O Le Tiute Paia o se Faifeautalai
E manaomia e le Alii alii talavou agavaa uma ia saunia ma toe tautino atu, e amata ai i lenei afiafi, ina ia agavaa i se valaauga mai le perofeta a le Atua e auauna atu i se misiona.
Talofa le usoga perisitua pele i lenei afiafi. Ou te fia talanoa atu i lenei afiafi e uiga i auaunaga faafaifeautalai. E tuusao atu au faamatalaga i vaega toatele o alii talavou o e umia le Perisitua Arona ua faapotopoto i le lalolagi atoa, ma o latou tama, tamamatutua, ma taitai perisitua e vaaia i latou.
O le galuega faafaifeautalai o se mataupu e lata tele i lo’u fatu, e pei foi o sui uma o Korama e valu a Fitugafulu o e na tofia e le Alii e o “muamua atu ia te ia, i aai uma ma mea uma o le a maliu atu i ai o ia.”1 O le galuega faafaifeautalai o le toto ola lea o le Ekalesia ma o le faamanuiaga o le laveaiina o ola o i latou uma e talia lana savali.
Ina ua auauna atu le Matai i tagata, na Ia valaauina tagata fai faiva i Kalilaia e tuu a latou upega ma mulimuli ia te Ia ma folafola atu, “Ou te faia oulua ma fai faiva i tagata.”2 Na faalautele atu e le Alii na valaauga i tagata lotomaualalo, ma ia ala mai ai ia i latou, isi o le a lagonaina le upu moni o Lana talalelei, ma o mai ia te Ia.
Ia Iuni o le 1837, na valaauina ai e le Perofeta o Iosefa Samita ia Heber C. Kimball, o se Aposetolo, e alu i se misiona i Egelani. Na oo mai le valaauga o Elder Kimball a o la saofafai i le Malumalu o Katelani ma na saunoa atu Iosefa i le pule paia: “Brother Heber, ua musumusu mai le Agaga o le Alii ia te au: ‘Tuu atu i lau auauna o Heber e alu i Egelani ma folafola atu lau talalelei ma tatala faitotoa o le faaolataga i lena atunuu.’”3
O lena musumusuga a le Agaga o se faataitaiga lea o le auala e oo mai ai le valaauga i auauna a le Alii ina ia auina atu faifeautalai i atunuu e galulue ai.
I lenei vaitaimi ua o taitoalua faifeautalai e pei ona tofia e le Alii, tauaveina le savali lava e tasi, ma le valaauga paia lava e tasi e auauna atu, mai le perofeta a le Atua. Na saunoa mai lo tatou perofeta o, Peresitene Thomas S. Monson ia i latou ua valaauina e auauna atu: “O le avanoa faafaifeautalai o le olaga atoa e ā oe ia. O loo faatali faamanuiaga faavavau mo oe. O se faamanuiaga mo outou le le avea ai o ni tagata matamata ae o ni tagata auai i tulaga o auaunaga faaleperisitua.”4
Alii Perisitua Arona talavou pelē, o lo outou avanoa lenei. Pe ua outou sauni ea ma le loto i ai e faia lau vaega? E manaomia e le Alii alii talavou agavaa uma ia saunia ma toe tautino atu, e amata ai i lenei afiafi, ina ia agavaa i se valaauga mai le perofeta a le Atua e auauna atu i se misiona.
Ou te manatuaina ma le faapelepele le fiafiaga sili a le matou aiga atoa ina ua maua e le ma fanau e toalua o la valaauga e avea o ni faifeautalai faamisiona. Na faatumulia o matou loto i le le toa ma le naunautai ao taitasi ma tatalaina a la tusi faapitoa mai le perofeta a le Atua. Na valaauina le ma tama teine o Jenessa i le Misiona a Detroit Michigan; ao le ma tama tama o Christian, na valaauina i le Misiona a Moscow Saute Rusia. Oka se aafiaga faalotomaualalo ma le mataina, ma i le taimi lava e tasi!
Ao ma ma’ua ma Sister Rasband le avanoa e vaaia ai le Misiona a Niu Ioka Niu Ioka i Matu i le tele o tausaga ua mavae, sa ou ofo ina ua taunuu mai faifeautalai i le Aai o Niu Ioka.
Ao ou faatalanoaina i latou i lo latou aso muamua i le misiona, sa i ai so’u lagona loloto o le loto faafetai mo faifeautalai uma taitoatasi. Sa ou lagonaina o o latou valaauga i la matou misiona sa faatulagaina faalelagi mo i latou, ma mo au, i le avea ai ma o latou peresitene o le misiona.
