Ua Fofogaina mai le Polokalama Fou o le Tiute i le Atua

E pei ona fofogaina mai i le konafesi aoao, ua i ai se polokalama fou o le Tiute i le Atua ua faia i lalo o le taitaiga a perofeta soifua, e fesoasoani ai i alii talavou e fausia le malosi faaleagaga ma faataunuu o latou tiute faaleperisitua.

“[O le polokalama fou o le Tiute i le Atua] o se meafaigaluega mamana,” na saunoa i ai Peresitene Henry B. Eyring, Fesoasoani Muamua i le Au Peresitene Sili, i le sauniga i le taeao o le Aso Toonai. “O le a faamalolosia ai molimau a alii talavou ma la latou sootaga ma le Atua. O le a fesoasoani ia i latou e aoao ai ma mananao e faataunuu o latou tiute faaleperisitua. O le a faamalolosia ai a latou sootaga ma o latou matua, o sui auai o korama, ma o latou taitai.”

O le polokalama fou o le Tiute i le Atua ua faafaigofieina ma ua taula’i tonu lava. O tulaga manaomia mo vaega uma o vaitausaga e tolu, faatasi ai ma faatonuga mo matua ma taitai, ua maua uma lava i le tusi e tasi. O le tusi ma isi punaoa e faatatau i ai, o le a maua i gagana e 27 i le va o Iuni ma Aokuso 2010. O le a faaauau pea ona faia isi faaliliuga faaopoopo o nei punaoa, i le gasologa o le tausaga.

Ua faatulagaina ia gaoioiga ina ia mafai ai e alii talavou ona aoao e uiga i se mataupu faavae o le talalelei po o se tiute faaleperisitua, galue ai i mea sa latou aoaoina, ona faasoa loa lea o o latou mafaufauga ma lagona i o latou matua, taitai o le Ekalesia, po o a latou korama.

“O le avea ai o se tiakono, aoao, ma se ositaulaga, o le a e auai i gaoioiga o le a fesoasoani ia te oe e fausia ai lou malosi faaleagaga ma aoao ai e faataunuu ou tiute faaleperisitua,” na saunoa i ai David L. Beck, peresitene aoao o Alii Talavou, i le sauniga a le au perisitua i le konafesi aoao. “O le polokalama fou o le Tiute i le Atua o le a taialaina ai oe i lau malaga e faataunuu lou tiute i le Atua ma iloa ai le matagofie o le Perisitua Arona.”

Ua mamanuina le polokalama e faamalosiau ai i alii talavou e tauaveina le matafaioi mo lo latou lava tuputupu a’e, peitai o loo maua ai foi avanoa e faamalolosia ai sootaga i le va o alii talavou ma o latou matua, taitai, ma sui auai o korama. O le tele lava o gaoioiga e mafai ona tuufaatasi i afiafi faaleaiga ma sauniga po o fonotaga ma gaoioiga a korama.

“E i ai se matafaioi taua a matua, taitai ma sui auai o korama i le polokalama o le Tiute i le Atua,” o le faamatalaga lea a Brother Beck i le mekasini a le Ekalesia. “O sauniga a korama i Aso Sa o le a maua ai avanoa masani e aoao ai, galulue, ma faasoa.”

Ua faamalosiauina alii talavou ina ia faaauau pea ona galulue i le polokalama o loo i ai nei seia oo ina faatino le polokalama fou ia latou uarota po o paranesi. A faatino loa le polokalama fou, ona tatau loa lea i alii talavou taitoatasi ona amata galulue i le vaega e talafeauga ma lona tofi o le perisitua o loo i ai nei. Afai ua lata ina mae’a ia tulaga manaomia mo le tusi faamaonia po o le pine lea e faatatau i lona tofi i lalo o le polokalama muamua, e mafai ona ia faamae’aina na tulaga manaomia a’o la ua amata foi ona galue i le polokalama fou.

“O gaoioiga taitasi i le Faataunuuina o Lo’u Tiute i le Atua o loo mulimuli i se mamanu o le a fesoasoani ia te oe e avea ai ma perisitua o loo finagalo le Alii e avea ai oe,” o le saunoaga lea a Brother Beck.

O le a maua nisi faamatalaga ma punaoa i le initoneti i le DutyToGod.lds.org.