O Lou Ola Fiafia Ai Lea
Ua ofoina atu e le Tama Faalelagi ia te outou le meaalofa aupito silisili o meaalofa uma—o le ola e faavavau—ma le avanoa ma le faamanuiaga e le i’u o lou lava “ola fiafia ai lea.”
O’u tuafafine talavou pele i le salafa o le lalolagi, ou te faafetai lava ma ua lagona foi le faamamaluina i lo tatou mafuta ai i le aso. E alolofa Peresitene Thomas S. Monson ma taitai uma o le Ekalesia ia te outou; matou te tatalo mo outou, ma ua matou olioli i lo outou faamaoni.
I le aluga o tausaga sa ou faalogo ai i le tele o gagana matagofie—e mananaia uma lava ma ofoofogia; e tofu le gagana ma si ona uiga e tauagafau ai. Peitai, po o le a lava le eseesega e i ai nei gagana, e tele taimi e i ai mea e tutusa ai. Mo se faataitaiga, i le tele o gagana e i ai se fasifuaitau e faamaneta ma e tumu i folafolaga atonu e pei lava o nisi faaupuga i le lalolagi. O lena fasifuaitau o le: “I aso lava la ua leva.”
Pe le matagofie ea na upu e amata ai se tala? “I aso lava la ua leva” e folafola mai ai se mea: o se talafatu i se malaga, o se tala i purinisese ma ni perenise. E ono aofia ai ni talafatu o le lototoa, faamoemoe, ma le alofa e le uma. I le tele o nei tala, e faatoilalo e le agalelei le limavale, e faatoilalo foi e le lelei le amioleaga. Ae atonu o le tele lava, ou te fiafia lava i ai pe a susue atu le itulau mulimuli ae tau atu le vaai i laina faaiu, ma vaaia ai upu faamama’i “Ona latou ola fiafia ai lea.”
Pe le o le mea ea lena tatou te mananao uma lava i ai: ia avea ma alii ma tamaitai totoa o o tatou lava talaaga, ia manumalo i puapuaga, ia iloa le matagofie o le olaga, ma, i le faaiuga, ona ola fiafia ai lea?
O le asō, ou te fia manao e tata’i o outou manatu i se mea e taua tele, e matua tulaga ese lava. I le itulau muamua o la outou tusi o le Alualu i Luma o le Tagata Lava Ia o Tamaitai Talavou tou te maua ai upu nei: “O oe o se afafine faapelepele o le Tama Faalelagi, ua saunia e te sau i le lalolagi i lenei taimi faapitoa mo se faamoemoega paia ma le mamalu ”1
Tuafafine, e moni na upu! E le o ni upu fatu i se tala faafagogo! Pe le ofoofogia ea le iloa e silafia e lo tatou Tama Faalelagi faavavau oe, e faafofoga mai ia te oe, e leoleo ia te oe, ma alofa ia te oe i se alofa e le uma? O le mea moni, o le tele naua o Lona alofa mo oe ua Ia aumaia ai lenei olaga i le lalolagi o se meaalofa taua o le “i aso a la ua leva,” faauma ane i lau lava tala moni o se malaga, tofotofoga, ma avanoa mo mea silisili, tamalii, lototoa, ma le alofa. Ae o le mea aupito ofoofogia o mea uma, ua Ia ofoina mai se meaalofa e le mafai e tupe ona faatau ma e le oo foi i ai le malamalama. Ua ofoina atu e le Tama Faalelagi ia te outou le meaalofa aupito silisili o meaalofa uma—o le ola e faavavau—ma le avanoa ma le faamanuiaga e le i’u o lou lava “ola fiafia ai lea.”
Ae o lena ituaiga o faamanuiaga e le aumaia fua e aunoa ma se tau. E le na o na aumaia ona ua e manao i ai. E oo mai i le na o lou malamalama i lou faasinomaga ma lou tagata e tatau ona avea ai oe ina ia mafai ai ona e agavaa mo lena meaalofa.
O Tofotofoga o Se Vaega o le Faigamalaga
Mo sina minute, toe mafaufau i lau tala faafagogo e te fiafia lava i ai. I lena tala, o le tagata autu atonu o se purinisese po o se tagata mativa; atonu o se teine si’usi’u i’a po o se teine faatau susu, se faipule po o se auauna. O le a e maua ai se mea e tasi e tutusa uma ai lava: e tatau lava ona latou manumalo i puapuaga.
