Tatou te Mulimuli ia Iesu Keriso
Tatou te olioli i mea uma lava ua faia e le Faaola mo i tatou. Ua Ia faia ina ia mafai ai e i tatou taitoatasi ona maua lo tatou faaolataga ma le faaeaga.
E momoli atu le agaga faafetai ia Sister Lant ma ona fesoasoani mo le tautua maoae sa latou faia.
O se tiute maoae le lauga atu i le Aso Sa o le Eseta i Au Paia o Aso e Gata Ai i le lalolagi atoa, o ē alolofa i lo tatou Alii ma le Faaola, o Iesu Keriso. Ua tatou faamanatuina i lenei taeao Lona manumalo i le oti. Tatou te faafetai i lo tatou malamalama ma lagonaina le agaga talisapaia mai le taele o o tatou loto, mo le taulaga togiola naunautai a le Faaola mo i tatou. O Lona gauai atu i le finagalo o Lona Tama na maua ai le manumalo faalelagi i le oti, ma o se mea e silisili ona tulaga ese i le talafaasolopito o le tagata soifua. Ou te faafetai mo lenei avanoa e lauga atu ai e uiga i le mulimuli i le Faaola.
O toe aso e lua o le misiona a le Faaola i le tino a o lumanai Lona Faasatauroga, e matua taua lava, ma i se itu e faigata ona malamalama ai. O le anoanoai o mea e tatau ai mo lo tatou taunuuga e faavavau, na tutupu i le Aso Tofi ona sosoo ai lea ma le Aso Faraile, le aso lea na faasatauro ai Keriso. O le Talisuaga Mulimuli, o se talisuaga o le Paseka, o le “faamanatu faavaeina o le faasaolotoina mai o Isaraelu mai le nofo pologa,”1 sa amataina i le afiafi o le Aso Tofi. Na amatalia i le Talisuaga Mulimuli ia sauniga ma aoaoga faavae taua tele. O le a ou ta’ua na o le tolu. Muamua, na folasia mai ai e le Faaola le sauniga o le faamanatuga. Na ia tago ai i le areto, tofitofi, faamanuia, ma tufatufa atu i Ona soo ma fetalai atu, “O lo’u tino lenei, ua foaiina atu mo outou: tou te faia le mea nei e fai ma faamanatuga ia te au.”2 O le auala lea na Ia faatuina ai le faamanatuga. Lona lua, o Lana faamamafa maoae na tuu atu i aoaoga faavae na aoao atu ai le alofa, o se mataupu faavae e aupito maualuga. Na Ia aoao atu, “O le mea lea e iloa ai e tagata uma lava o o’u soo outou, pe afai ua outou fealofani.”3 Lona tolu, e ala i le fautua po o le taitaiga a Keriso, “na folafola atu ai le Agaga Paia i le au aposetolo,” e avea o se tasi Fesoasoani.4
Sa sosoo ai ma le faataunuuina e le Faaola o le Togiola. Sa Ia tauaveina i Ona luga “avega o agasala a tagata” ma mea mataga e … mafai ona faaoso e Satani.”5 I lenei faagasologa na Ia onosaia ai faamasinoga o tuuaiga sese ma mea faigata ma le mataga na faapea ona oo atu ai i Lona Faasatauroga. Sa faaiuina lenei faagasologa i le Toetu manumalo o Keriso i le Aso Sa o le Eseta. Sa faataunuuina e Keriso ia Lana misiona paia o le Faaola ma le Togiola. O le a tatou toetutu mai le oti ma toe faatasia o tatou agaga ma o tatou tino. E faavae i lo tatou agavaa faaletagata lava ia, o le a mafai ai e ala i Lona alofa tunoa ona maua le avanoa mamalu e toe ulufale atu ai i le afioaga o le Atua.6
Fai mai le Perofeta o Iosefa Samita ao ia faamatalaina nei taualumaga o le Eseta, “O mataupu faavae autu o lo tatou talitonuga o molimau a Aposetolo ma Perofeta, e faatatau ia Iesu Keriso, e faapea na maliu o Ia, na tanumia, ma toetu mai i le aso tolu, ma afio a’e i le lagi; ma o isi mea uma e faatatau i lo tatou talitonuga ua na o ni faaopoopoga i ai.”7
E ui ina tatou olioli i le taua faalelagi o Ketesemane ma Kalevario, ae e taulai atu pea la tatou vaai i le Alii toetu. Sa molimau Frederic Farrar, le tagata Peretania e talitonu ma suesuea mataupu faalelotu, faapea o le uluai tupulaga lava o e sa talitonu i le Ekalesia Kerisiano anamua sa faamanatuina le Faaola “o le Keriso Toetu, Faavavau, ma Faamamaluina,” ma “mafaufau ia te Ia, e le o i luga o le satauro, ae i luga o lona Nofoalii.”8
Sa aoao mai Peresitene Hinckley o la tatou savali i le lalolagi, o loo soifua o Ia! O le faatusa o Keriso mo le Au Paia o Aso e Gata Ai o le a maua i faaaliga loloto o lo tatou faatuatua ma le ala tatou te ola ai i Lana talalelei.9
A o tatou mafaufau loloto i le uiga o le avea ai o ni Kerisiano i le asō, mafaufau i vaega o loo manaomia mai ia i tatou ao tatou savalia le ala o le avea ma soo. Ou te fautua atu ia tatou mafaufau loloto ma i ala e tatau ai, mulimuli i faataitaiga na faia e le Faaola i aso mulimuli ia e lua o Lona soifuaga faaletino.
