Lima Fesoasoani, Lima Laveai
Talosia ia tatou mulimuli i le fautuaga ma le faataitaiga a le perofeta, ma o aso taitasi tatou te sailia ai i latou o loo manaomia le fesoasoani.
O’u uso e ma tuafafine, ou te matuai faafetai lava mo lenei avanoa e lauga atu ai i lenei konafesi. Ou te faafetai mo Peresitene Thomas S. Monson, ma ou te molimau atu o ia o se perofeta a le Atua soifua. Ua matuai faagaeetia lava foi au i faataitaiga matagofie a Peresitene Monson, o le ua faaaluina lona soifuaga i le faaaogaina o ona aao e fesoasoani atu ai ma laveai mai isi.
Ua tatou ola i se vaitaimi ua feagai ai le toatele o tagata ma faigata ma ua manaomia le fesoasoani ona o taunuuga faataumaoi o mafuie, galulolo, afa, ma isi faalavelave faalenatura. O loo aapa atu le Ekalesia i nei tagata e ala i fesoasoaniga alofa. O loo foai mai ma le faamaoni e tagata o le Ekalesia ni taulaga anapogi limafoai i masina taitasi ma faia auaunaga i se agaga o le alofa. Latou te ofoina atu moni ni lima fesoasoani i le ala a le Alii. Latou te mulimuli i le poloaiga a le Alii ina ia, “manatua foi i mea uma e matitiva ma e le tagolima, o e mamai ma e puapuagatia, aua o le na te le faia ia mea, e le o so’u soo o ia” (MFF 52:40).
O le asō ou te fia taulai atu ai i lima e fesoasoani ma laveai faaleagaga. O le galuega ma le mamalu moni o le Alii o le “faataunuu o le faaofuina o le tagata i le tino ola pea ma le ola faavavau” (Mose 1:39). E toatele tagata o loo siomia i tatou e manaomia le fesoasoani faaleagaga. A o tatou ofo atu se lima laveai i tagata e le toaaga o le ekalesia, aiga e na o se vaega e auai i le ekalesia, ma i latou e le auai i lo tatou faatuatuaga, ua tatou valaaulia tagata uma ia “o mai ia Keriso.”1
I le avea ai o au ma se tagata fou liliu mai i le Ekalesia, sa ou oo ai i se laveaiga faaleagaga e ala i lima laveai o se tagata faamaoni o le Ekalesia. Sa ou ola ae i Matsumoto Iapani, e latatala i Nagano lea na fai ai taaloga Olimipeka o le taumalulu. O le matou nuu e tai foliga uma lava i le Aai o Sate Leki, o se vanu e siomia i mauga matagofie. Ina ua 17 ou tausaga, sa ou feiloai i ni faifeautalai Amerika se toalua, o Elder Carter ma Elder Hayashi. E ui ina sa na o le lua pe tolu tausaga na eseese ai o matou tausaga, ae sa i ai i alii faifeautalai se mea matagofie ou te le’i lagonaina muamua lava. Sa maelega i laua, sa laufofoga fiafia ma tumu i le alofa ma le malamalama. Na matuai faagaeetia lava a’u i o la uiga, ma sa ou manao ai ia ou pei o i laua. Sa ou faalogo i le la savali ma filifili ai ou te papatiso. Sa matuai tetee malosi ou matua, o e na lotu Puta, i lo’u papatisoga. E ala mai i le fesoasoani a faifeautalai ma le Alii, na ou maua ai le faatagaga ma o se vavega, na ou papatiso ai.
O le tausaga na sosoo ai na ou ulufale ai i le iunivesite i Yokohama. O le nofo ai na o a’u, mamao mai lo matou nuu ma tagata na ou iloaina, na ou lagona ai le tuua toatasi ma ou alu ese ai mai le Ekalesia. I se tasi aso, na maua mai ai sa’u kata mai se tagata o le Ekalesia i le matou uarota moni. Sa tusi mai o ia, na faalogo ua ou le toe alu i sauniga lotu, ma sa ia sii mai se mau ma valaaulia a’u ina ia ou toe foi mai i le ekalesia. Na lofituina a’u i upu o le mau. O lenei aafiaga na fesoasoani ou te iloa ai atonu ua ou lafoaia se mea taua, ma sa ou mafaufau loloto ma tauivi mo ni aso se tele. O lenei foi aafiaga na mafua ai ona ou manatua se folafolaga na fai mai e faifeautalai ia te au, “Afai e te faitau i le Tusi a Mamona ma ole atu e ala i le tatalo faamaoni pe moni le folafolaga o loo maua i le Moronae, o le a e iloa le moni e ala i le mana o le Agaga Paia.”2
Sa ou iloaina ou te lei tatalo ma lo’u loto atoa, ma sa ou filifili ai o le a ou faia. I se tasi taeao, sa ou alapo ai lava, ma tootuli i lo’u tamai potu ma tatalo ai ma le faamaoni. Na ou matuai te’i lava, aua na oo mai i o’u luga le faamaoniga a le Agaga Paia e pei ona folafola mai. Na mu lo’u loto, na gatete lo’u tino, ma sa faatumulia a’u i le olioli. Na ala mai i le mana o le Agaga Paia na ou iloa ai o loo soifua le Atua le Tama ma Lona Alo o Iesu Keriso, ma sa La faaali moni ifo ia Iosefa Samita. Sa ou faia i lo’u loto se tautinoga ou te salamo ma mulimuli ma le faamaoni ia Iesu Keriso i aso uma o totoe o lo’u ola.
