Elder Jairo Mazzagardi

O Le Fitugafulu

Ua silafia e Elder Jairo Mazzagardi le uiga o le ositaulaga i le galuega a le Alii. I le 1990, na maua ai e Elder Mazzagardi se telefoni mai ia Peresitene Thomas S. Monson, a o fesoasoani o ia i le Au Peresitene Sili i le taimi lena, na ia valaaulia o ia e pulefaamalumalu i le Misiona a Salvador i Pasila.

“Ou te lei moemiti lava o le a avea au o se peresitene o le misiona,” o le tala lea a Elder Mazzagardi. “E lei atoa le lima tausaga na ou peresitene ai i se siteki. Sa pisi tele—ma lelei—la matou pisinisi. O le taliaina o lenei valaauga o lona uiga, o le a tuua mea uma.”

Ina ua maea le talanoaga i le telefoni, sa tuuina mai e Peresitene Monson ia Elder Mazzagardi se tami e mafaufau ai i le valaauga. Peitai, ua leva ona tonu ia Elder Mazzagardi ma lona faletua, o le a faapaiaina o la’ua soifua i le Alii, o lea na ia taliaina ai le valaauga i lea lava taimi. “Po o le a lava le mea e manaomia ai i ma’ua e le Alii, ua ma sauni e o,” o lana tala lea.

A’o lei valaauina o ia i le Korama Lua a Fitugafulu, sa avea Elder Mazzagardi ma fesoasoani i le epikopo, fautua maualuga, fesoasoani i se au peresitene o le siteki, peresitene o le siteki, sui risone, Fitugafulu Eria, fesoasoani i le au peresitene o le Malumalu o Campinas i Pasila, ma le peresitene o le Malumalu o São Paulo Brazil.

O Elder Mazzagardi, o se tagata faipisinisi sogasoga, sa ia faaaluina se vaega o lona soifua galue i se pisinisi o aano o manufasi ma mulimuli ane ai fai lana lava kamupani o fale ma fanua. Na tautua foi o ia i le ami a Pasila ma sa avea ma satini e vaaia meatau mo fitafita o le laueleele mai le 1965 i le 1966. Na soifua mai o ia i ona matua o Antonio ma Margarida Mazzagardi ia Aperila 1947 i Itú, Pasila. Na soifua a’e ai iina ma Jundiaí, Pasila. Na masani i la’ua ma lona faletua, o Elizabeth Ienne, a’o laiti ma sa faaipoipo i Hoboken, New Jersey, ia Iulai 1970.

E ui ina sa tele tausaga sa le’i fiafia i la’ua i le Ekalesia, ae ina ua taliu atu Mazzagardi i Pasila, sa valaaulia i la’ua e se uo latou te o i le maimoaga i le Malumalu o São Paulo Brazil. O iina na la taufai maua ai ni aafiaga faaleagaga mamana. Sa papatisoina i la’ua i le aso 31 o Oketopa, 1978, ma faamauina ai o se aiga ia Novema, 1979. E toatolu le fanau a le au Mazzagardis.