“Ou te Liligi Ifo foi lo’u Agaga i Auauna Fafine i Ia Ona Aso”
Tatou te iloa o loo manuia i tatou pe a tatou ola ina ia tatou agavaa ma mauaina ma iloa le ala e mulimuli ai i le Agaga.
I le tausaga ua mavae, sa ou feiloai atu ai i le fiaafe o tamaitai o le Au Paia o Aso e Gata Ai i le tele o atunuu. E umi ma iloagofie le lisi o luitau e feagai ma nei tamaitai. E i ai faafitauli faaleaiga, o tofotofoga o le tamaoaiga, o mala, faalavelave faafuasei, ma ma’i. E tele naua mea faalavefau ma lē lava le filemu ma le olioli. Po o a lava feau taatele o faasalalauga e ese mai ai, e leai lava se isi e lava sona mauoa, lava se aulelei, pe lava sona poto e aloese ai mai faigata o le olaga.
O fesili e fesili ai tamaitai e ogaoga ma e ‘anoa. Latou te faaalia mai le popole i le lumanai, le faanoanoa mo mea e le o iloa e oo mai, o nisi lē mautonu, ma lagona faaitiitia o le ta’uaogaina faaletagata. Latou te faailoa mai foi se lagona loloto e fai le mea tonu.
Ua tupu a’e i totonu ia te au se molimau lofituina o le taua o afafine o le Atua. Ua matua tele naua mea ua faalagolago atu ia i latou. I a’u talatalanoaga ma tamaitai, ua ou iloa ai e lei ai lava muamua se tulaga manaomia tele atu o le faateleina o le faatuatua ma le amiotonu faaletagata lava ia. E lei i ai muamua se manaomia tele atu mo ni aiga ma auaiga malolosi. E lei i ai muamua ni mea se tele e mafai ona faia e fesoasoani ai ia i latou e manaomia le fesoasoani. E faapefea e se tagata ona faateleina lona faatuatua, faamalosia aiga, ma tuuina atu le faamama avega? 1 E faapefea e se fafine i o tatou taimi ona maua tali i ana fesili ma tulai atu ma le malosi ma le mausali e tetee atu ai i le fili matautia ma faigata?
Faaaliga Faaletagata Lava Ia
O se fafine lelei na te iloa e le lava lona taimi, malosi, po o avanoa e tausia ai tagata uma, pe faia mea lelei uma e naunau lona loto e fai. E le toafilemu le olaga mo le toatele o fafine, ma o aso taitasi e foliga mai e manaomia ai le faataunuuina o ni mea se miliona, ma o le tele lava o mea e taua. O se fafine lelei e tatau ona tetee atu e le aunoa i feau faatosina taufaasese mai le tele o punavai, e ta’u atu ai ia te ia faapea ua ia te ia le aia tatau e alu ese ai mai ona tiutetauave ma ua alagatatau mo ia se olaga e sili atu ona faigofie ma tutoatasi. Peitai, o le i ai o se faaaliga mo le tagata lava ia, e mafai ona ia faatulaga sa’o mea e faamuamua ma faatautaia ma le mautinoa lenei olaga.
O le tomai e agavaa ai mo le mauaina ma faatino e ala i faaaliga faaletagata lava ia, o le tomai aupito taua lea e mafai ona maua i lenei olaga. O le agavaa ai mo le Agaga o le Alii, e amata i se manao mo lena Agaga ma e manaomia ai se vaega patino o le agavaa. O le tausia o poloaiga, salamo, ma le faafouina o feagaiga na osia i le papatisoga, e tau atu ai i faamanuiaga o le i ai pea lava pea o le Agaga o le Alii e faatasi ma i tatou.2 O le osia ma le tausia o feagaiga o le malumalu e faaopoopo foi i le malosi faaleagaga ma le mana i le olaga o se tamaitai. E tele tali i fesili faigata e maua i le faitauina o tusitusiga paia, aua o tusitusiga paia o se fesoasoani lea i faaaliga.3 O le malamalama e maua i mau e faaputuputu i se vaitaimi, o lea e taua ai le faaalu o se taimi i tusitusiga paia i aso uma. E taua foi le tatalo i aso taitasi ia i ai le Agaga o le Alii e faatasi ma i tatou.4 O i latou e sailia ma le faamaoni le fesoasoani e ala i le tatalo ma le suesue i tusitusiga paia, e masani ona i ai se pepa ma se peni i tafatafa e tusi ai fesili ma faamaumau ai uunaiga ma manatu.
