Faaauau i le Onosai
O lesona tatou te aoaoina mai le onosai o le a atiina ae ai o tatou uiga, siitia ai o tatou olaga, ma faateleina ai lo tatou fiafia.
I le vaitaimi o le 1960, na amataina ai e se polofesa o le Iunivesite o Stanford se suesuega faatauvaa e sue ai le malosi o mafaufau o tamaiti e tai fa tausaga le matutua. Sa ia tuuina se masimelo [marshmallow] lapoa i o latou luma ona fai atu lea i ai, e mafai ona latou ’aia loa, po o le, afai latou te faatalitali mo le 15 minute, o le a maua a latou masimelo tai lua.
Ona ia tuua lea na o tamaiti ae alu matamata mai i se faata e itu lua i le mea na tupu. O nisi o tamaiti na ’ai a latou masimelo i le taimi lava lena; o nisi sa na o ni nai minute na mafai ona faatalitali ai ona gauai atu loa lea i le faaosoosoga. Sa na o le 30 pasene na mafai ona faatalitali.
O se suesuega sa feoloolo lona manaia, ona agai atu lea o le polofesa i isi vaega o le suesuega, aua, i sana lava faaupuga, “e le tele ni mea e mafai ona e faia i tamaiti e aua ai ne’i ’aia ia masimelo.” Ae a o faagasolo pea aso, sa ia tulimataia lava ia tamaiti ma amata ai ona ia matauina se sootaga manaia lava: o tamaiti na le mafai ona faatalitali na mulimuli ane tauivi i le olaga ma sa tele ni faafitauli i a latou amio, ae o i latou o e na faatalitali na tele lava ina sili atu ona mautinoa ma lelei atu ona musuia, ua maualuluga atu o latou togi ma tupe maua, ma e lelei atu a latou fegalegaleaiga.
O le mea na amataina o se suesuega faatauvaa i tamaiti ma masimelo, na avea ma se suesuega taua ua fautuaina mai ai e faapea, o le gafatia ona faatalitali—o le onosai—sa avea ma se uiga autu atonu e valoia ai le faamanuiaina i se taimi mulimuli ane o le olaga.1
O Le Faatalitali e Mafai Ona Faigata
O le faatalitali e mafai ona faigata. Ua iloa e tamaiti, ma e faapena foi i tagata matutua. Ua tatou ola i se lalolagi ua i ai meaai e saunia faavavave, feau tusitusi i telefoni feaveai, ma tifaga vave maua, ma tali vave i fesili e sili ona leai se taua po o fesili loloto foi. Tatou te le mananao e faatalitali. O nisi foi e lagonaina le vevela o le toto pe a tuai le minoi o le latou laina i le faleoloa, nai lo isi.
O le onosai—o le mafai lea ona taofiofi ou manaoga mo se taimi—o se uiga mama e faapelepele i ai ma e mauagata. Tatou te mananao i le mea tatou te mananao i ai, i le taimi lava lenei. O le mea lea, o le uiga tonu lava o le onosai e ono foliga mai e le manaia ma, o nisi taimi, e oona.
Ae ui i lea, a leai le onosai, e le mafai ona tatou faafiafiaina le Atua; e le mafai ona tatou atoatoa. E moni, o le onosai o se faagasologa o le faamamaina e faaleleia ai le malamalama, faalolotoina ai le fiafia, taulai ai amioga, ma ofoina mai ai le faamoemoe mo le filemu.
O le avea ai ma ni matua, ua tatou iloa ai e le o se tulaga atamai le faamalieina o manaoga uma o a tatou fanau. Peitai e le na o tamaiti e faamalieina pe a lofituina i tulaga e faafiafiaina ai. E silafia e lo tatou Tama Faalelagi mea e malamalama i ai matua lelei i le aluga o taimi: afai e manaomia ona maua e tamaiti le mafaufau faatagata matua ma ausia o latou tulaga gafatia, e ao lava ona latou aoao e faatalitali.
O Le Onosai E Le Na o le Faatalitali
Ina ua 10 ou tausaga, sa avea lo’u aiga ma tagata sulufai i se atunuu fou. Sa avea lava au ma se tamaitiiti aoga lelei i le aoga—ae maise lava, seia oo ina matou taunuu atu i Siamani i Sisifo. O iina, sa iloga lava le ese ai o lo’u aafiaga faaleaoaoga. O le mataupu e uiga i le siosiomaga faaleatunuu na matou aoaoina i la’u aoga, sa fou ia te au. O le mataupu o le talafaasolopito na matou aoaoina, sa matuai ese lava foi. O le taimi muamua, sa ou aoaoina ai le faaRusia e fai ma a’u gagana lona lua; ae o le taimi nei, o le gagana Peretania. Sa faigata mo a’u. E moni, na i ai taimi na ou matuai talitonu ai lava sa le’i faia lo’u laulaufaiva [tulou] e nanu.