O lenei aafiaga faaleagaga na suia atoa ai lo’u olaga! Sa ou filifili e auauna atu i se misiona e faafetaia ai le Alii ma le tagata o le Ekalesia na laveaiina au. Ina ua uma la’u misiona, sa faamauina a’u i le malumalu i se tamaitai lelei lava ma ua faamanuiaina i maua i se fanau e toafa. E le o se mea na tupu faafuasei, ae o le tamaitai lava lenei na laveaiina au i le auina mai o se kata i lena fale mautotogi ma le tuua toatasi i Yokohama i ni tausaga se tele ua mavae. E tumau ona ou faafetai i le alofa tunoa o le Alii, ma le fesoasoani a lenei tagata o le Ekalesia, o le na toe valaauliaina au ia ou “[sau] ia Keriso.”3
Ou te iloa o le toatele o outou o loo faaloaloa atu faalilolilo o outou aao o le agalelei ma laveai i aso taitasi uma. E aofia ai se tuafafine faamaoni o le Aualofa o lē sa agalelei atu e le na o tuafafine sa tofia o ia e asia ma aoaoina, ae sa faasili i soo se tuafafine e gasegase pe manaomia foi se fesoasoani. E masani ona ia asiasi atu, ma mo le tele o tausaga ua ia faamalosia ai le faatuatua o le toatele. Ou te manatua se epikopo e masani ona asiasi atu i tamaitai ma alii ua maliliu o latou taitoalua o lana uarota. O lenei mamanu o le fesoasoani na faaauauina mo le tele o tausaga e ui lava ina faamaloloina o ia.
Ou te iloa se taitai perisitua e faaavanoaina lona taimi e mafuta ai ma se alii talavou ua maliu lona tama. E auai o ia i ana gaoioiga, aoao o ia i le talalelei ma tuuina atu fautuaga i le ala na semanu e faia ai e lona tama. O se isi aiga e olioli i le faasoa atu o le talalelei. E molimau atu matua ma tamaiti e uiga i le talalelei ia i latou e siomia i latou, ma e alofagia e le toatele.
O se vaega o se gaoioiga a le Peraimeri, na tuu ai e le tama e lima tausaga a lo’u afafine se fatu popukoni i totonu o se fagu mata’eta’e lapoa i taimi taitasi na te faia ai se galuega lelei. Na te usuina leotele le pese Peraimeri lenei a o vaavaai o ia mo ni mea lelei e fai i aso taitasi, “Mulimuli i le perofeta, mulimuli i le perofeta, Mulimuli i le perofeta, na te iloa le ala!”4
E le lava le taimi ou te faamatala atu ai ia te outou mea lelei uma ua ou vaai o faia e tagata o le Ekalesia. O loo latou mulimuli i le perofeta,—e le ona o se tiute po o se matafaioi, ae ona o lo latou lava loto malie, e le faalauaiteleina ma e faia ma le fiafia.
O nisi taimi tatou te manatu ai tatou te vaivai ma leai se malosi e laveai ai isi, ae ua faamanatu mai e le Alii, “E moni ou te fai atu ia te outou, aua na faia e outou i le tasi o e aupito itiiti o o’u uso nei, o a’u lea na outou faia i ai” (Mataio 25:40).
Ou te faaiu atu i se saunoaga mai ia Peresitene Thomas S. Monson: “O’u uso e ma tuafafine, ua siomia i tatou e i latou o loo manaomia lo tatou gauai atu, la tatou faamalosiauga, la tatou lagolago, lo tatou agalelei—o i latou o tagata o aiga, uo, tagata tatou te masani ai, po o tagata ese. O i tatou o aao o le Alii i luga o le fogaeleele, ma se poloaiga ia auauna atu ma sii ae Ana fanau. O loo faalagolago mai o Ia ia i tatou taitoatasi.”5
Talosia ia tatou mulimuli i le fautuaga ma le faataitaiga a le perofeta, ma o aso taitasi tatou te sailia ai i latou o loo manaomia le fesoasoani, ia avea i tatou ma aao o le Alii i le fesoasoani atu ma le laveaiina o Ana fanau, ou te tatalo atu ai i le suafa o Iesu Keriso, amene.