O Lo Tatou Tiute i le Atua: O Le Misiona a Matua ma Taitai i le Tupulaga Faia’e
O lo tatou tiute taua le fesoasoani i le autalavou ia malamalama ma talitonu i le talalelei i se auala loloto patino.
O le afiafi nei ou te manao e faamalosiau atu i matua ma i latou uma ua valaauina e taitai ma tautuaina le autalavou o lenei lalolagi. Na faaali e le Alii ia Iosefa Samita “o le tiute tatau foi ia i tatou i le tupulaga tutupu a’e uma” (MFF 123:11).
I lo’u olaga atoa o le avea ai ma se tamā ma se tamāmatua, sa ou mafaufau ai lava i le fesili, pe o le a lo’u tiute i le Atua e faatatau i le autalavou? Pe mafai lava ona ou faasoa atu mea sa ou aoaoina e ala mai i se faaaliga faaletagata lava ia ma le molimau.
O i tatou uma lava, o le faia o lo tatou tiute i le Atua i le avea ai o ni matua ma taitai, e amata i le ta’ita’i e ala i faataitaiga—e le aunoa ma le ola ma le maelega i mataupu faavae o le talalelei i le aiga. E manaomia ai i lena mea le naunautai ma le maelega i aso taitasi.
Mo le autalavou, e leai se suitulaga i le vaaia o le talalelei o soifua ai i o tatou olaga i aso taitasi. O taulelea totoa sa lei tau manatu i le mea sa talitonu i ai o latou matua. Na latou fai mai, “Matou te le masalosalo lava na iloa e o matou tina” (tagai i le Alema 56:47–48). O iloa ea e a outou fanau le mea ua tatou iloa?
Na i ai le atalii o lou atalii sa ia fai mai e ma te o faatasi i se ata tifaga tautaua ae e le talafeagai. Sa ou tau atu ia te ia e le o lava lou matua e vaai ai i lena ata tifaga. Sa le mautonu o ia seia oo ina faamatala i ai e tina matua e le aoga ia Tama matua le matua faatulagaina. Na toe sau o ia ma fai mai, “O lea ua ou iloa nei, Tama matua, E le taitai lava lou matua e vaai ai i lena ata tifaga, a ea?” Ma na sao o ia!
E le gata i le faaali atu i le autalavou le ala e auala atu i faataitaiga, ae tatou te taitaia i latou e ala lea i le malamalama i o latou loto ma savavali faatasi ma i latou i le ala o le talalelei. Ina ia malamalama moni i o latou loto, e tatau ona tatou faia nisi mea nai lo le i ai faatasi ma latou i le potu e tasi po o le auai faatasi i se aiga ma gaoioiga a le Ekalesia. E tatau ona tatou fuafua ma faaaoga avanoa uma o taimi o aoaoga o loo i ai se loloto ma se taunuuga umi i o latou mafaufau ma loto.
Mo se faataitaiga, e masani ona fuafua e taitai o le Ekalesia ia gaoioiga a le perisitua ma gaoioiga faamasani a le Sikauti—ae o faataunuuina i nei gaoioiga o latou faamoemoega taua? Ua ou aoaoina o le mea e aoga ai gaoioiga anoa a le perisitua po o le Sikauti e le na o le mauaina o le faailoga pe a iloa se tomai ae o le mauaina o le avanoa e nofo ai ma talanoa ma lona taitai o le o loo fiafia ia te ia ma lona olaga.
Tina ma tama, i se auala e tutusa ai, a o outou aveina pe savavali ma a outou fanau i le aoga po o isi lava gaoioiga, o e faaaogaina le taimi e talanoa ai ma i latou e uiga i o latou faamoemoega ma miti ma o latou popolega ma mea e olioli ai? O e faaavanoaina se taimi e fai atu ai e aveese a latou mea faalogologo MP3 ma isi mea uma ina ia mafai ona latou faalogo atu ia te oe ma lagona lou alofa? O le umi ou te ola ai, o le tele lea o lou iloa o taimi o aoaoga i lou talavou, aemaise lava aoaoga sa tuuina mai e ou matua, sa faavasega ai lou olaga ma le ituaiga tagata ua avea ai a’u.