Talu ai o le tele o mataupu aoaoina sa fou ma ese lava ia te au, sa ou pau mamao ai lava i tua. O le taimi muamua lea o lo’u olaga, na amata ai ona ou mafaufau faapea atonu ai lava ou te lē poto i le aoga.
O le mea e lelei ai sa i ai so’u faiaoga—sa ia aoaoina au ia ou onosai. Sa ia aoao mai o le faasolosolo malie i luga ma le galue tumau—o le tumau ma le onosai—o le a fesoasoani ou te aoao ai.
I le aluga o taimi, na iu ina manino mai mataupu na faigata—na oo lava foi i le Igilisi. Sa faifaimalie lava ona ou amata iloa afai ou te faaaogaina e a’u lava ia i taimi uma, e mafai ona ou iloa. Sa lei vave oo mai, ae faatasi ai ma le onosai, na oo mai ai lava.
Mai lena aafiaga, na ou aoaoina ai o le onosai sa sili atu nai lo le na o le faatalitali mo se mea ia tupu—o le onosai e manaomia ai le galue malosi agai i sini tauaogaina ae le o le lotovaivai pe afai e le vave maua ni taunuuga po o le leai foi o se taumafaiga.
O loo i ai se manatu taua iinei: o le onosai e le o le taliaina ma le usiusitai, pe o le toilalo foi e galue ona o o tatou atuatuvalega. O le onosai o lona uiga o le faatalitali ma le tumau. O lona uiga o le tumau ai i se mea ma le faia o mea uma tatou te mafaia—galue, faamoemoe, ma le faaaogaina o le faatuatua; o le tauaveina o faigata ma le lototele, e tusa lava pe tolopoina manaoga o o tatou loto. O le onosai e le na o le tumau, ae o le tumau lelei ai!
O le lē onosai, i le isi itu, o āūga ia o le manatu faapito. O se uiga o le faaloloto. E aliae mai—i mea uma—i tulaga masani e ta’ua o le faamai o le “ogatotonu o le atulaulau” lea e taitai atu ai tagata ia talitonu ua siomia i latou e le lalolagi, ma o isi tagata uma ua na o ni ’au faafiafia e lagolago atu ai i le faaaliga tele o le olaga nei lea e na o i latou lava o loo i ai se matafaioi autu.
Oka se ese o lenei tulaga, ou uso pele, mai le tulaga faatauaina na faatulagaina e le Alii mo i tatou o e ua umia le perisitua.
Onosai, o se Mataupu Faavae o le Perisitua
O le avea ai ma e umia le perisitua ma sui o le Alii o Iesu Keriso, e ao ai ona tatou auauna atu i isi i se agaga e ogatasi ma Lana faataitaiga. E i ai se mafuaaga e toetoe ai o lesona uma e uiga i le tulaga faaleautaitai o le perisitua, e tau atu i le vaega e 121 o le Mataupu Faavae ma Feagaiga. I ni nai fuaiupu, ua tuuina mai ai e le Alii se ala autu i le tulaga faaletaitai o le perisitua. “E le tatau ona faatumauina se mana po o se uunaiga e le pule o le perisitua, tau lava i le tauanau atu, i le faapalepale, le agalelei, ma le agamalu, ma le alofa faamaoni.”2
O uiga faaletagata ma aga o loo faamatalaina i nei fuaiupu ua avea ma faavae o le onosai faaleatua ma e le mavavaeeseina le sootaga ma le auaunaga mataalia faaleperisitua ma faapeteriaka. O nei uiga e aumaia ia te oe le malosi ma le poto i le faalauteleina o ou valaauga, i le talaiina atu o le talalelei, i le faaaumeaina o tagata o le korama, ma i le tuuina atu o le auaunaga aupito taua faaleperisitua— e moni, o auaunaga alofa i totonu lava o puipui o o outou lava aiga.
Ia tatou manatua pea o se tasi o mafuaaga ua faamatuu mai ai e le Atua le perisitua ia i tatou o le fesoasoani lea e saunia ai i tatou mo faamanuiaga e faavavau e ala i le faaleleia o o tatou natura e ala i le onosai lea e manaomia i le auaunaga faaleperisitua.
E pei ona onosai le Atua ia i tatou, ia tatou onosai foi ia i latou o loo tatou tautuaina. Ia malamalama o i latou, e pei foi o i tatou, e le atoatoa. O i latou, e pei foi o i tatou, e i ai taimi e sasi ai. O i latou, e pei foi o i tatou, e mananao i isi ia mafaufau i isi tagata i se tulaga lelei.
