Ina ia Mafai e a Tatou Fanau ona Vaai i Fofoga o le Faaola
O lo tatou tiutetauave paia o ni matua ma taitai o lenei augatupulaga faia’e o tamaiti, o le aumaia lea o i latou i le Faaola.
I ni nai tausaga ua mavae sa ou aoaoina ai se vaega o taitai o vasega pepe i le faiga o se lesona o le talalelei mo tamaiti laiti tele. Sa sii i vae o se tasi o taitai sana tama. Sa ou tuuina i luga le ata o le Faaola, ma faataitai le auala e talanoa ai i tamaiti laiti, ma amata ona talanoa e uiga ia Iesu. Sa sesee ifo lenei tamaitiiti mai vae o lona tina, ua laalaa mai ia te au ma tilotilo totoa i le ata ma tagotago i foliga. I lena taimi o le lesona, sa ou fesili ai, “O ai lea?” Sa ataata le tamaitiiti ma tali mai, “Iesu.”
E le’i lava le matua o lenei tamaitiiti e ta’u ai lona lava igoa, ae sa ia iloa foliga ma iloa le igoa o le Faaola. A’o ou matauina lenei tali matagofie, sa ou mafaufau i upu a le Faaola ina ua Ia fetalai, “… Ia saili pea foi i foliga o le Alii, ina ia outou maua i le onosai o outou ola atoatoa ona outou maua lea o le ola faavavau” (MFF101: 38).
O le a le uiga o le saili i foliga o le Faaola? O lona uiga e le na ona iloa o Lona ata. O le valaaulia a Keriso ina ia saili ia te Ia, o se valaaulia ia iloa po o ai o Ia, o mea sa Ia faia mo i tatou ma mea ua Ia poloaiina i tatou e fai. O le o mai ia Keriso, ma le vaai i Ona foliga, e na o lo tatou faalatalata atili atu ia te Ia e oo mai ai, e ala lea i lo tatou faatuatua ma faatinoga. E maua mai i taumafaiga i le olaga atoa. E faapefea la ona tatou saili ia te Ia i lenei olaga ina ia mafai ai ona tatou vaai i Ona fofoga i le isi olaga?
O loo maua i le 3 Nifae se tala i se nuu na vaaitino i foliga o le Faaola i le olaga nei. Ae ui atonu tatou te le vaai ia te Ia i le taimi nei, ae e mafai ona tatou aoao mai i o latou aafiaga. Ina ua mavae le maliu o le Faaola, sa faaali o Ia i nei tagata, aoao i latou, ma faamanuia ia i latou. Ona “oo foi lea ina poloai atu o Ia ia aumaia o latou tamaiti” (3 Nifae 17: 11).
O lo tatou tiutetauave paia o ni matua ma taitai o lenei augatupulaga faia’e o tamaiti, o le aumaia lea o i latou i le Faaola ina ia mafai ona latou vaai i Ona fofoga ma fofoga o lo tatou Tama i le Lagi. A o tatou faia lena mea, ua tatou avatu ai foi ma i tatou.
Toe fesili foi, e faapefea ona tatou faia lenei mea, aemaise lava i se lalolagi ua tumu i mea faalavefau? I le 3 Nifae, sa alolofa matua i le Alii. O i latou o tagata talitonu. Sa latou faatuatua i vavega na faia e Iesu. Sa latou alolofa ia latou fanau. Sa latou faapotopotoina i latou e faalogologo i upu a le Alii ma usitai i Lana poloaiga ina ia aumaia o tamaiti ia te Ia.
Ina ua uma ona aumaia o tamaiti, sa faatonuina e Keriso ia matua e tootutuli. Ona Ia faia lea mo i latou o le mea sa Ia faia mo i tatou uma lava. Sa tatalo o Ia i le Tama mo i latou, ma a’o Ia faia lena mea, fai mai le tala o Lana tatalo sa matua “maoae ma ofoofogia” sa le mafai e upu ona faamatala (3 Nifae 17:16). O le o mai i le Faaola ma talia Lana Togiola, na faamalolosia ai nei matua e faia mea uma e tatau ai ina ia “aumaia” a latou fanau.
O isi mea na poloai Keriso i nei matua e fai o loo maua lea i le 3 Nifae 22:13: “… E aoaoina lau fanau uma lava e le Atua, e tele foi le manuia o lau fanau.”