E mafai ona oo mai faaaliga i lea itula ma lea itula ma lea itula ma lea itula pe a tatou faia le mea sa’o. A faafailele e fafine e faapei ona faafaileleina e Keriso, e mafai ona oo ifo se mana ma le filemu e taialaina ai pe a manaomia le fesoasoani. Mo se faataitaiga, e mafai e tina ona lagonaina le fesoasoani mai le Agaga tusa lava pe feei mai tamaiti ua fia momoe, ma pisapisao mo oe, ae e mafai ona vavamamao mai le Agaga pe afai e oso le ita i tamaiti. O le i ai i nofoaga sa’o e mafai ai ona tatou maua le taitaiga. E manaomia ai se taumafaiga mataalia e faaitiitia mea faalavefau, ae o le i ai o le Agaga o faaaliga e mafai ai ona manumalo i le fili ma tumau i le faatuatua i le gasologa o aso faigata ma galuega faisoo e tatau ai. O faaaliga mo le tagata lava ia tatou te maua ai le malamalama i mea e fai i aso taitasi e faateleina ai le faatuatua ma le amiotonu o le tagata lava ia, faamalolosia aiga ma auaiga, ma sailia i latou e manaomia la tatou fesoasoani. Talu ai o faaaliga faaletagata lava ia o se punavai faifai pea e mafai ona faafou ai le malosi, e mafai ona lagonaina le siomia i le fesoasoani e oo lava i taimi loulouā.
Ua faatonuina i tatou e tuu lo tatou faatuatuaga i lena Agaga lea na te taitaiina i tatou “e fai mea lelei, ma savali ma le lotomaulalo, ma faamasino ma le amiotonu.”5 Ua ta’u mai foi ia i tatou o le a faamalamalamaina e lenei Agaga o tatou mafaufau, faatumu o tatou agaga i le olioli, ma fesoasoani tatou te iloa ai mea uma e tatau ona tatou fai.6 O faaaliga faaletagata na folafola mai, e oo mai pe a tatou ole atu e aumai, saunia mo le taliaina, ma fetuleni atu i luma i le faatuatua, ma le talitonu o le a liligi mai i o tatou luga.
Aualofa—Aoao Atu, Musuia, ma le Faamalosia
E le gata i lea, na saunia e le Alii i Lona atamai se Aualofa e fesoasoani ai i Ona afafine i nei aso e gata ai. A oo ina faagaoioiga le Aualofa i se ala musuia, na te siitiaina tamaitai i luga ma aveesea mai se lalolagi o faigata ma avatu i se auala o le olaga e saunia ai i latou mo faamanuiaga o le ola faavavau. Ua i ai i le fatu o lenei sosaiete le tiutetauave e fesoasoani i uso ia faateleina le faatuatua ma le amiotonu faaletagata lava ia, faamalolosia o aiga ma auaiga, ma sailia ma fesoasoani i isi o loo manaomia le fesoasoani. E ala mai i le Aualofa, e mafai ai e tamaitai ona maua tali i a latou fesili ma faamanuiaina e le mana faaleagaga tuufaatasi o uso uma. E faamautuina e le Aualofa le natura moni ma le faavavau o afafine o le Atua. O se matafaioi paia, o se sulu taiala, ma se faiga o le mata’ituuga lea e aoao ai ma musuia tamaitai ina ia lototetele ma ia mausali. O lana tagavai o le, “E le uma le alofa,”7 ua nofofale i tamaitai lelei uma.
A oo ina sii atu se teineitiiti i le Aualofa, pe afai e papatiso se tamaitai i le Ekalesia, e avea o ia ma se itutino o se usoga lea e faamalosia ai o ia i ana sauniuniga mo le ola e faavavau. O le ulufale atu i le Aualofa, e ta’u mai ai ua mafai ona faatuatuaina se tamaitai ma faalagolago i ai e faia se sao taua i le Ekalesia. O le a alualu pea i luma e aunoa ma le mauaina o ni mau faaviiviiga ma ni faamalo mai le lautele.
