“Ia Outou Lototetele”
[O] taiala mai le tusi a Iosua o le a tuufaatasi e saunia ai le faapogai e aupito sili ona mamana o le lototele ma le malosi o i ai: faatuatua i lo tatou Tama Faalelagi ma Lona Alo, o Iesu Keriso.
E tele taimi, pe a laugaina e le Au Pulega Aoao ia le usoga a le perisitua i le konafesi aoao, latou te amata i le faapea mai ua latou lagona e pei o loo latou lauga atu i se ‘autau maoae’ o taitai perisitua mamana. I le po nei, ua ou lagona e pei ua ou tu i luma o se ‘autau maoae’ o afafine filifilia o le Atua. Ua filifilia outou e fetuleni atu i luma, o tutu faatasi ma na perisitua totoa, i le amiotonu, i nei aso e gata ai. O outou o se vaaiga maoae ma le matagofie.
Ou te fia amata atu i lenei afiafi i le toe iloiloina faapuupuu o le aano faasolopito o la tatou autu, i le Iosua 1:9: “Ia e faamalosi, ma loto tele; aua e te fefe, aua e te mata’u, aua o Ieova lou Atua o loo ia te oe i mea uma e te alu i ai.”
O Mose o le perofeta maoae sa taitaieseina mai le fanauga a Isaraelu mai le nuu o Aikupito, o le mea sa latou nofo pologa ai ma uunaia e tapuai i atua ese. Ina ua mavae tausaga e 40 o faigata i le vao, sa latou latalata atu i lo latou nuu fou, lea e mafai ai ona latou saoloto e tapuai i le Atua moni soifua. Ina ua maliu Mose, sa tofia Iosua e le Atua e avea ma perofeta o le a faamaeaina lenei malaga faavavega.
O Iosua o se taitai musuia. E faaigoa e le Bible Dcitionary o ia “o le ituaiga aupito maualuga o toa tuuto” ma ua ta’u mai ai o le uiga o lona igoa o le “Atua o le fesoasoani” (Bible Dictionary, “Joshua,”). Sa matua manaomia lava lana taitaiga musuia, aua o le a tele pea vaitafe e laasia ma taua e manumalo ai a’o le’i mafai ona vaaia, ma maua mea uma na folafola mai e le Alii i le fanauga a Isaraelu.
Sa silafia e le Alii o le a manaomia e le perofeta o Iosua ma le fanauga a Isaraelu le lotototoa tele naua i le taimi lea. I le mataupu muamua o le tusi a Iosua, e faatele ona ta’u atu e le Alii ia te ia ina “ia faamalosi ma lototele.” O le upu “lototele” ua faauigaina o le malosi “i le mafaufau po o le tauagafau e onosaia ai ma tatalia mea matautia, fefe foi ma faigata (Merriam-Webster’s Collegiate Dictionary, 11th ed. [2003], “courage”; emphasis added). O lo latou lototetele ma le usiusitai, na mafai ai e Iosua ma le fanauga a Isaraelu ona ulufale atu i le nuu o le folafolaga ma maua ai le fiafia i faamanuiaga a le Alii.
Ua loa tausaga ua mavae sa soifua ai Iosua ma le fanauga a Isaraelu. Peitai i o tatou taimi, o loo tatou taumafai foi ina ia ulufale i se “nuu o le folafolaga.” O la tatou sini aupito sili o le maua lea o le ola e faavavau faatasi ma lo tatou Tama Faalelagi. I le mataupu muamua o le tusi a Iosua, tatou te maua ai taiala mautinoa e fa e fesoasoani ai ia i tatou e faatoilalo mea faalavefau, faamae’a la tatou malaga ma olioli i faamanuiaga a le Alii i lo tatou “nuu o le folafolaga.”