Ma o lea, o le mulimuli i o latou lava aafiaga ma le Faaola, na aoao ai e nei matua sa Nifae a latou fanau e uiga ia te Ia. Sa latou aoao i latou ia alolofa i le Alii. Sa latou aoao i latou i Lana talalelei. Sa latou aoao i latou i le ala e ola ai i le talalelei. Sa matua lelei lo latou aoaoina o i latou, o lea na i ai le amiotonu ma le filemu i le laueleele mo le 200 tausaga (tagai 4 Nifae 1:1-22).
O lenei, ou te fia fai atu e vaavaai atu ia i latou o loo vagaia outou ma tou te alolofa i ai. O le mea lenei e aupito sili ona taua—o o tatou aiga. Ou te talitonu e sili atu i lo se isi lava mea, e te manao i lenei aiga ina ia faavavau. O le tala i le 3 Nifae e mafai ona fesoasoani tatou te aumaia ai a tatou fanau ia te Ia, aua o loo aumai ai se mamanu tatou te mulimuli ai. Muamua, e tatau ona tatou alolofa i le Faaola ma o tatou loto atoa ma e tatau foi ona tatou alolofa ia tatou fanau. Lona lua, e tatau ona avea i tatou ma se faataitaiga agavaa ia i latou e ala i le sailia e le aunoa o le Alii ma taumafai e ola i le talalelei. Lona tolu, e tatau ona tatou aoao a tatou fanau i le talalelei ma le ala e ola ai i ona aoaoga.
O le mulimuli ai i lenei mamanu e aumaia a tatou fanau i le Faaola o se faagasologa. Se’i o tatou toe tilotilo lava i le mamanu. Muamua, e tatau ona tatou aoao e alolofa i le Alii ma o tatou aiga. E manaomia ai se taimi, poto masani male faatuatua. E manaomia ai le auaunaga lē manatu faapito. A faatumulia i tatou i le alofa i le Alii, e mafai ona tatou alolofa. Atonu e tutulu o Ia ona o mea tatou te fai, peitai e alofa o Ia ia te i tatou ma e i ai pea lava pea o Ia iina e fesoasoani mai. O le ala lena e tatau ona tatou aoao e alolofa ai ia tatou fanau.
Lua, e tatau ona avea i tatou ma ni faataitaiga. O se faagasologa foi lena mea. Afai tatou te mananao ia tatou fanau e o mai ia Keriso ina ia mafai ai ona latou vaai i Ona foliga, e taua lo tatou saili ina ia tatou vaai foi i ai. E tatau ona tatou iloa le ala ina ia faasino atu ai ia te i latou. E tatau ona faatulaga lelei o tatou olaga ina ia mafai ona vaavaai mai i ai a tatou fanau ma mulimuli ai. Atonu tatou te fesili: “O le a se mea e iloa mai e la’u fanau pe a tilotilo mai i o’u foliga? Pe latou te iloa mai ai ea foliga o le Faaola i o’u mata, ona o le ala o loo ou ola ai i lo’u olaga?”
Ia manatua, e leai se tasi o i tatou o le a avea ma faataitaiga atoatoa mo a tatou fanau, ae e mafai ona avea i tatou uma ma matua ma taitai agavaa. O lo tatou taumafai ina ia agavaa, o se faataitaiga e tutasi lava. Atonu tatou te lagona ua tatou toilalo i nisi o taimi, ae e mafai lava ona tatou taumafai pea. O le Alii, ma e ala atu foi ia te Ia, e mafai ai ona faamalolosia i tatou e avea ma tagata e tatau ona avea ai. E mafai ona tatou faia mea e tatau ona fai.
Ma le lona tolu, ua ia te i tatou le faagasologa o le aumaia o a tatou fanau i le Faaola e ala i le aoaoina o i latou i upumoni o le talalelei mai tusitusiga paia ma perofeta, ma e ala i le fesoasoani ia i latou ia iloa ma lagonaina le Agaga. E oo lava i tamaiti laitī e mafai ona malamalama ma talia mea e faavavau o latou natura. Latou te fiafia i tusitusiga paia ma e latou te alolofa foi i le perofeta. E mananao a latou ia lelei. E faalagolago ia i tatou e fesoasoani atu ia tatala pea lena sootaga i le lagi. E faalagolago ia i tatou e puipuia i latou mai uunaiga e tata’iese ai mai le Agaga. E mafai ona tatou maua le fesoasoani ma le taitaiga mai i tusitusiga paia. Ona mafai lea ona tatou aoao a tatou fanau e su’e foi e i latou lava a latou tali iina. E mafai ona tatou aoao atu ia tatou fanau mataupu faavae sa’o ma fesoasoani ia i latou e faaaoga na mataupu faavae i o latou olaga. E mafai ona tatou taitai atu i latou i le Agaga ina ia mafai ai ona latou mauaina la latou lava molimau i le upumoni o loo latou aoaoina. E mafai ona tatou fesoasoani ia i latou ia maua le olioli i le ola ai i le talalelei. O le a fausia ai se faavae mautu o le faatuatua ma le usitai i o latou olaga lea o le a faamalolosia ai i latou.