Muamua, mafaufau i le faatomuaga e le Faaola o le faamanatuga. Sa silafia e le Faaola mea o le a tutupu ia te Ia. O lana misiona paia togiola sa amataina i le Taua i le Lagi i le muai olaga sa toetoe lava ina amataina i lena afiafi ma le aso na sosoo ai. Ae faatasi ai ma faamasinoga e Ona fili o le a oo mai, sa leai ma sina faailoga o Lona saunia o se tetee atu i tuuaiga pepelo. Nai lo lena sa aoao atu e le Faaola le sauniga paia o le faamanatuga i Ona soo. A o ou mafaufau i lena taimi paia, na matua ootia ou lagona. O le sauniga faamanatuga o le sauniga aupito paia ma mamalu o sauniga uma o le Ekalesia. Ina ua mavae Lona Toetu, sa faatulagaina e le Faaola le faamanatuga i Sa Nifae.10 Afai o le a avea i tatou ma Ona soo ma tagata faamaoni o Lana Ekalesia, e tatau ona tatou manatua ma faamamaluina le faamanatuga. E maua ai e i tatou taitoatasi le avanoa e faaali ai ma le loto momomo ma le agaga salamo lo tatou naunautaiga e mulimuli i le Faaola, e salamo ai ma avea o se Tagata Paia e ala i le Togiola a Keriso.11 O le faamanatuga e mafai ai e i tatou ona molimau atu i le Atua o le a tatou manatuaina Lona Alo ma tausi i Ana poloaiga ao tatou faafouina a tatou feagaiga o le papatisoga.12 E faateleina ai lo tatou alofa ma faafetaia le Tama ma le Alo.
Sa faamamafaina e le Faaola le alofa ma le lotogatasi ma folafola mai o le a avea i tatou ma Ona soo pe afai ua tatou fealofani. Ao tatou mafaufau i le togiola e faavavau lona taunuuga lea sa Ia sauni e faataunuuina, e manaomia lo tatou usiusitai. E faaalia lo tatou alofa i le Atua pe a tatou tausia Ana poloaiga ma auauna atu i Ana fanau. E le o mafai ona atoatoa lo tatou malamalama i le Togiola, ae e mafai ona alu o tatou olaga o taumafai e faateleina lo tatou alofa ma lo tatou agalelei e ui i faigata tatou te fetaia’i.
O le poloaiga a le Faaola i Ona soo ia alofa le tasi i le isi ma le auala mataina ma le mamana na Ia aoao atu ai lenei mataupu faavae i le Talisuaga Mulimuli, o se tasi lea o vaega aupito ootia ma matagofie mai aso mulimuli o Lona soifuaga i le tino.
Na te lei aoaoina se vasega faatauvaa i amioga lelei. O le Alo lenei o le Atua na fetalai atu i Ona Aposetolo ma soo uma o e o le a mulimuli atu ia i latou, ina ia manatua ma mulimuli i Lana aoaoga aupito tutotonu. O le ala tatou te fegalegaleai ai ma fesootai ai o le tasi ma le isi o se fuafaatatau lea o lo tatou naunautai e mulimuli ia Iesu Keriso.
A o tatou faalogologo i savali o lenei konafesi, o le a ootia o tatou loto ma faia ai ni tautinoga ma folafolaga ia faia ia sili atu. Ae o le taeao o le Aso Gafua o le a tatou toe foi atu i galuega, aoga, tuaoi, ma i se lalolagi lea o le tele lava o itu ua i ai i faigata. O le toatele o tagata o lenei lalolagi ua fefefe ma ita i le tasi ma le isi. E ui ina tatou malamalama i nei lagona, e tatau ona tatou faaaloalo i a tatou aoaoga ma migao i a tatou fegalegaleaiga. E moni lava lenei mea pe a tatou feeseeseai. Ua aoao mai le Faaola ia tatou alolofa atu i e ua ita mai ia i tatou.13 O le toatele lava o tagata o la tatou ekalesia o loo usitaia lenei fautuaga. Ae o loo i ai lava nisi ua manatu o le faaalia o lo latou ita po o manatu loloto na taofiofi e sili atu le taua nai lo le ola e pei ona sa soifua ma aoao mai ai Iesu Keriso. Ou te valaaulia i tatou uma taitoatasi, ia iloa o lo tatou feeseeseai o se fuafaatatau moni lea o ituaiga tagata tatou te i ai ma pe o tatou mulimuli moni i le Faaola. E le afaina pe a e lē ioe i se mea, ae e lē talafeagai le feeseeseai. O le faatupu vevesi ma le faaleaga mea e le o se tali lena i o tatou feeseeseaiga. Afai tatou te faaali atu le alofa ma le faaaloalo e oo lava i tulaga faigata, o le a avea atili ai i tatou e faapei o Keriso.