Sa tatau foi ia Cinderella ona onosaia lona tina fai ma ona uso fai amioleaga. Sa tuu poloaiina o ia e pologa i le tele o itula e tavini ai ma tauemuina.
I le tala i le “Beauty and the Beast,” na faapologaina ai Belle i se meaola taufaafefe ina ia laveaiina ai lona tamā. Sa ia ositaulagaina lona aiga ma lona auaiga, o mea uma sa pele ia te ia, ina ia nofo ai mo le tele o masina i le fale o le meaola.
I le tala ia “Rumpelstiltskin,” na folafola atu e se ōlo meaai e faapea e mafai e lona afafine ona viliina vaomago e avea ma auro. Sa vave loa ona aami le teine e le tupu ma lokaina i se potu faatasi ai ma se faaputuga tele o vaomago ma se uili taavili. I se taimi mulimuli ane o le tala, sa feagai o ia ma faigata e ono aveesea ai lana ulumatua, sei vagana ai ua mafai ona ia mateina le igoa o le meaola faamaneta lea sa fesoasoani ia te ia i lenei galuega matautia.
I nei tala taitasi, sa tatau ia Cinderella, Belle, ma le afafine o le ōlo meaai ona oo i le faanoanoa ma tofotofoga a’o le’i mafai ona taunuu i lo latou “ola fiafia ai lea.” Mafaufau i ai. Pe na i ai ea se tagata e le’i tatau ona ui atu i lona lava vanu pogisa o faaosoosoga, tofotofoga, ma le faanoanoa?
E fe’oma’i i le va o lo latou “i aso a la ua leva,” ma le “ola fiafia ai lea,” sa latou oo uma i puapuaga maoae. E tatau i se a ona oo tagata uma i le faanoanoa ma mafatiaga? Aisea e le mafai ai ona na ona tatou ola i le fiafia ma le filemu, i aso taitasi ma faatumulia i mea matagofie, olioli, ma le alofa?
Ua ta’u mai e le mau ia i tatou, “e tatau ona i ai le faafeagai i mea uma”2 aua a leai e le mafai ona tatou iloatino le suamalie mai le oona. Faamata e lagona e le tagata tamoe i le malafoni le manumalo o le faamae’aina o le tautuuga pe ana le lagonaina e ia le tiga o itula e uunai atu ai a ua uma lona malosi? Faamata e lagona e le ta piano le olioli o le iloa ta se musika lavelave e aunoa ma itula e sogasoga ai i le aoaoina?
I tala e faapei foi o le olaga, e aoao mai e puapuaga ia i tatou mea semanu tatou te le iloaina. E fesoasoani puapuaga e atiina ae ai se uiga loloto o le tagata lea e leai se isi auala e maua ai. Ua tuu i tatou e lo tatou Tama Faalelagi i se lalolagi e tumu i luitau ma tofotofoga ina ia mafai ai e i tatou, e ala i mea faafeagai, ona aoaoina le poto, atili malolosi ai, ma maua le olioli.
Se i ou faamatalaina atu se aafiaga faaletagata. Sa sefulu ma ona tupu o’u tausaga ina ua auai lo matou aiga i le ekalesia i Frankfurt, i Siamani.
I se tasi Aso Sa, sa aumaia ai e faifeautalai se aiga fou i la matou sauniga, ma ou te le’i vaai muamua i ai. O se tina ma lana fanau teine aulelei e toalua. Sa ou manatu, ua matuai manaia tele le galuega ua faia e nei faifeautalai.
Sa faapito lo’u matauina o le tasi o lana fanau teine, e uliuli manaia lona lauulu ma ona mata eena lapopoa. O lona igoa o Harriet, ma sa ou manatu ua ou alofa i ai i le taimi muamua sa faatoa ou vaai ai ia te ia. Ae paga lea, sa foliga mai e le’i faapea lagona o le tamaitai talavou lalelei ia te au. Sa toatele alii talavou sa fia uo ia te ia, ma sa amata ona ou tau mafaufau pe mata e i ai se taimi e ese ai sana vaai ia te au nai lo le na o se uo. Peitai, ou te lei faavaivai ai. Sa ou mafaufau i ni auala ou te i ai i le mea la e i ai o ia. A ou tufaina le faamanatuga, ou te faamautinoaina lava e sa’o le mea la ou te tu ai ina ia ou tufa atu ai ia te ia le faamanatuga.