E faigata ona tatou faamasino atu uunaiga a matua o e o loo malamalama i loto o a latou fanau. O suesuega o loo faaali mai ai ao i ai i le taimi o fesuiaiga o le olaga—e aofia ai ni taimi o loo toatele ai le autalavou o loo agai ese mai le Ekalesia—o uunaiga sili e le o’o mai i se faatalanoaga ma le epikopo po o se isi taitai ae e o’o mai i le fai fai soo, o le mafanafana, o le faauo, o fegalegaleaiga manatu mamafa ma matua.
Ma i lena mea i lo’u mafaufau, pe a tatou nonofo i le laulau ’ai, o i ai uma le tatou aiga iina? Ou te manatua ao ou talavou sa ou faanoi atu ai mo se faatagaga e taalo ai i le pesipolo i le taimi o le aiga i le afiafi. “Na o le tuu lava o la’u meaai i le ogaumu,” O lau tala lea i lou tina. Sa ia tali mai, “Ropati, ou te manao lava ia e malolo mai, sau i le fale, ia i ai faatasi ma le aiga i le aiga i le afiafi, ona mafai lea ona e alu e taalo pesipolo seia po.” Sa ia aoaoina i matou i le taimi o taumafataga, e le o le mea taumafa ae o le fegalegaleaiga faaleaiga ma le faafaileleina o le agaga. Na aoao mai e lou tina o le alofa sili tatou te tuuina atu o totonu lava o o tatou aiga.
Mo a tatou fegalegaleaiga ma le autalavou ina ia ootia moni o latou loto, e tatau ona avatu o tatou manatu atoa mo latou e pei ona avatu o tatou manatu i se paaga matua ua faatuatuaina po o se uo lelei. O le mea taua o le fesili i ai ni fesili, tuu atu e talanoa mai, ona avea lea o le naunau e te faalogo—ioe, faalogo ma faalogo ma faalogo pea—e oo lava i le gauai i ai ma taliga faaleagaga! I ni nai tausaga ua tea atu sa ou faitau ai i se nusipepa ae sau ai se tasi o atalii a lou atalii ma nofo latalata mai ia te au. Ao ou faitau, sa ou fiafia i lou faalogo atu i lona leo malie ao ia talatalanoa mai. Vaai faalemafaufau i lo’u maofa, i se taimi mulimuli ane, na ia oso mai ai i le va o au ma le pepa. Na ia uuina ou foliga i ona lima ma oomi mai lona isu i lou isu ma fesili mai, “Tama matua! O e faalogo mai?”
Tina, Tama, o e i ai iina? Tama matua, Tina matua, o e i ai iina? O le i ai iina o lona uiga o le malamalama i loto a le autalavou ma fesootai ma i latou. Ma o le fesootai ma i latou o lona uiga e le na o le talanoa ma i latou ae o le faia o mea faatasi ma i latou.
I se taimi lata mai sa ou faalogo ai i se tina ao ia faamatala mai se tala i se ala na ia fesoasoani ai i lana fanau teine toatolu muamua i le faamaeaina o a latou tusi o le Alualu i Luma o le Tagata Lava Ia i lona faia o mea sa tatau ona ia faia—i le tumau ai i le logoina ma le sainia o galuega faatino na faataunuuina. Ona ia faamatala mai lea ma le alofa ma loimata na tafe ifo i ona alafau, “I se taimi lata mai sa ma galulue ai ma lau tama teine lona fa i le faia lea o ana galuega faatino e tatau ona faataunuuina. Sa faia ai se eseesega sili i o maua olaga ma la maua mafutaga. Ae, oka se faanoanoa na ou lagonaina ina ua ou iloa le mea sa misia i le le faia o nei mea i isi a’u fanau teine e toatolu.” O upu e sili ona faanoanoa e tautalagia ma tusia o le faaupuga, “Na semanu lava e!”1
O tagata matutua o e auai i le Ekalesia e tatau ona malamalama i mea e tatau ona faataunuuina o le Taua o le Tagata Lava Ia ma le Tiute i le Atua, e le na o ni lisi uumi o mea e maka pe a uma. O sini patino ua faataatia e alii talavou ma tamaitai talavou e fesoasoani ia i latou ina ia agavaa ai mo le mauaina o sauniga o le malumalu, o e faamisiona, ulu atu i faaipoipoga e faavavau, ma olioli ai i le faaeaga. Ae ia matua faamalamalamaina: mo alii talavou ma tamaitai talavou o e taumafai e faataunuuina nei sini na o i latou o se matua toilalo ma se faanoanoaga!
