tutu faatasi ma Ia ma sa outou naunau mo lo outou avanoa e o mai ai i le lalolagi. Sa outou iloa le mea o le a manaomia mai ia te outou. Sa outou iloa o le a faigata ae sa outou mautinoa o le a le gata ina mafai ona outou faataunuuina la outou misiona paia, ae e mafai ona outou faia se eseesega. O outou o “agaga filifilia o e na tuu e o mai i le atoaga o taimi e galulue i le faataatiaina o faavae o le galuega tele i aso e gata ai, e aofia ai ma le fausia o malumalusa faapea ma le faia o sauniga i totonu o ia fale …”9
A o lea ua outou i ai iinei e faia mea sa faapolopolo outou ma saunia e fai. A o ou vaavaai atu ia te outou i le po nei, ou te le iloa pe na faapena foliga o uo teine a le autau talavou a Helamana! E leitioa faateleina e Satani le malosi o ana osofaiga i lo outou faasinomaga ma le mama. Afai e mafai ona faamata’uina, faalotovaivaia, faasalaveia, faatuatuai pe faaleaogaina oe mai lou agavaa e maua le taitaiga a le Agaga Paia, pe ulu atu i le malumalu paia o le Alii, ua malo o ia.
Tamaitai talavou o Le Ekalesia a Iesu Keriso o le Au Paia o Aso e Gata Ai, ia manatua pe o ai outou! Ua filifilia outou. O outou o afafine o le Atua. E le mafai ona avea outou o se augatupulaga o tamaitai talavou ua fiafia e “faafetaui i ai.” E tatau ona ia te outou le lototetele e “tulaga ese ai”; e “tutulai ai ma susulu atu, ina ia faia lo outou malamalama ma tagavai mo atunuu.”10 O le a faatalitonuina outou e le lalolagi faapea tou te le taua—ua pasiā a outou tifiga ma ua ese le lalolagi ua siomia ai outou. O loo valaau mai le lalolagi ia te outou i ni leo faatosina, malomaloā e “faafiafia outou lava,” “tofo i mea uma,” “faataitai i ai ma fiafia ai.” I se tulaga e ese mai ai, o loo musumusu mai le Agaga Paia ma o loo valaaulia outou e le Alii ina “ia savavali i le ala o le mama … tuu ese mea a lenei lalolagi … ma piimau i [au] feagaiga.”11
Sa ou fiafia lava i le tala i le atalii o le Tupu o Louis XVI o Farani, aua sa ia te ia se silafia e le maluelue o lona faasinomaga. A o avea o ia ma alii talavou, sa ave faamalosia o ia e tagata leaga o ē sa faatoilaloina le nofoaiga a lona tama, o le tupu. Sa iloa e nei tagata, afai e mafai ona latou faaumatiaina lona tulaga mama, o le a le avea o ia ma suli i le nofoalii. E ono masina sa latou taumafai ai e faagaua’i o ia i mea faatiapolo uma o le olaga, ae sa lei gauai atu lava o ia i nei uunaiga. O lenei mea na fememea’i ai i latou na ave faamalosia o ia, ma ina ua uma ona latou faia o mea uma sa mafai ona latou mafaufau i ai, sa latou fesili atu ia te ia pe aisea lava ua i ai ia te ia lea malosiaga mamalu tele. Sa faigofie lana tali. Fai mai o ia, “Ou te le mafai ona faia mea ua outou fai mai ai, aua na ou fanau mai e avea ma tupu.”12
E faapei o le atalii o le tupu, ua tofu outou ma se tofi tautupu. Ua tofu outou ma se talatuu paia. “O outou moni lava o ni afafine tautupu o lo tatou Tama i le Lagi.”13 O outou uma taitoatasi na fananau mai e avea ma se masiofo.