O le folafola atu e le Faaola o le Agaga Paia i Aposetolo o se tulaga matua silisili lona taua i le faamautuina o le matafaioi maoae a le Agaga Paia, le sui lona tolu o le Aiga Atua. O le Agaga Paia o se peresona o agaga, o le Fesoasoani sili e molimau i le Tama ma le Alo, faaali le tonu i mea uma lava, faamama i latou ua salamo ma papatisoina. E ta’ua o ia o le Agaga Paia o le Folafolaga ma faapea ona faamautuina ai ua taliaina e le Atua faatinoga amiotonu, sauniga, ma folafolaga a i tatou taitoatasi.14 O i latou e faamauina i le Agaga Paia o le Folafolaga latou te maua mea uma ua i le Tama.15
Ua tatou ola i se lalolagi pisapisao, fefinauai lea e mafai ai foi ona vaai pe faalogo i faamatalaga, musika, po o mea foi e matuai leai se aoga i itula taitasi. Afai tatou te mananao e maua musumusuga a le Agaga Paia, e tatau ona tatou sailia e faifaimalie ai, mafaufau loloto, tatalo, ma ola ina ia tatou agavaa e maua ma galulue e tusa ai ma Ana musumusuga. O le a tatou taumamao mai sesē ogaoga pe a tatou gauai atu i Ana lapataiga. O se faamanuiaga i le avea ai o i tatou ma tagata o le ekalesia e maua le malamalama ma le poto mai ia te Ia e oo lava i lena aso atoatoa.16
O faamasinoga togiola sa feagai ma le Faaola i Ketesemane ma luga o le satauro o ni faataitaiga sili ia ia i tatou. Sa feagai o Ia ma puapuaga faalemafaufau, faaletino, ma le faaleagaga ia e le i mafai ona oo i ai lo tatou malamalama. I le togalaau, sa Ia tatalo atu ai i Lona Tama e faapea, “Lo’u Tama e, afai e mafai, ia e ave ese lenei ipu ia te au; ae aua le faia lo’u loto, a o lou finagalo.”17 I le avea ai o i tatou ma Ona soo o le a i ai taimi o le a faamasinoina ma sauaina le tonu ai i tatou ma tauemuina le tonu ma feagai ai ma faigata faaletino ma faaleagaga ia e oo atu ai i ni tulaga matautia o le a foliga e le mafai ona tatou tauaveina, ma feagai ai i tatou ma ipu oona tatou te tatalo ina ia aveesea ma i tatou. E leai se tasi e le oo i ai faigata o le olaga.
O loo tatou sauni atu mo le toe Afio Mai Faalua o le Faaola. O loo manino mai tusitusiga paia e leai se tasi na te iloa le taimi e oo mai ai. Ae o loo ta’u mai e tusitusiga paia ia i tatou i aso amuli e faatasi ai ma ipu oona o le a tatou feagai, o le a i ai “mafuie, i lea mea ma lea mea”18 ma “peau o le sami ua siitia ma tāea i tala atu o o latou tuaoi.”19
Na tutupu lata mai nei lava mafuie ma galulolo faataumaoi matautia i lea mea ma lea mea e aofia ai Chile, Haiti, ma motu o le Pasefika. I ni nai vaiaso talu ai sa mafai ai e a’u ma Epikopo Pulefaamalumalu H. David Burton, ma Elder Tad R. Callister ona feiloai atu i le Au Paia o e na maliliu tagata o o latou aiga ona o le galulolo lea na lavea ai le itu i sasae o Samoa ia Setema lea na tea nei. Sa faatumulia le falesa ma o se sauniga sa faamomoiloto. Sa mafai ona matou tautino atu i nei tagata agavaa o le Ekalesia o le Togiola a Iesu Keriso e mafai ai ona toe faatasia i latou ma o latou aiga pele ua maliliu.