Muamua, i le fuaiupu e 5, o loo folafola atu ai e le Alii ia Iosua, “Ou te le tuua lava oe, ou te le tuulafoai lava ia te oe.” E mafai ona tatou maua le lototele ma le malosi i lenei folafolaga faapea, o le a i ai pea lava pea le Alii iina mo i tatou ma o le a le tuulafoaiina lava i tatou. Ua aoaoina i tatou e faapea, e silafia ma alofa le Tama Faalelagi i Ana fanau taitoatasi. I le avea ai ma se tasi o Ona afafine faapelepele, ua mafai ona e mauaina Lana faamautinoaga, ma le taitaiga e ala i le mana o le tatalo. I le Mataupu Faavae ma Feagaiga, ua tatou faitau ai, “Ia e lotomaulalo; ona taitaiina ai lea o oe e le Alii lou Atua, ma tali atu i au talosaga” (MFF 112:10).
Ou te talitonu i nei upu ma folafola atu ia te outou e faafofoga mai le Tama Faalelagi ma tali mai i a tatou tatalo. Peitai, o le tele o taimi e manaomia ai le onosai pe a tatou “faatalitali atu i le Alii” (Isaia 40:31). A o tatou faatalitali, e ono amata ona tatou talitonu ua tuulafoaiina i tatou, pe faapea foi e lei faafofogaina a tatou tatalo, po o le faapea foi tatou te le o agavaa mo se tali o a tatou tatalo. E le sa’o lena mea. Ou te fiafia lava i upu faamafanafana a le Tupu o Tavita: “Na ou matua faatalitali lava ia Ieova; ona faasaga mai ai lea o ia ia te au, ua faafofoga mai foi o ia i la’u alaga” (Salamo 40:1).
Po o le a lava le mea atonu lua te fetaiai i lau malaga faaletagata lava ia, o le uluai taiala o loo maua i le Iosua o loo faamanatu mai ai ia i tatou e tatalo, ia onosai, ma manatua le folafolaga a le Atua: “Ou te le tuua lava oe; ou te le tuulafoai lava ia te oe” (Iosua 1:5).
O le taiala lona lua o loo maua i le fuaiupu e 7, ina ua ta’u atu e le Alii ia Iosua: “Ia e anaana e fai e tusa ma le tulafono uma na fai atu ai … aua e te alu ese ai i le itu taumatau po o le itu tauagavale, ina ia manuia ai oe i mea uma e te alu i ai.” O loo faatonuina Iosua e le Alii ina ia usitai atoatoa i poloaiga, ma aua lava nei alu ese mai le ala o le Alii. Na aoao mai Peresitene Howard W. Hunter, “Sa silafia e Iosua o lona usiusitai o le a aumaia ai faamanuiaga, ma e ui lava na te le’i iloa tonu pe faapefea ona manuia, ae ua mautinoa lava e ia le taunuuga … E moni lava ua tusi faamaumauina ma teuina ia aafiaga o perofeta maoae [o loo maua i tusitusiga paia] e fesoasoani ai ia tatou malamalama i le taua o le filifilia o le ala o le usitai atoatoa. (“Commitment to God” Ensign, Nov. 1982, 57, 58).
I se masina talu ai, sa ou asiasi ai i se vaega o tamaitai talavou. Sa ou fesili i teineiti matutua po o le a se fautuaga latou te mananao e tuu atu i se Ofagapi fou, e fesoasoani ai ia te ia ia tumau faamaoni ma amiomama i faatulagaga uma o le a la feiloai. Fai mai se tasi tamaitai talavou, “A e savali atu i le faapaologa o lo outou faleaoga, atonu o le a e iloa atu i ou si’umata se mea e tosina i ai lau vaai, se mea atonu e le sa’o. Atonu o le a e fia iloa ma manao e vaai i ai. O la’u fautuaga lea ia te oe: Aua e te tepa i ai. Ou te folafola atu ia te oe o le a e toe salamo. Talitonu mai ia te au; tau lava o lou tepa taulai i luma.”