A o ou aoga i le Iunivesite o Polika Iaga, sa ou aoao ai le uiga moni o le avea ma se masiofo. Sa ou maua se avanoa tulaga ese, faatasi ai ma se vaega toalaiti o tamaiti aoga, e feiloai ai i le perofeta, o Peresitene Tavita O. MaKei. Sa faatonuina au e fai lo’u ofu aupito sili, ma ia sauni e malaga i le taeao po na sosoo ai i Huntsville, Iuta, i le maota o le perofeta. O le a le galo lava ia te au le mea sa ou oo i ai. O le taimi lava na matou ulufale atu ai i le maota, sa ou lagonaina le agaga sa faatumulia ai lena maota. Sa faanonofo matou i le potu malolo o le perofeta ma siosiomia o ia. Sa fai le suti paepae o Peresitene MaKei, ma sa nofo i ona autafa lona faletua. Sa faatonuina i matou e taitasi ma alu atu i luma ma faamatala atu ia te ia e uiga ia i matou lava. A o ou savali atu i luma, sa faaloaloa mai lona aao ma uu lo’u lima, ma a o o’u faamatala atu ia te ia lo’u olaga ma lo’u aiga, sa matua silasila toto’a mai i o’u mata.
Ina ua mae’a, sa faalagolago i tua o lona nofoa ma aapa atu i le lima o lona faletua ma faapea mai, “Ia tamaitai talavou, ou te fia manao tou te feiloai mai i la’u masiofo.” Sa saofai i ona tafatafa lona faletua, o Emma Ray MaKei. E ui lava e le’i faia sona palealii o taimane feilafi, e lei nofo foi i luga o se nofoalii, ae sa ou iloa, o ia lava o se masiofo moni. O lona lauao sinasina o lona palealii lea, o ona mata manino foi na feilafi e pei o maataua. A o faamatala e Peresitene ma Sister MaKei lo la’ua aiga ma lo la’ua soifuaga faatasi, o o la’ua aao sa felavea’i na ta’u mai ai le loloto o lo la’ua alofa. Sa susulu mai le olioli i o la’ua fofoga. O lona lalelei [Sister MaKei] o se lalelei e le mafai ona faatauina. Na maua mai i le anoanoai o tausaga o le sailia o meaalofa aupito sili, lelei ona a’otauina, sailia o le poto e ala i le suesue ma le faatuatua. Na maua mai le anoanoai o tausaga o le galue malosi, o le onosaia ma le faamaoni ma le faamoemoe o tofotofoga, faatuatua, ma le lototele. Na maua mai i lona tuuto ma le faamaoni e le maluelue i lana tane, i lona aiga ma le Alii.
I lena aso o le tautoulu i Huntsville, Iuta, sa faamanatu mai ai ia te au lo’u faasinomaga paia, ma sa ou aoao ai e uiga i le mea ua ou faaigoaina nei o le ‘lalelei o’oo’o’—o le ituaiga o lalelei e susulu mai totonu i fafo. O le ituaiga o lalelei e le mafai ona valivali, faia i se taotoga pe faatauina mai. O le ituaiga o lalelei e le mafai ona matafi ese. O le matagofie e faaleagaga. O le lalelei o’oo’o e afua mai i le mama. O le lalelei o le amioatua ma le ola mama. O le ituaiga o lalelei tou te vaaia i mata o tamaitai amioatua e faapei o lou tina ma tinamatua. O se lalelei e mafai ona maua e ala i le faatuatua, salamo ma le faamamaluina o feagaiga.