Ia, e le faigofie nei mea uma. E manaomia ai se faatuatua tele. Fai mai le tala ia sa Nifae, o na aiga, sa maua le filemu mo tausaga e 200. Ae na alu ai se taumafaiga tele. E manaomia le tele o se galue malosi ma le onosai ma le faatuatua, peitai, e leai se isi mea e sili atu ona taua ma faafiafia loto. Ma o le a fesoasoani le Alii mo i tatou, aua e alofa o Ia i nei fanau, e sili atu nai lo lo tatou alofa. E alofa o Ia ia i latou ma o le a Ia faamanuiaina i latou.
O le a outou manatua na Ia faamanuiaina taitoatasi fanau a sa Nifae ma tatalo mo i latou (tagai 3 Nifae 17:14–17, 21). Ona “ia fetalai atu lea i le motu o tagata, ua faapea atu ia te i latou: Vaai ia i o outou tamaiti.
“Ua latou vaai atu, ona tetepa ae ai lea o i latou i le lagi, ma ua latou iloa le lagi ua avanoa, ua latou iloa foi agelu ua ifoifo mai le lagi e peiseai ua i totonu o le afi; Ua latou o ifo ma ua si’osi’o i na tamaiti, ma ua siosiomia foi i latou i le afi, ma ua auauna atu agelu ia te i latou” (3 Nifae l7:23–24).
E mafai faapefea ona oo a tatou fanau i faamanuiaga faapea i nei aso? Na saunoa Elder M. Russell Ballard, “E manino lava, o i tatou ua tuu mai i ai le faatuatuaga mo fanau faapelepele, ua tuuina mai i ai se vaavaaiga paia, faatamalii, aua o i tatou ia na tofia e le Atua e si’osi’omia fanau o le taimi nei, i le alofa ma le afi o le faatuatua ma se malamalama i o latou faasinomaga” (“Faauta i o outou tamaiti,” Tambuli, Oke. 1994, 40).
Uso e ma tuagane, o i tatou o agelu na auina mai e le Tama Faalelagi i le taimi nei e faamanuiaina fanau, ma e mafai ona tatou fesoasoani ia i latou ia i ai se aso, latou te vaai ai i foliga o le Faaola a o tatou aoao atu ia te i latou mataupu faavae o le talalelei ma faatumuina o tatou aiga i le olioli ona o le ola ai. E mafai ona tatou iloa faatasi o Ia. E mafai ona tatou lagonaina Lona alofa ma Ana faamanuiaga. Ma e ala atu ia te Ia e mafai ai ona tatou toe foi atu i le afioaga o le Tama. Tatou te faia lenei mea a o tatou naunau e usiusitai, faamaoni, ma maelega e mulimuli i Ana aoaoga.
“E moni, ua faapea mai le Alii: O le a oo i tagata taitoatasi o lē lafoai ana agasala ma sau ia te au, ma valaau mai i lo’u igoa, ma usiusitai i lo’u leo, ma tausi mai i a’u poloaiga, o le a vaai i o’u mata ma iloa o loo i ai Au” (MFF 93:1).
Uso e ma tuagane, ou te iloa o loo soifua le Atua. O Iesu Keriso o Lona Alo, o lo tatou Faaola ma le Togiola. Ua Ia valaaulia i tatou e o atu ia te Ia ma ua poloaiina i tatou e aumai a tatou fanau, ina ia mafai ai ona tatou vaai faatasi i Ona foliga ma ola faavavau ai faatasi ma Ia ma lo tatou Tama i le Lagi. Ou te tatalo ina ia tatou galulue faatasi uma ia maua lenei faamanuiaga sili i le suafa o Iesu Keriso, amene.