A fai ni a matou gaoioiga faapitoa i le lotu, ou te alu i la’u uila i le fale o Harriet ma faatatagi le logo o le latou faitotoa. E masani ona tatala e le tina o Harriet le faitotoa. Tasi o le mea, na te tatalaina le faamalama o le umukuka o lo latou fale sa mautotogi ai i le fogafale lona fa, ma fesili mai po o le a le mea ou te manao ai. Ona ou faanoi lea i ai pe manao ia Harriet ma te tietie i le falesa i la’u uila. Fai mai le tina o Harriet, “E leai, e alu atu mulimuli, ae o le a ou fiafia lava ta te tietie i le falesa.” E le o le mea tonu lea sa i lo’u mafaufau, ae e mafai faapefea ona ou teena?
Ia, ona ma tietie lea i le falesa. Ou te fia ta’u atu o le matua manaia o la’u uila. Sa nofo le tina o Harriet i luga o le ave o le uila i o’u luma, ma sa ou taumafai e avea o se ave uila e aupito sili ona mataalia i luga o le ala gaoa.
Na mavae atu taimi. E ui ina sa toatele isi alii talavou na vaai i ai Harriet, sa foliga mai e leai se au i luma o a’u taumafaiga mo ia.
Pe na ou le fiafia? Ioe.
Pe na ou toilalo? Oi e leai!
O le mea moni, pe a toe tilotilo i tua, ua ou iloa ai e leai a se mea e leaga ai le fegalegaleai lelei ma le tina o le teine ua e moemiti i ai.
I tausaga mulimuli ane, ina ua uma la’u a’oga e avea ma pailate tau i le fuavaa o le ea, sa ou iloa ai se vavega faaonaponei i le tali a Harriet i lo’u aumoe pea i ai. I se tasi aso na ia fai mai ai, “Dieter, ua e matua faatagata matua lava talu mai nai tausaga ua mavae atu.”
Sa vavave la’u gaioi ina ua mavae lena taimi, ma i totonu o nai masina sa ou faaipoipo atu ai loa i le tamaitai sa ou alofa i ai talu mai lava le taimi muamua na ou vaai ai ia te ia. E le’i faigofie le faagasologa—sa i ai taimi o mafatiaga ma le faanoanoa—peitai na iu lava ina atoatoa lo’u fiafia, ma o loo atoatoa lava, ma ua faateleina.
O’u tuafafine talavou pele, e tatau ona outou iloa o le a outou feagai ma o outou lava mafatiaga. E leai se isi e le oo i ai. O le a outou mafatia, tofotofoina outou, ma o le a faia foi ni mea sese. O le a e aoaoina mo oe lava, mea sa aoaoina e tamaitai totoa uma lava: o le faatoilaloina o luitau e tuputupu a’e ai ma maua le malosi.
O lau tali atu i mafatiaga, ae le o le mafatiaga lava ia, e fuafua ai pe faapefea ona atiina ae le talaaga o lou olaga.
O loo i ai nisi o outou, e ui lava ina talavou, a ua feagai ma le fuataga atoa o le faanoanoa ma le faavauvau. Ua tumu lo’u loto i le tigaalofa ma le alofa mo outou. E matua pele outou i le Ekalesia. E matua pele oe i lou Tama Faalelagi. Atonu e foliga mai ua tuulafoaiina oe, ae o loo vaavaaia oe e agelu. E ui atonu e te lagonaina faapea e leai se tasi e mafai ona malamalama i le loloto o lou faanoanoa, ae e malamalama lo tatou Faaola o Iesu Keriso. Na puapuagatia o Ia e sili atu i lo le mea e mafai ona oo i ai lo tatou malamalama, ma sa Ia faia mo i tatou; sa Ia faia mo oe. E le tuulafoaiina lava oe.
Afai e te lagona ua ogaoga tele lau avega ua le mafai ona tauave, ia sii a’e lou loto i lou Tama Faalelagi, ona Ia lagolagoina lea o oe ma faamanuia. E fai atu o Ia ia te oe, e faapei ona sa Ia fai atu ai ia Iosefa Samita, “O [lou] tiga ma [ou] puapuaga o le a na o sina ituaso itiiti lava; ona faaeaina lea o [oe] e le Atua i le mea maualuga, pe afai e te onosai.”3
O le onosai i puapuaga e le na o le pau lea o le mea e tatau ona e faia, ia e maua ai se olaga fiafia. Se’i ou toe fai atu, o lau tali atu i puapuaga ma tofotofoga o se itu taua tele lea i lou taunuu atu po o le le taunuu atu foi i lou lava ola fiafia ai lea.