A o ou faalogologo atu i lenei tamaitai talavou, sa ou iloa o la sa ou faalogo i le fautuaga a le Alii ia Iosua, “Aua e te alu ese ai i le itu taumatau po o le itu tauagavale” (Iosua 1:7), e faatatau i se faatulagaga o aso uma i nei aso e gata ai. Tamaitai talavou, aloese mai faaosoosoga o loo siomia ai outou e ala lea i le mulimuli atoatoa i poloaiga. Tepa taulai i luma i lau sini faavavau. O le taiala lona lua ua faamanatu mai ai ia i tatou o le faia o lenei mea, o le a puipuia ai outou ma o le a “manuia ai oe i mea uma e te alu i ai” (Iosua 1:7).
I le fuaiupu e 8, tatou te maua ai la tatou taiala lona tolu. O iina, o loo ta’ua ai e le Alii se “tusi o le tulafono” ma fai atu ai ia Iosua e “mafaufau i ai i le ao atoa ma le po, ma anaana e fai e tusa ma mea uma ua tusia ai: … ona manuia ai lea.”O loo faatonuina Iosua ma i tatou uma lava e le Alii, ina ia faitau i tusitusiga paia. O le suesue i tusitusiga paia i aso taitasi, aemaise o le faitauina o le Tusi a Mamona, e faatuina ai se faavae mausali mo lau molimau tau atia’e i le Alii o Iesu Keriso ma Lana talalelei. E valaaulia ai le Agaga i lou olaga. Na apoapoai mai Peresitene Harold B. Lee, “Afai tatou te le o faitauina tusitusiga paia i aso taitasi, ua vaivai a tatou molimau, [ma] e le o faateleina le loloto o lo tatou faaleagaga” (Teachings of Presidents of the Church: Harold B. Lee [2000], 59).
O totonu o itulau o tusitusiga paia, o loo i ai taiala, folafolaga, tali, ma faamanatu e le mafaitaulia o le a fesoasoani ia i tatou i la tatou malaga i le “nuu o le folafolaga.” O le taiala lona tolu ua faatonuina ai i tatou e faitau ma mafaufau i tusitusiga paia i aso taitasi, ina ia mafai ai ona tatou maua le manuia ma le manumalo.
Ina ua maea ona fetalai atu le Alii ia Iosua, ona talanoa atu lea o Iosua i le fanauga a Isaraelu. I le faaiuga o lana saunoaga, i le fuaiupu e 16, o loo tali atu ai le fanauga a Isaraelu i ana upu ma ua tatou maua ai la tatou taiala lona fa. Ua latou tali mai, “O mea uma e te fai mai ai ia te i matou, matou te faia lava; o mea uma foi e te aauina atu i ai i matou, matou te o lava i ai.”
Ona o i tatou o ni tagata o Le Ekalesia a Iesu Keriso o le Au Paia o Aso e Gata Ai, o lea ua tatou maua ai le avanoa e faia ai foi lea lava tautinoga e mulimuli i lo tatou perofeta, o Peresitene Thomas S. Monson, lea o loo tatou mafuta i le po nei. O le tatalo ma le faamautinoaga a le Agaga, e mafai ai e i tatou taitoatasi ona maua a tatou lava molimau faaletagata lava ia i le perofeta soifua. E tuputupu a’e lenei molimau pe a tatou faalogologo, matau, ma maua le lototele e faaaoga ai ana aoaoga i o tatou olaga i aso taitasi.
O le faalogologo ma usiusitai i fautuaga a lo tatou perofeta tatou te maua ai faamanuiaga faapitoa. Faalogo i nisi o folafolaga faaperofeta na tuuina mai e Peresitene Monson i le konafesi talu ai: “Ia faamanuia outou e le Atua. Ia ia te outou i le asō ma aso uma lona filemu na folafola mai (“Tuleiga Faaiu,” Liahona, Nov. 2009, 110). O loo faatalitali mai folafolaga maoae mo i tatou pe afai tatou te tumau ma faamaoni (“Ia Pulea Ou Lagona, Lo’u Uso,” Liahona, Nov. 2009, 69). “Ou te talosagaina ai faamanuiaga o le lagi i luga o outou uma taitoatasi” (Liahona, Nov. 2009, 110).