Aua lava nei e fiu i se tagata. Ma e aofia ai ma lou le fiu ia te oe lava.
Ou te talitonu o i tatou uma lava, e i ai lava se taimi, e mafai ai ona tatou faailoaina faatasi ma le auauna i le faataoto a Keriso lea sa aitalafu tupe i le tupu ma sa augani atu i le tupu, e faapea, “Le Alii e, ia e faapalepale mai ia te au.”3
O Le Ala ma le Taimi a le Alii
Sa faatalitali le fanauga a Isaraelu mo le 40 tausaga i le vao ona faatoa latou oo atu lea i le nuu o le folafolaga. Sa faatalitali Iakopo mo tausaga umi e 7 ia Rasela. Sa faatalitali tagata Iutaia mo le 70 tausaga i Papelonia ona faatoa mafai lea ona foi atu e toe fausia le malumalu. Sa faatalitali sa Nifae mo se faailoga o le soifua mai o Keriso, ma sa iloa foi afai e le oo mai le faailoga, o le a fasiotia i latou. O tofotofoga o Iosefa Samita i le Falepuipui o Liperate na iu ai ina mafaufau le perofeta a le Atua, “Seia afea?” 4
I ia tulaga taitasi, na i ai lava le faamoemoe o le Tama Faalelagi i le tatau ona faatalitali o Ana fanau.
Ua valaauina i tatou uma taitoatasi e faatalitali i o tatou lava ala. Tatou te faatali mo tali i talosaga. Tatou te faatali mo mea lea e foliga mai ua talafeauga ma matuai lelei mo i tatou ma tatou te le iloa lava pe aisea o le a tuai mai ai le tali a le Tama Faalelagi.
Ou te manatua le taimi a o o’u sauniuni ai ou te a’oga e avea ma se pailate o vaalele tau. Sa ou faaaluina se taimi tele o aoaoga faamasani i le militeli i toleniga mo le tino. Ou te le o mautinoa lelei lava pe aisea na manatu ai o le tamoe i se taimi umi o se vaega alagatatau lea o tapenaga e avea ai ma se pailate. Ae ui i lea, sa matou tamomoe, ma tamomoe, ma saga tamomoe pea.
A o ou tamoe, sa amata ona ou matauina se mea moni na faapopoleina ai au. Na faafia ona pasia au e alii na ulaula, inu ava malosi, ma faia mea uma na feteenai ma aoaoga o le talalelei, ae maise lava, o le Upu o le Poto.
Ou te manatua lo’u mafaufau na i ai, “Faatali a laia! Pe sa le tatau ea ona mafai ona ou tamoe ae le vaivai?” Ae sa ou vaivai, ma sa pasia a’u e tagata na manino e le’i mulimuli i le Upu o le Poto. Ou te tautino atu, sa fai ma faalavelave i lo’u mafaufau i lena taimi. Sa ou fesili ifo ia te au lava, pe sa moni ea le folafolaga pe leai?
Sa lei vave ona oo mai le tali. Ae na iu lava ina ou iloa e le o taimi uma e vave faataunuuina ai folafolaga a le Atua pe faataunuuina foi i se ala tatou te ono faamoemoe i ai; ae e oo mai e tusa ai ma Lona lava taimi ma i Lana lava ala. O tausaga mulimuli ane na mafai ona ou vaai manino ai i faamaoniga o faamanuiaga faaletino e oo mai ia i latou o e usitai i le Upu o le Poto—e faaopoopo atu i faamanuiaga faaleagaga ia e vave oo mai mai le usitaia o soo se tulafono a le Atua. O le toe vaai faalemafaufau i tua, na ou mautinoa ai o folafolaga a le Alii, afai e le o taimi uma e vave mai ai, o taimi uma lava e mautinoa e faataunuuina ai.
O Le Onosai e Manaomia ai le Faatuatua
Na aoao mai Polika Iaga, a tulai mai se mea e le malamalama atoatoa i ai o ia, e tatalo atu i le Alii, “Aumai ia te au le onosai ou te faatalitali ai seia oo ina ou malamalama i ai mo au lava.”5 Ona, faaauau ai lava lea ona tatalo Polika Iaga seia oo ina mafai ona ia malamalama ai.
E ao ona tatou malamalama o le fuafuaga a le Alii, o lo tatou malamalamaaga e i ai taimi e oo mai ai, “o lea fuaiupu ma lea fuaiupu, o lea mataupu ma lea mataupu.”6 O le faapuupuuga, o le atamai ma le malamalama e oo mai i le tau o le onosai.