Tama, tina, ma taitai o le autalavou, matou te augani atu ia outou auai faatasi ma lau fanau ma le autalavou i le Alualu i Luma o le Tagata Lava Ia ma le Tiute i le Atua. E le gata ai i lo latou tuputupu ae, o le a e tuputupu ae foi. E faapena foi le taua, o le a outou tuputupu ae faatasi i se sootaga o le faatuatua ma le faauoga o le a mafai ai ona faamalosia e le tasi le isi ma tumau ai i le ala o le talalelei e faavavau, ia avea moni ai o se aiga e faavavau.
O se vaega taua tutusa i le faataunuuina o lo tatou tiute faamātua i le Atua o le aoaoina lea o a tatou fanau i le talalelei ma saunia i latou ia latou auai ma le atoatoa i le Ekalesia toefuataiina a le Faaola. Manatua le lesona a le nuu o le Tupu o Peniamina. O se taunuuga o ana aoaoga, o le toatele o tagata matutua na i ai se suiga tele i le loto (tagai Mosaea 5:2). Ae fai mai, “ua oo ina toatele o le tupulaga na le mafai ona lagona upu a le Tupu o Peniamina, aua o tamaiti i latou i ona aso na tautala atu ai o ia i lona nuu; ua le talitonu i latou… . Ma ua faamaaaina o latou loto” (Mosaea 26:1, 3).
O lo tatou tiute taua le fesoasoani i le autalavou ia malamalama ma talitonu i le talalelei i se auala loloto patino. E mafai ona tatou aoao i latou ia savavali i le malamalama, ae o lena malamalama e le mafai ona nonoina mai. E tatau ona latou mauaina mo i latou lava. E tatau ona maua lo latou lava malamalama o le molimau e tuusa’o mai le punavai o le malamalama faaleagaga—o le Atua lava Ia—e ala i le tatalo ma le suesue ma mafaufau loloto. E tatau ona latou malamalama pe o ai i latou ma tagata e finagalo le Tama Faalelagi e avea ai i latou. E faapefea ona tatou fesoasoani ia i latou?
Pe a fai a tatou afiafi faaleaiga, fonotaga a le aiga, po o se talanoaga anoa faaletalalelei ma a tatou fanau, o loo i ai lo tatou avanoa e vaai atu ai i o latou mata ma ta’u atu ia i latou tatou te alolofa ia i latou, ma e alofa le Tama Faalelagi ia i latou. I nei nofoaga paia, e mafai foi ona tatou fesoasoani ia latou malamalama, i le taele o latou loto, po o ai i latou ma le faamanuiaina o i latou e o mai i lenei fogaeleele ma i lo tatou aiga ma auai i feagaiga ua tatou faia i le malumalu e avea ai o se aiga e faavavau. I a tatou fegalegaleaiga uma e mafai ona tatou faasoa pe faatino nei mataupu faavae ma faamanuiaga o le talalelei.
I nei taimi lē saogalemu e lē lava le na o le iloa e le autalavou le faia o mea sao. E tatau ona latou faia. O le auai ma le faamaoni i sauniga, a korama ma ausilali, o polokalama musuia, ma gaoioiga anoa e fesoasoani i le autalavou e ofu o latou ofutau atoatoa o le Atua. Tatou te fesoasoani ea ia i latou e ofu ia ofutau atoatoa mai le Atua ina ia mafai ai ona latou tetee atu i u fanafana mu a ē ita mai ia te i latou? Ina ia filifili moni le ala o le Alii, e tatau ona latou iloa Lona ala. Ma ina ia iloa moni Lona ala, e tatau ona tatou aoao ma taitai i latou ia amio ai, ia auai, ma ia faia.