Sa ave e le peresitene o le Siteki, o Sonny Purcell lana taavale ina ua vaai atu i le galu maoae le tele o sau mamao lava i tai i le sami. Sa faaeē le pu o lana taavale ma taofi tamaiti sa savavali i luga o le alatele e agai i le aoga ma lapataia i latou e tamomoe televavave atu i nofoaga maualuluga ma le saogalemu. Sa mulimuli tamaiti i lana faatonuga. Sa ave atu ma le gatete lana taavale ma oo atu ai i lona afafine e fa tausaga, ma tuu i totonu o le taavale, ma taumafai atu ai e aumai lona tina. Ao le i oo atu o ia i lona tina, sa si’i i luga lana taavale e le galu ma avatu ai i se mamao e sili atu ma le 100 iata (91 mita), ma sili ai loa i luga o se laau. Sa faatatope lana gaoioi e faasaogalemu lona afafine i luga o le taavale ona aau ai lea o ia e laveai lona tina o le sa pipiimau i se lala o se isi laau e latalata i lo latou fale. I se taumafaiga maoae, sa aau atu ai o ia ma ave lona tina i le taavale ma le saogalemu. E toatele e le i faamanuiaina faapea. E le i lava se taimi latou te o atu ai i nofoaga maualuluga ma le saogalemu. E toatele na faaumatia o latou ola, ae maise lava fanau laiti ma tagata matutua.
Sa matou ta’u atu i aiga Samoa o loo faaali mai le alofa ma le popole alofa o tagata o le Ekalesia i le lalolagi atoa ma sa tatalo mo i latou ma tuuina atu taulaga anapogi ma fesoasoaniga alofa mo tagata o le Ekalesia ma o latou tuaoi. E faapena foi ona faia mo tagata o le Ekalesia ma o latou tuaoi i Chile ma Haiti. Tatou te faia ia mea auā tatou te mulimuli ia Iesu Keriso.
A o matou feiloai ma aiga i Samoa, sa matua manino ai le taua tele o le faatinoina faaleagaga o le o atu i nofoaga maualuluga, ola ai i se olaga sili atu, ma le pipii mau ai i sauniga laveai. O faataitaiga ma le soifuaga o le Faaola ua aoao mai ia i tatou ina ia aloese faaleagaga mai le ala maualalo lea e pulea e mea o lenei lalolagi. A o matou lulu lima ma tagata o le Ekalesia ina ua maea la matou sauniga, sa fai mai se tasi o tuafafine e le i faamauina lo latou aiga i le malumalu ma ua toesea nei se afafine. Sa maligi ona loimata ma faapea mai o la latou sini i le taimi lenei o le saunia lea o i latou lava mo le sauniga paia o le malumalu ina ia mafai ona faatasia faavavau i latou.
A o ou mafaufau loloto i le faamatalaga a lenei tuafafine ma le tulaga o loo i ai nei le lalolagi, ua ou lagonaina se lagona taua faanatinati e fautuaina i tatou taitoatasi e saili i nofoaga maualuluga—le lafitaga ma le puipuiga faavavau o le malumalu.
I le aso Sa o le Eseta, 3 Aperila, 1836, ua tasi lena o le vaiaso talu ona faapaiaina le Malumalu i Katelani, sa faatinoina ai e le Toasefululua le tufatufaina o le faamanatuga o le Talisuaga a le Alii i tagata o le Ekalesia. Ina ua mae’a le sauniga ma ua mae’a le tatalo mamalu lē leoa, sa faaali mai le Faaola i lona mamalu silisili i le Perofeta o Iosefa ma Oliva Kaotui, ma, na ala mai ia Mose, Elia, ma Elaia, le tatalaina mai o le toefuataiga mai o ki faaopoopo o le perisitua e aofia ai ma le mana paia o faamauga lea e fusia faatasi ai aiga e oo i le faavavau.20
I le asō i lenei taeao o le Eseta tatou te olioli i mea uma lava ua faia e le Faaola mo i tatou. Ua Ia faia ina ia mafai ai e i tatou taitoatasi ona maua lo tatou faaolataga ma le faaeaga. Ae, e pei o tamaiti Samoa, e tatau ia i tatou ona tatou tamomoe i le saoasaoa tatou te mafaia i nofoaga maualuluga ua Ia saunia mo le saogalemu ma le filemu.
O se tasi o auala tatou te faia ai lenei mea o le tausisia lea o aoaoga a lo tatou perofeta soifua, o Peresitene Thomas S. Monson. O ia o se faataitaiga sili ona lelei o se tasi e mulimuli i le Faaola.
I lenei taeao faamamaluina o le Eseta, ou te mafaufau i upu taua na tusia e Eliza R. Snow, o se auauna faamaoni i le Toefuataiga.
Ou te tuuina atu la’u molimau faaaposetolo o loo soifua Iesu Keriso ma o le Faaola ma le Togiola o le lalolagi. Ua Ia saunia le ala i le fiafia moni. Ou te molimau atu ai i nei mea i le suafa o Iesu Keriso, amene.