O Le Papa o lo Tatou Togiola
Ou te molimau atu o i latou e tausia Ana poloaiga o le a tuputupu ae i le faatuatua ma le faamoemoe. O le a tuuina atu ia i latou le malosi e faatoilalo ai tofotofoga uma o le olaga.
O tausaga la ua leva na matou asiasi ai ma le matou aiga i Navu, Ilinoi. O iina na o atu i ai le Au Paia anamua i le sailiga o se sulufaiga. E toatele na faaleagaina o latou fale ma faatoaga, ae o nisi na maliliu ai e e pele ia i latou ona o le malosi o sauaga. I Navu sa latou faapotopoto ai ma fausia se aai fou ma le matagofie. Ae sa le mapu ai lava sauaga, ma i le 1846 sa toe tutuli faamalosi ese ai foi mai o latou fale—o le taimi lenei o le ogatotonu o le taumalulu. Sa latou faatulagaina a latou taavaletoso i le Magaala o Parley, e faatalitali ai lo latou taimi e sopoia ai le Vaitafe o le Misisipi ua to’a i le kiona mo se lumanai e le mailoa.
A o matou tutu i le Magaala o Parley ma tomanatu i o latou tulaga pagatia, na tosina atu la’u vaai i se faasologa o faailo laupapa na tutu’i i pou o le pa ia na tusia ai upusii mai api o talaaga a nei Au Paia puapuagatia. A o matou faitauina ia upusii taitasi, sa matou maofa aua o mea na matou maua ai sa le o ni upu o le atuatuvale ma le lotovaivai ae o le talitonu mautinoa ma le tautino e oo lava foi i le olioli. Sa faatumulia i le faamoemoe, le faamoemoe lea o loo atagia mai i le upusii lenei mai le api o talaaga a Sarah DeArmon Rich, Fepuari 1846: “O le amata savalia ai o lenei faigamalaga i le taumalulu … e foliga mai e pei o le savavali atu i augutu o le oti ae sa matou faatuatua … [ma] sa matou manatu ia matou olioli aua ua oo mai le aso o lo matou laveaiina.”1
O nei Au Paia anamua e moni lava sa leai ni o latou fale, ae sa le faapea na leai ai ni o latou faamoemoe. Na nutimomomoina o latou loto, ae na malolosi o latou agaga. Na latou aoaoina se lesona loloto ma le taua. Na latou aoaoina o le faamoemoe, ma ona faamanuiaga e o mai faatasi ai o le filemu ma le olioli, e le faalagolago lea i tulaga e i ai. Na latou iloaina o le pogai moni o le faamoemoe o le faatuatua— faatuatua i le Alii o Iesu Keriso ma i Lana Togiola e le iu, le faavae moni e tasi lea e fausia ai o tatou olaga.
O aso nei, ua faataitai ai e se isi vaega o paionia lenei mataupu faavae taua. O le Aso Lua, 12 o Ianuari, na taia ai e se mafuie malosi le atunuu o Haiti. Na matuai faaleagaina e le mafuie le laumua o Port-au-Prince. Na matuai matautia ona aafiaga—e tusa ma le 1,000,000 tagata na leai ni fale, ae silia ma le 200,000 na lipotia mai ua maliliu.
A o mulimuli ai le lalolagi i le tali atu faavaomalo, sa faagaoioia ai se isi taumafaiga laveai tulaga ese ma le musuia i Port-au-Prince—o lenei taumafaiga sa taitaia e se komiti na aofia ai taitai o le Ekalesia i Haiti i lalo o le mamanu a le perisitua ma faatautaia i lalo o musumusuga. O nisi na fai ma sui o le komiti na aofia ai, ni peresitene se toalua o siteki ma peresitene e toalua o Aualofa i Port-au-Prince ma le peresitene o le misiona, o lē i le 30 o tausaga o lona soifua o loo pulefaamalumalu i le 74 o faifeautalai faamisiona i le Misiona a Haiti Port-au-Prince. O ana faifeautalai uma lava o tagata Haiti, ma o se vavega lava le leai o se tasi o i latou na manua i lenei mafuie matautia.