E tele taimi na o le pau le ala tatou te malamalama lelei ai i vanu loloto o lo tatou olaga i le taimi nei, o le toe tepa lea i tua mai tulaga o o tatou aafiaga i le lumanai. E tele ina le mafai ona tatou iloa le aao o le Alii i o tatou olaga seiloga e umi se taimi talu ona mavae atu ia tofotofoga. O le tele o taimi, o taimi e sili ona faigata o o tatou olaga o ni vaega taua e fauina ai le faavae o o tatou uiga ma faailogaina ai le ala mo avanoa, malamalama, ma le fiafia i le lumanai
Onosai, o se Fua o le Agaga7
O le onosai o se uiga faaleatua e mafai ona faamaloloina ai agaga, matala ai oa o le atamai ma le malamalama, ma liua ai alii ma tamaitai masani e avea ma au paia ma agelu. O le onosai o se fua moni o le Agaga.
O le onosai o lona uiga o le tumau i se mea seia oo i le iuga. O lona uiga o le faatuai o le vave faamalieina mo faamanuiaga o le lumanai. O lona uiga o le taofiofi o le ita ma tolopo le fai atu o upu faalealofa. O lona uiga o le tetee atu i le amioleaga, e tusa lava pe ua foliga mai ua mauoa ai isi.
O le onosai o lona uiga o le taliaina o le mea e le mafai ona suia ma le faafetaiaia i le lototele, faatamalii ma le faatuatua. O lona uiga o le “fia gauai i mea uma ua silafia e le Atua e tatau ona faatiga ai [tatou], e pei lava ona gauai le tamaitiiti i lona tama.”8 Ma le mea mulimuli, o le onosai o lona uiga o le “mausali ma le le mafaagaeetia i le tausiga o poloaiga a le Atua”9 i itula uma o aso taitasi, e tusa lava pe faigata ona fai. I upu a Ioane le Talifaaaliga, “O le mea lenei ua i ai le onosai o le au paia: o le mea lenei ua i ai e ua tausi i poloaiga a le Atua, ma le … faatuatua [ia] Iesu.”10
O le onosai o se faagasologa o le atoatoa. Na fetalai mai le Faaola lava Ia, o lo outou onosai ia maua ai lo outou ola.11 Po o le, faaaogaina o se isi faaliliuga o le anotusi faaEleni, o lo outou onosai tou te manumalo ai i le puleaina o o outou ola.12 O le onosai o lona uiga o le ola i le faatuatua, o le iloaina o nisi taimi o le faatalitali ae le o le maua mai, e aupito sili ona tatou tuputupu ae ai. Sa moni lenei aoaoga i le taimi o le Faaola. Ua moni foi i o tatou vaitaimi, aua ua poloaiina i tatou i nei aso e gata ai ia “onosai ai pea seia faaatoatoaina outou.”13
E Faamanuia i Tatou e le Alii ona o Lo Tatou Onosai
I se aotelega a le Faisalamo o anamua, afai tatou te faatalitali ma le onosai mo le Alii, o le a faasaga mai o Ia ia i tatou. O le a Ia faafofogaina a tatou alaga. O le a Ia aveina ae i tatou ai le lua e malaia ai, ma faatutu o tatou vae i luga o le papa mausali. O le a Ia tuuina mai se pese fou i o tatou gutu, ma o le a tatou viia lo tatou Atua. O le a iloa e le toatele, ma o le a latou faatuatua i le Alii.14
Ou uso pele, o le mea moni lava o le galuega a le onosai o le: tausi o poloaiga; faatuatua i le Atua, lo tatou Tama Faalelagi; auauna ma le agamalu ia te Ia ma ia alofa faaKeriso; faaaoga le faatuatua ma le faamoemoe i le Faaola; ma ia aua lava nei fiu. O lesona tatou te aoaoina mai le onosai o le a atiina ae ai o tatou uiga, siitia ai o tatou olaga, ma faateleina ai lo tatou fiafia. O le a fesoasoani e avea i tatou ma e agavaa e umia le perisitua ma avea o ni soo faamaoni o lo tatou Alii, o Iesu Keriso.
Ou te tatalo ia avea le onosai ma uiga taua o i tatou o e umia le perisitua a le Atua Silisili Ese; ma ia tatou faalagolago atu ma le lototele i folafolaga a le Alii ma i Lona lava taimi; ma ia tatou faia ma le onosai ma le agaalofa i isi lea o loo sailia foi e i tatou lava; o le a tatou faaauau ai pea lava i le onosai seia faaatoatoaina i tatou. I le suafa paia o Iesu Keriso, amene.