Ua tuu e le lalolagi le tele o le faamamafa i le aulelei faaletino ma manao ai ia outou talitonu e tatau ona outou foliga i le faaa’oa’o lētinoa o i luma o le faavaa o se mekasini. O le a ta’u atu e le Alii ia te outou e matagofie tulaga ese outou uma taitoatasi. A e amio mama, amioatua ma mama a’ia’i, e susulu mai i ou mata ma ou foliga lou lalelei i totonu. E masani ona fai mai lo’u tamamatua, “A e ola latalata i le Atua ma Lona alofa tunoa e le i’u, e te le tau ta’u maia, e faaalia lava i ou foliga”14 A e agavaa mo le mafutaga a le Agaga Paia, ua e mautinoa ma e susulu malamalama lou lalelei i totonu. Ma o lea “… ia teuteuina ou manatu i le mama e le aunoa; ona malosi ai lea o lou faatuatua fai ifo i luma o le Atua … [ma] avea ai le Agaga Paia ma au aumea tumau… .”15
Ua aoaoina i tatou “o le meaalofa o le Agaga Paia … e faatele’a’ia ai mafaufau atamamai uma, faateleina, faaopoopo, faalautele ma faamamaina lagona malolosi ma naunauga faalenatura uma … Na te musuia le mama, agalelei, agaalofa, lē gaoia, agamalu ma le alofa moni. Na te faatupuina le lalelei o le tagata, ituaiga ma foliga …”16 Ia, o se mealilo maoae lena o le lalelei! O le lalelei lena na ou vaai i ai i le maota o le perofeta. O lena aso, sa ou aoaoina ai o le lalelei sa ou vaaia ia Sister MaKei na o le pau lena o le lalelei e taulia, na pau lea o le ituaiga lalelei e tumau.
Ua fai mai e Alema ni fesili auiliili mo i tatou taitoatasi e mafaufau i ai: “Po ua [outou] maua ea lona foliga i o outou mata?”17
Sa asiasi mai talu ai nei se vaega o tamaitai i lo’u ofisa. Ina ua maea le asiasiga, sa tautino mai e se tasi o tamaitai talavou ma loimata i ona mata, “Ou te lei mafaufau lava ou te aulelei. Ou te mafaufau pea lava i lo’u faatauvaa. Peitai, o le aso, ina ua ou pasi mai i luma o le faaata i lou ofisa, sa ou autilo atu i ai ma iloa ai lo’u aulelei!” Sa aulelei o ia aua sa susulu mai le Agaga i ona foliga. Sa vaai ia te ia lava e pei ona silasila mai ai lo tatou Tama Faalelagi ia te ia. Sa ia mauaina Ona foliga i ona mata. O le “lalelei o’oo’o” lena.
Tamaitai talavou, autilo i le faaata o le faavavau. Manatua po o ai oe. Vaai ia te oe lava e faapei ona silasila mai lo tatou Tama Faalelagi ia te oe. O outou o ni tamaitai ua filifilia. O outou o se tupulaga tautupu. Aua ne’i faia ni fetuunaiga o lou tofi paia. Na e fanau mai o se masiofo. Ola ina ia e agavaa e ulu atu i le malumalu ma maua ai iina “mea uma ua i ai i [le] Tama.”18 Ia atiina ae le lalelei o’oo’o. E leai lava se isi vaaiga e sili atu ona matagofie nai lo se tamaitai talavou e susulu atu i le malamalama o le Agaga, ua mautinoa, ma lototoa aua e amio mama o ia.
Manatua o outou o afafine o lo tatou Tama Faalelagi. E alofa tele o Ia ia te outou o lea na Ia auina mai ai Lona Alo e faaali atu ai ia te outou le ala e ola ai, ina ia mafai ai ona outou toe foi atu ia te Ia i se aso. Ou te molimau atu afai tou te faalatalata atu i le Faaola, o Lana Togiola lē i’u o le a mafai ai ona outou malolosi ma lototetele a o outou faaauau pea ona sii a’e la outou tagavai mo le mama. O oe o le auro! O oe lava o le tagavai!
Ma o lea, ou te faaiu atu ai i afioga a le Alii ia te outou taitoatasi, o Ona afafine faapelepele: “Faauta, … o oe o se tamaitai filifilia, ua ou valaauina”19 “Savali i le ala o le mama … ia e tuu ese mea a [le] lalolagi … ma tausi pea i feagaiga … na e osia… . Ia e tausi pea a’u poloaiga e te maua ai le pale o le amiotonu.” 20 Ou te molimau atu ai i le suafa paia o lo tatou Faaola, o Iesu Keriso, amene.