O le galuega faafaifeautalai sili o le a tatou faia o le a faia lea i totonu o o tatou lava aiga. O o tatou aiga, o korama, ma vasega o vaega foi ia o a tatou misiona. O a tatou fanau ma fanau a fanau, o a tatou tagata sailiili aupito sili ona taua ia.
O galuega o talafaasolopito o aiga e sili ona taua o le a tatou faia, o le a faia lea i totonu o o tatou lava aiga. O le saunia faaleagaga lea o a tatou fanau i le tupulaga faia’e, e ala i lo latou usitai, o le a mautinoa ai lo latou fai ma talita i le puipuiga e faavavau ma le faaauauina o tupulaga fai mai i o tatou aiga.
O le laveaiga aupito sili, o le faatoagaina aupito maoae, o le a faia lea i totonu o o tatou lava aiga. Afai o i ai se tasi o lou aiga o loo feseseta’i i se ala ese, o oe o se tagata e laveaia, o loo punouai i le taumafaiga sili o le laveai a le Ekalesia ua i ai nei. Ou te molimau atu mai i o’u lava aafiaga patino: E leai se toilalo seiloga ua e fiu. E le o vave tele pe tuai ona amata. ‘Aua le popole i mea ua tuanai. Piki i luga le telefoni ma valaau atu. Tusi se faamatalaga. Fai sau asiasiga. Faalautele le valaaulia e o mai i le aiga. Aua e te fefe pe matamuli. O lau tama, o le atalii lea o le Tama Faalelagi. O oe e faataunuuina Lana galuega. Ua ia folafola mai o le a ia tuufaatasia Lana fanau, ma o loo i ai o Ia faatasi ma oe.
O le faatuatua aupito maoae o le a tatou maua o le a i ai lea i totonu o o tatou aiga a o tatou tumau malosi i tofotofoga ma faaosoosoga o le avea ma matua. Mo se vaega laiti o tina, na saunoa lata mai nei Peresitene Monson, “O nisi taimi e vave la tatou faamasino atu i aafiaga o o tatou manumalo ma o tatou toilalo.” Se’i ou faaopoopo atu, aua e te vaai i tofotofoga o le asō faapea e faavavau. E faataunuuina e le Tama Faalelagi lana galuega i se taunuuga mamao. “Aua o i ai mea e tele o loo taofia mo aso lumanai,” na saunoa ai Iosefa Samita. “O lea, … se’i tatou faia ma le fiafia mea uma o loo i ai lo tatou mana; ona mafai ai lea i tatou ona tumau lava ma le mautinoa mausali, e vaavaai atu i le faaolataga a le Atua, ma le faaalia o lona aao” (MFF 123:15, 17).
I lenei Aso Sa o le Eseta, ou te faamoemoe o le a tatou maua le avanoa e tuuina atu ai a tatou molimau ua tatou iloa o loo soifua le Atua ma o Iesu o le Keriso. Ou te faamoemoe o le a tuuina atu a tatou molimau ina ia iloa e a tatou fanau lea mea o loo i ai o tatou loto ma tatou te alolofa ia i latou. O le alofa sili ma aoaoga sili e tatau ona faaalia i totonu o o tatou lava aiga.
Ou te talosagaina faamanuiaga a le Alii ina ia i ai i matua ma le autalavou o e o loo tausia i aiga faamaoni, ina ia latou malamalama i le olioli o le i ai i totonu o se aiga ma se auaiga e mafai ona alofaina ai, taitaiina ai, ma taialaina ai i latou. Ou te tatalo ina ia tatou maua ni aiga e faavavau ma ia faatasia e faavavau i le afioaga o le Atua le Tama ma Lona Alo o Iesu Keriso.
Ou te tuuina atu la’u molimau faapitoa o loo soifua Iesu Keriso. O Ia o le leoleo mamoe o le agaga na se, o le laveai o se agaga ua tuulafoaiina, o le taulasea i se loto mafatia, o le faamoemoega o tagata uma. Faatasi ai ma Ia o lo tatou Matai, i na tatou faataunuu ia lo tatou tiute i le Atua, ma lo tatou faatuatua ia te Ia ma Lona alofa e faavavau mo i tatou taitoatasi, ou te tatalo atu ai i le suafa o Iesu Keriso, amene.