Ou te valaaulia outou ina ia outou faalogologo i le konafesi aoao i le vaiaso lea, i aoaoga ma folafolaga e tuuina mai e ala i lo tatou perofeta ma aposetolo. Ona faaaoga lea o le taiala lona fa e ala i le tautino atu e mulimuli i fautuaga a le perofeta, ma toe faamautinoa ai “o mea uma e fai mai ai [o ia] matou te fai, matou te faia lava, o mea uma foi [na te] aauina atu i ai i matou, matou te o lava” (Iosua 1:16).
I le taimi nei, o nei taiala e fa: o le tatalo, usitai i poloaiga a le Atua, suesue i tusitusiga paia i aso taitasi, ma se tautinoga e mulimuli i le perofeta soifua, e ono foliga mai o ni mea iti ma le faatauvaa. Se’i ou faamanatu atu ia te outou le mau o loo maua i le Alema: “Faauta, ou te fai atu ia te oe, o mea faatauvaa ma mea faavalea ua faataunuuina ai mea tetele” (Alema 37:6). A faaaogaina i o tatou olaga i aso taitasi, o nei taiala “faatauvaa ma le faigofie” mai le tusi a Iosua o le a tuufaatasi e saunia ai le faapogai e aupito sili ona mamana o le lototele ma le malosi o i ai: faatuatua i lo tatou Tama Faalelagi ma Lona Alo, o Iesu Keriso.
Ua silafia e le Tama Faalelagi e le faigofie a tatou malaga taitoatasi. Tatou te feagai i aso uma ma tulaga e manaomia ai le lototele ma le malosi. Na faamautuina lenei upumoni i se tala i le Church News:
“Sa i ai se faiaoga i se aoga maualuga na amata lana aoaoga i se tasi aso i lona faatonuina o tamaiti o le vasega e lagolagoina se mataupu faapolokiki e tutu i le tasi itu o le potu, a o ē tetee i ai na faatonu e tutu i le isi itu.
“Ina ua tutu tamaiti ia latou itu, sa tu le faiaoga i le itu tetee. Sa i ai se tamaitai talavou i le itu e lagolagoina, sa faataupupula atu i ai le faiaoga ina ua amata sana osofaiga o ia ma isi o le vasega i o latou manatu.
“O le tamaitai talavou, o se Maea Meite i lana uarota, sa ia onosaia le osofaiga na faitioina ai ona talitonuga.
“[Sa tumau] lona toafilemu ina ua fetaia’i ma se osofaiga i luma o tagata ae matua’ia e se taitai” (“What Youth Need,” Church News, March 6, 2010, 16).
Na faaalia e lenei tamaitai talavou le lototele maoae i lana lava malae o le taua, o lona lava potuaoga i lea aso. Po o fea lava e te i ai, po o le a lava foi le mea lua te feagai, ou te faamoemoe o le a e faaaogaina ia taiala o loo maua i le tusi a Iosua ina ia mafai ai ona e faalagolago i le folafolaga a le Alii: “Ia e faamalosi, ma lototele; aua e te fefe, aua e te mata’u: aua o Ieova lou Atua o loo ia te oe i mea uma e te alu i ai” (Iosua 1:9).
Ou te fia tuuina atu la’u molimau ia te outou, e silafia ma alofa le Tama Faalelagi ia te outou uma taitoatasi. Afai tou te liliu atu ia te ia, o le a Ia lē tuulafoaiina lava outou! O le a Ia faamanuiaina outou i le malosi ma le lototele tou te manaomia e faamaea ai la outou malaga toe foi atu ia te Ia. Ou te faafetai lava mo tusitusiga paia, ma mo faataitaiga mamana, e pei o le perofeta o Iosua. Ou te faafetai lava mo Peresitene Monson, o lē o loo taumafai e taitai saogalemu atu i tatou i lo tatou Tama Faalelagi. Ou te tatalo, ia faapei o le fanauga a Isaraelu, ia tatou ulufale uma atu i lo tatou “nuu o le folafolaga” ma maua ai le mapusaga i faamanuiaga a le Alii. Ou te tautala atu i nei mea i le suafa o Iesu Keriso, amene.