Ina ua maea le ma valaauga i le misiona, sa valaauina au e Peresitene Gordon B. Hinckley e auauna atu o se Fitugafulu i le Ekalesia. O se vaega o au aoaoga muamua i le avea ai o se Au Pulega fou e aofia ai le avanoa e faatasi ai ma sui o le Toasefululua ao latou tofiaina faifeautalai e auauna atu i se tasi o le silia ma le 300 misiona o lenei Ekalesia maoae.
Faatasi ai ma le faamalosiauga ma le faatagaga a Peresitene Henry B. Eyring, ou te fia tauina atu ia te outou se aafiaga, e matua taua ia te au, lea na mauaina i le tele o tausaga ua mavae ao avea o ia ma se tasi o le Korama a le Toasefululua. E umia e Aposetolo taitoatasi ki o le malo ma e faaaogaina e ala i le taitaiga ma tofiga a le Peresitene o le Ekalesia. Sa tofia e Elder Eyring faifeautalai i atunuu e galulue ai ma o se vaega la o la’u aoaoga, na valaauina ai au e matauina.
Sa ou auai atu faatasi ma Elder Eyring i se tasi vaveao i le potu o loo i ai lau lautetele o komepiuta ua saunia mo le sauniga. Sa i ai foi ma se tagata faigaluega mai le Matagaluega a Faifeautalai lea na tofia e fesoasoani ia i matou i lena aso.
Na muamua lava, ona matou tootutuli faatasi e faia se tatalo. Ou te manatua le faaaogaina e Elder Eyring o upu faamaoni e aioi atu ai i le Alii ia faamanuia o ia ina ia iloa “tonu” lava nofoaga e tatau ona tofia i ai faifeautalai. O le upu “tonu” na tele ina faamatalaina ai le faatuatua na faaalia e Elder Eyring i lena aso.
Ao amata le faagasologa, na sau i luga o se tasi o lau le ata o le faifeautalai o le a tofiaina. Ao faaali taitasi mai ata, sa foliga mai ia te a’u e pei lava o i ai le faifeautalai i totonu o le potu faatasi ma i matou. Sa faafeiloai e Elder Eyring le faifeautalai i lona siufofoga malu ma le tauagafau: “Talofa Elder Reier po o Sister Yang. “O a mai lau susuga i lenei aso?”
Fai mai a ia i lona lava mafaufau e fiafia lava e mafaufau po o fea le nofoaga o le a faamaea ai e faifeautalai a latou misiona. Ma e fesoasoani ia te ia e iloa ai le mea o le a tofia ai i latou. Ona suesue lea e Elder Eyring o faamatalaga mai epikopo ma peresitene o siteki, faamatalaga tau le soifua maloloina, ma isi mataupu e faatatau i faifeautalai taitasi.
Ona ia tagai lea i le isi lau lea e faaali mai eria ma misiona i le lalolagi. Ma iu ai, ao musuia o ia e le Agaga, ina tofia le faifeautalai i le nuu e galue ai.
Mai isi o le Toasefululua, ua ou iloa ai o lenei faatulagaga lautele o se tulaga masani ai i vaiaso taitasi pe a tofia e Aposetolo a le Alii le tele o faifeautalai ina ia auauna atu i le lalolagi atoa.
I le maea ai ona ou auauna atu o se faifeautalai i lou lava atunuu i le Misiona a Setete i Sasae, i le tele o tausaga ua mavae, sa matua ootia lava au i lenei aafiaga. Ma i le, mae’a ai foi ona ou auauna atu o se peresitene o le misiona, sa ou faafetai lava mo se molimau atili i lo’u loto, o faifeautalai ia na ou mauaina i le Aai o Niu Ioka na auina mai ia te au e ala mai i se faaaliga.
Ina ua maea ona tofiaina ni nai faifeautalai, sa liliu mai Elder Eyring ia te au ao ia mafaufau i se tasi faifeautalai faapitoa ma faapea mai, “Ia Brother Rasband, o fea e te mafaufau e tatau ona alu ai lenei faifeautalai?” Na ou te’i! Na ou fautua lemu atu ia Elder Eyring ou te le iloa, ma, ou te le iloa pe mafai ona ou iloaina! Na ia pupula sa’o mai lava ia te au ma faapea mai, “Brother Rasband, ia matau lelei mai lava ma e mafai ai foi ona e iloaina!” I lena mea, na ou tosoina lo’u nofo e faalatalata atili atu ia Elder Eyring ma le lau o le komepiuta. Na ou matauina lelei lava!
