Rosemary M. Wixom

Peresitene Aoao o le Peraimeri

I se lalolagi ua tumu i le leoleoa ma le le mautonu, ua manaomia ai ona iloa e tamaiti le auala e faalogo ai i musumusuga a le Agaga, o le saunoaga lea a Rosemary Mix Wixom, o le peresitene aoao fou ua faatoa lagolagoina o le Peraimeri.

Fai mai a ia, “E mafai ona maua e tamaiti le puipuiga i le tatalo. E mafai ona latou iloa e le tuua lava na o i latou, ma latou te savavali faatasi ma le Faaola, ma e alofa o Ia ia te i latou—e tusa lava pe latou te faia ni mea sese.”

Sa soifua mai Sister Wixom ia Tesema 1948 ia Robert Wayne ma Mary Mix, ma na tuputupu ae i le Aai o Sate Leki, Iuta, ISA. A o tuputupu ae o ia, o lona uso masaga sa avea lava ma ana uo sili, ma na aoaoina o ia e ona matua e foai atu ma se loto fiafia. “A matou ulu atu i le faitotoa i le fale, ou te lagona lava le saogalemu,” o le tala lea a Sister Wixom.

Ina ua 12 ona tausaga, na atili ai ona loloto ona lagona o le saogalemu. A o i ai i se sauniga molimau, sa faafuasei ona ia lagonaina se lagona malosi e faailoa atu lana molimau i le Faaola. Na ta’ua e Sister Wixom, “sa ou tu i luga, ma sa masua atu i fafo lo’u alofa mo Iesu.” Sa fesoasoani lona tina ia te ia ia malamalama o le Agaga Paia lea na uunaia ona lagona.

Fai mai Sister Wixom, “Ou te lei iloa e malosi faapea ma e matuai mo’i lava le Agaga Paia.” O ni tausaga mulimuli ane, na tuuina atu ai e le Agaga Paia ia te ia se lagona lofituina o le filemu a o tatalo o ia mo se tasi o lana fanau. O lona faamoemoega i le taimi nei ia mafai e matua ma taitai o le Peraimeri ona fesoasoani i tamaiti ia iloa faalogo i musumusuga a le Agaga Paia.

Na maua e Sister Wixom se tikeri o le tagata malaga i mea tau aoaoga mai le Iunivesite o le Setete o Iuta. Na faaipoipoina i laua ma lona alii o Blaine Jackson Wixom, i le Malumalu o Sate Leki i le aso 18 o Aokuso, 1970. O i laua o ni matua o se fanau e toaono.

Sa avea Sister Wixom ma se sui o le pulega aoao o le Peraimeri a o lei galulue ai ma lona toalua ina ua pulefaamalumalu i le Misiona a Uosigitone D.C. i Saute. Na galue mulimuli ane Sister Wixom i le pulega aoao a Tamaitai Talavou, lea sa galue ai seia oo ina valaauina o ia o se peresitene aoao o le Peraimeri.