Na tuuina atu i aao o nei taitai musuia o le lotoifale ia punaoa a le Ekalesia, o punaoa na aofia ai saofaga limafoai o le toatele o outou. Mo nei foai, ua matua faafetai ai tagata o Haiti. I lalo o le taitaiga a le komiti, sa lei umi ae taunuu atu ni loli ma uta o mea e faaaoga mai Tomenika Ripapelika. I nai aso talu ona maea le mafuie, na taunuu atu ai se vaalele ma utameaai, masini e faamama ai le suavai, faleie, palanikeke, ma sapalai o mea faafomai, faatasi ai ma se vaega o fomai.
O falelotu e iva i totonu ma lata ane i Port-au-Prince sa tele lava ina le faaleagaina — o le isi lea vavega maoae. I vaiaso na sosoo ai ma le mafuie, na avea ai nei falelotu ma malutaga mo le silia i le 5,000 o tagata Haiti ma ofisa tutotonu na tufatufaina ai meaai, vaiinu, ma taumafaiga faafomai. Na taulimaina manaoga autu, ma na amata ona tulai mai le maopoopo lelei mai le fenumiai.
E ui ina ogaoga puapuaga o le Au Paia faamaoni i Haiti, ae ua faatumulia i latou i le faamoemoe mo le lumanai. E pei o uluai paionia i le 1846, ua nutimomoia o latou loto ae o loo malolosi lava o latou agaga. Ua faapea foi ona latou aoao mai ia i tatou o le faamoemoe ma le fiafia ma le olioli e le o taunuuga o tulaga e tutupu mai ae o le faatuatua i le Alii.
Na malamalama ma aoao manino mai le perofeta o Mamona, o ia foi o se tagata ua masani i tulaga faigata, lenei aoaoga faavae:
“I le ma lenei ou uso pele e, ou te tautala atu ia te outou e uiga i le faamoemoe… .
“… Faauta ou te fai atu ia te outou, e ia te outou le faamoemoe ona o le togisala o Keriso … , o lenei foi ona o lo outou faatuatua ia te ia e tusa ma le mea ua folafolaina.
“O lenei, afai ua i ai le faatuatua i se tagata, e tatau ona i ai ia te ia le faamoemoe; aua a leai se faatuatua e le mafai ona i ai se faamoemoe.”2
O le faamoemoe e sau mai le faatuatua ia Iesu Keriso. Ua uma ona manumalo o Ia i le lalolagi ma ua folafola mai o le a Ia soloieseina o tatou loimata pe afai o le a tatou liliu atu ia te Ia ma talitonu ma mulimuli [ia te Ia].3
Atonu o loo manatu nisi o e o loo lagonaina i lenei lava taimi le atuatuvale po o le lotovaivai, pe faapefea ona latou toe maua le faamoemoe. Afai o oe o se tasi o i latou na, ia manatua o le faamoemoe e oo mai o se taunuuga o le faatuatua. Afai o le a tatou fausia o tatou faamoemoe, e tatau lava ona fausia o tatou faatuatua.
O le faatuatua i le Faaola e tele mea e manaomia ai nai lo na o le talitonu. Na aoao mai le Aposetolo o Iakopo e faapea, e lava foi i temoni na talitonu ma tetemu.4 Ae o le faatuatua moni e manaomia ai le galue. O le eseesega i le va o temoni ma le au paia faamaoni o lenei Ekalesia e le o le talitonu ae o le galue. E tuputupu ae le faatuatua e ala i le tausia o poloaiga. E tatau ona tatou galulue i le tausia o poloaiga. Mai le Bible Dictionary tatou te faitau ai “O vavega e le tupu mai ai le faatuatua ae e atinae ai le faatuatua malosi i le usiusitai i le talalelei a Iesu Keriso; i se isi faaupuga, o le faatuatua e sau mai le ola amiotonu.”5
A tatou taumafai e tausi poloaiga a le Atua, salamo i a tatou agasala ma tautino atu a tatou taumafaiga sili e mulimuli i le Faaola, o le a amata ona tatou tuputupu ae i le talitonu mautinoa e faapea o le Togiola o le a lelei ai mea uma. O na lagona e faamautinoa mai e le Agaga Paia o lē aveeseina mai ia i tatou ia lagona na ta’ua e o tatou tina ma tama paionia “o le faavaivai.” E ui lava i o tatou tofotofoga, ae ua faatumulia i tatou i se lagona o le manuia sololelei ma lagona ai le fia pese faatasi ma i latou e moni lava “ua lelei.”6
Ou te le manao e faaitiitia le moni o le atuatuvale. Mo nisi, o vaifofo mo le atuatuvale ma le popolevale, o le a maua e ala i le fefautuaai ma tagata lelei ua i ai tomai faapitoa. Ae mo le toatele o i tatou, o le faanoanoa ma le matau e amata ona mou atu ae suia i le fiafia ma le toafilemu pe a tatou faalagolago i le Mataisau o le fuafuaga o le fiafia ma pe a tatou atiina ae le faatuatua i le Alii o le Filemu.