O le tele o isi taimi ao faagasolo pea lea tulaga, e liliu mai ai Elder Eyring ia te au ma faapea mai, “Ia, Brother Rasband, o fea e te lagona e tatau ona alu i ai lenei faifeautalai?” Ona ou ta’u atua lea o se igoa o se misiona faapitoa ae faataupupula mai Elder Eyring ia te au ma mafaufau ma faapea mai, “Leai, e le o iina!” Ona faaauau lea ona ia tofia faifeautalai i nuu e musuia ai o ia.
Ina ua lata ina mae’a lena galuega, sa faaalia mai se ata o se faifeautalai faapitoa i luga o le lau. Sa ou mauaina se uunaiga malosi lava, o se uunaiga aupito malosi lava o lena taeao, o le faifeautalai lea e i o ma luma e tatau ona tofia i Iapani. Ou te lei iloa o le a fesili mai Elder Eyring ia te au i le tasi lea, ae o se mea e ofo ai na ia [fesili mai]. Na ou fai atu ia te ia ma le le mautonu ma le lotomaualalo, “Iapani?” Na vave tali mai Elder Eyring: “Ioe, ia tatou o iina.” Na faaali a’e i luga o le lau o le komepiuta le misiona a Iapani. Na faafuasei lava ona ou iloaina e tatau ona alu le faifeautalai lea i le Misiona a Iapani Sapporo.
E lei fesili mai Elder Eyring ia te au po o fea tonu lava le igoa o le misiona, ae na ia tofia lena faifeautalai i le Misiona a Iapani Sapporo.
I se tulaga faalilolilo i lo’u loto sa matua ootia lava a’u i le agaga faafetai faamaoni i le Alii mo le faatagaina o a’u e maua se poto masani i uunaiga, ma ua iloa ai le mea e tatau ona alu ai lena faifeautalai.
Sa tuuina mai e Elder Eyring i le faaiuga o le sauniga lana molimau ia te au i le alofa o le Faaola mo faifeautalai taitasi ua tofiaina e o atu i le lalolagi ma talai atu le talalelei toefuataiina. Fai mai a ia ona o le alofa maoae o le Faaola ua iloa ai e Ana auauna ia nofoaga e tatau ona auauna atu ai nei alii ma tamaitai talavou, faifeau faamisiona matutua, ma ulugalii faamisiona maoae. Sa ou toe mauaina foi se isi molimau i lena taeao e uiga i faifeau faamisiona uma lava ua valaauina i lenei Ekalesia, ma tofiaina pe ua toe tofiaina i se misiona faapitoa, e faia lea e ala i faaaliga mai le Alii le Atua Silisili Ese ma tuuina mai i se tasi o, Ana auauna nei.
Ou te faaiuina i se fetalaiga a le Alii i le au Whitmer lea na i ai se la matafaioi taua i aso anamua i le Toefuataiga. Sa avea i laua ma molimau o papatusi auro ma na aofia a la molimau na sainia i le pito i luma o kopi uma a le Tusi a Mamona. Sa aofia ai i la’ua i vaega muamua o faifeautalai lea na valaauina e se perofeta a le Atua i le 1829 e talai atu le talalelei a le Alii o Iesu Keriso.
I le folasaga o le vaega 14 o le Mataupu Faavae ma Feagaiga, o loo faapea mai: “Ina ua maua e atalii taitoatasi e toatolu se molimau i le moni o le galuega, na fia iloa ai taitoatasi le uiga patino o lona lava tiute.”
Mo Ioane ma Peteru Uitimera, le Itiiti na fetalai mai ai le Alii: “Aua e tele ituaso na e naunau mai ai ia te au ia iloa le mea e sili ona aoga ia te oe.”5
Atonu o le toatele o outou alii talavou na outou fesiligia outou lava i lena fesili e tasi. O le tali lea a le Alii: “Ma o lenei, faauta, ou te fai atu ia te oe, o le mea e sili ona aoga ia te oe o le talai atu lea o le salamo i lenei nuu, ina ia e aumaia agaga ia te au, e te mapu faatasi ai ma i latou i le malo o lou Tama.”6
I lenei vaitaimi i lou olaga, au uo talavou e, o se valaauga i le misiona mai le Alii, o se galuega sili lea ona taua e mafai ona e faataunuuina. Saunia nei, ola amiotonu, ma aoao mai i lou aiga ma taitai o le Ekalesia, ma o mai ma ia tatou auai faatasi i le fausiaina o le malo o le Atua i le lalolagi—talia ou tiute paia i “lenei galuega sili.”7 O la’u tatalo lotomaualalo lea i le suafa o Iesu Keriso, amene.