Fai mai le peresitene lona lua o le Aualofa, o Eliza R. Snow, i tamaitai: “Tatou te mananao e avea o ni tamaitai i mea tatou te fai, e le ia tusa ai ma le faaupuga o le upu e pei ona faamasino ai e le lalolagi, ae ia fetaui lelei ma le mafutaga a le Atua ma Ē Paia. I se tulaga faatulagaina lelei, e mafai ona tatou lagolago atu le tasi i le isi e le gata i le faia o mea lelei ae faapea foi i le faaleleia atili o i tatou lava, ma pe na o ni nai tagata pe toatele e o mai e fesoasoani i le faatinoina o lenei galuega tele, o i latou na o le a faatumuina tulaga mamalu i le Malo o le Atua… . O tamaitai e tatau ona avea o ni tamaitai ae le o ni pepe e manaomia le gauai atu i ai ma tau faasa’o i taimi uma. Ou te iloa tatou te mananao e faafetaia i tatou, ae afai la e le tuuina mai le faafetai uma tatou te manatu ua tatau ai mo i tatou, o le ā le mea o i ai? Ua tatou iloa ua tuuina mai e le Alii i o tatou luga le tiutetauave, ma e leai se moomooga po o se faanaunauga ua toto e le Alii i o tatou loto i le amiotonu ae o le a iloaina, ma o le mea aupito sili ona lelei e mafai ona tatou faia ia i tatou lava ma isi, o le faaleleia atoatoa lea ma atiina ae i tatou lava i mea uma e lelei ma faagaeetia ia tatou agavaa ai mo na tiutetauave.”8
Fuaina o le Manuia
O fafine lelei e i ai lava le manao i taimi uma e iloa pe ua faamanuiaina i latou. I se lalolagi e tele ina femilosa’i ai fuataga o le manuia, e taua le sailia o le agaga talisapaia ma le faamautuuga mai punavai sa’o. I se toe faaupuina o se lisi o loo maua i le Talai La’u Talalelei, tatou te manuia pe a tatou atiina ae uiga o Keriso ma taumafai e usiusitai atoatoa i Lana talalelei. Tatou te manuia pe a faateleina lo tatou faatuatua ma le amiotonu faaletagata lava ia, faamalolosia aiga ma auaiga, ma sailia ma fesoasoani i isi o loo manaomia le fesoasoani. Tatou te iloa o loo manuia i tatou pe a tatou ola ina ia agavaa ma mauaina ma iloa le ala e mulimuli ai i le Agaga. “A tatou faia le mea silisili tatou te mafaia, atonu e lagona lava se lē fiafia, ae o le a tatou lē ita ia i tatou lava. E mafai ona tatou lagonaina ma le mautinoa o loo fiafia le Alii pe a tatou lagonaina le galue ai o le Agaga ia i tatou.”9 O loo i ai le filemu, olioli, ma le faamoemoe mo i latou e fuaina faalelei le manuia.
O loo ta’u mai i se faaaliga i le tusi a Ioelu e faapea o aso amulī, o le a vavalo ai atalii ma afafine o le Atua ma o le a liligi ifo e le Alii Lona Agaga i luga o Ana auauna ma auauna fafine.10 Na toe ta’ua e Peresitene Spencer W. Kimball lenei valoaga ina ua ia saunoa:
“O le tele lava o le tuputupu a’e autu o loo sau i le Ekalesia i aso amulī, e oo mai ona o le toatele o tamaitai lelei o le lalolagi (lea e tele ina i ai se lagona loloto o le faaleagaga) o le a aumaia i le Ekalesia le mano o tagata. O le a tupu lenei mea e oo atu i le tulaga e avea ai tamaitai o le Ekalesia ma faataitaiga o le amiotonu ma tautala mai foi ma le atamai i o latou olaga, ma le tulaga e vaaia ai tamaitai o le Ekalesia e tuma’oti ma e ese lava—e viia—mai tamaitai o le lalolagi… .
O le mea lea, o tamaitai o faataitaiga o le Ekalesia o le a avea ma ‘au maoae e le gata i le faatupulaia faafuainumera ae faapea foi i le faaleagaga o le Ekalesia i aso amulī.”11
Ou te tuuina atu la’u molimau e moni le talalelei a Iesu Keriso. O loo faalagolago le Alii i Ona afafine e faia la latou pitolaau e faamalolosia ai aiga o Siona ma fausia Lona malo i le fogaeleele. A o latou saili ma faaagavaaina mo faaaliga faaletagata lava ia, o le a liligi mai e le Alii Lona Agaga i luga o Ana auauna tamaitai i nei aso e gata ai. I le suafa o Iesu Keriso, amene.