Talu ai nei na maliu ai se tasi o au uo pele ona o le kanesa. O ia ma lona aiga o ni tagata e maoae le faatuatua. Na musuia lava le vaaia o le lagolagoina e lo latou faatuatua o i latou i lenei taimi na sili ona faigata. Na faatumulia i latou i se toafilemu i totonu lea na lagolagoina ma faamalosia ai i latou. Faatasi ai ma le latou faatagaga ou te fia faitauina atu ai se tusi a se tasi o le aiga na tusia i nai aso ao lei maliu lona tama:
“O nai aso mulimuli na matuai sili ona faigata… . O anapo a o matou faapotopoto i autafa o le moega o Tama, na matuai mautinoa lava le i ai o le Agaga o le Alii ma sa galue faamaoni o se faamafanafana ia i matou. O loo matou toafilemu lava… . O se tulaga aupito faigata lenei ua oo i se tasi o i matou, ae matou te lagona le toafilemu i le iloa … ua folafola mai e lo tatou Tama oi le Lagi, o le a matou toe mafuta faatasi o se aiga. Ina ua uma ona logo e le fomai le Tama i le falemai ua leai se isi mea e mafai ona toe faia, na vaavaai mai o ia ia i matou uma ma se faatuatua atoatoa ma fesili sao mai, ‘E i ai se isi o loo i totonu o le potu lenei e i ai se faaletonu i le ata o le faaolataga?’ E leai ma e matou te faafetai mo se tama ma se tina o e na aoaoina i matou ia talitonu atoatoa i lenei fuafuaga.”
Ou te talanoa atu ia i latou uma o e o puapuagatia, o e uma o loo faavauvau, i e uma o loo feagai i le taimi nei po o le a feagai foi ma tofotofoga ma luitau i lenei olaga. O la’u savali e mo tagata uma o loo popole pe atuatuvale pe lotovaivai. O la’u savali ua na o se iu leo, o se faamanatu o le fautuaga faamafanafana faifaipea mai se Tama agaalofa i Lana fanau talu mai le amataga o le lalolagi.
“Ia manatua, ia manatua lava e ao ina oulua atiina ae lo oulua faavae i luga o le papa o lo tatou Togiola, o le Keriso lea, o le Alo o le Atua; pe a faaoo mai e le tiapolo ana matagi tetele, ioe o ana u fanafana i le asiosio, ioe, pe a pesi mai ia te oulua lana uatoa uma lava ma ana afa, e le malo ai ia te oulua, e toso ifo ai oulua i le vanu o le puapuaga ma le auega e le gata ona o le papa ua atiina ae ai oulua, o le faavae mau lea, o le faavae foi lea afai e ati ae tagata i ona luga e le mafai lava ona pauu i latou.”7
Ou te molimau atu ia te Ia, ua manumalo o Ia i le lalolagi, o le a Ia le faagaloina pe lafoai i tatou aua ua Ia togitogia i tatou i Ona alofilima.8 Ou te molimau atu o i latou e tausia Ana poloaiga o le a tuputupu ae i le faatuatua ma le faamoemoe. O le a tuuina atu i ai le malosi e faatoilalo ai tofotofoga uma o le olaga. O le a latou maua le filemu e le oo i ai le malamalama.9 I le suafa o Iesu Keriso, amene.