Ia Tumau Faamaoni i le Mea ua E Iloa e Sa’o
Tuafafine, tuafafine talavou, tuafafine talavou pele, ia outou tumau faamaoni i mea ua outou iloa e sa’o. O soo se mea lava e te autilo i ai i le taimi lenei, o le a e vaaia ai folafolaga o le fiafia. O faasalalauga i mekasini e folafola mai ai le faamalieina atoatoa pe a tau lava ina e faatauina se ofu, fagu tofu ulu, po o mea teu foliga. Ua i ai foi oloa gaosi o faasalalauga ua faatosinaina ai i latou e opoina mea faatiapolo, po o e fiafia i faatosinaga faalelalolagi. E tele taimi, o tagata foi lava nei o loo faaalia e avea ma faataitaiga o le manuia ma faataunuuga.
I se lalolagi ua avea ai mea leaga ma mea lelei a’o mea lelei ma mea leaga, o nisi taimi e faigata ai ona iloa le mea moni. I se isi itu, e toetoe lava a pei o le mea matautia na oo i ai Little Red Riding Hood—pe afai e te le o mautinoa lelei po o le mea lea e te vaai atu i ai, o se tinamatua faapelepele, po o se luko matautia.
E tele tausaga sa ou faaaluina i totonu o le potu e ave ai se vaalele. O la’u galuega o le aveina atu lea ma le saogalemu o se vaalele tele i le mea sa matou mananao e taunuu i ai. Sa ou iloaina ma le mautinoa, afai ou te manao e malaga atu mai Niu Ioka i Roma, e tatau ona ou lele agai i sasae. Afai e fai mai se tasi ia te au e tatau ona ou lele i saute, sa ou iloa e leai se moni i na upu. Ou te le talitonuina lava i latou, aua ua ou iloaina e a’u lava ia. Po o le a le tele o se faatauanau, faatogafalea, po o faamata’u, e le mafai lava ona faatalitonuina au faapea o le lele i saute o le a ou taunuu ai i lo’u taunuuga aua sa ou iloaina lava.
O loo taufai saili uma mo le fiafia, ma o loo tatou taumafai uma e saili lo tatou lava “ola fiafia ai lea.” O le upumoni o le: Ua silafia e le Atua le ala e oo atu ai iina! Ma ua uma ona ia foafoaina se faafanua mo oe; Na te silafia le ala. O Ia o lou Tama Faalelagi alofa o lē o loo sailia lou lelei, lou fiafia. E finagalo o Ia ina ia e taunuu i lou taunuuga faavavau. Ua i ai le faafanua mo tagata uma. O loo aumaia ai faatonuga maioio o mea e tatau ona fai ma po o fea e o i ai, mo tagata uma o loo taumafai e o atu ia Keriso ma “tutu e avea ma molimau i le Atua i taimi uma ma mea uma, ma i nofoaga uma.”4 Na pau lava le mea e tatau ona e fai. Ia lava lou faatuatuaina o lou Tama Faalelagi e mulimuli ai i Lana fuafuaga.
Ae ui o lea, e le o tagata uma o le a mulimuli i le faafanua. Atonu latou te tilotilo i ai. Atonu latou te mafaufau o se mea lelei, pe manatu foi e moni. Ae peitai, latou te le mulimuli i le faasinoala paia. E toatele e talitonu faapea, soo se auala lava o le a latou tau atu ai i le “ola fiafia ai lea.” Atonu e i ai nisi o le a feita pe a taumafai nisi ua iloa le ala e fesoasoani ma ta’u atu ia i latou. Latou te manatu o na fautuaga ua le toe aoga, ua le toe taulia, ua le toe talafeauga ma le olaga faaonaponei.
Tuafafine, e sese o latou manatu.
O Le Talalelei o le Ala lea i le Ola Fiafia Ai Lea
Ou te malamalama e i ai taimi, e i ai nisi e ono mafaufau pe aisea latou te o ai i sauniga Lotu, pe faapea foi pe aisea lava e taua ai le faitau e le aunoa o tusitusiga paia, po o le tatalo i lo tatou Tama Faalelagi i aso taitasi. O la’u tali lenei: Tou te faia nei mea aua o ni vaega o le ala a le Atua mo outou. Ma o lena ala o le a molimoli atu ai oe i lou lava taunuuga o le “ola fiafia ai lea”.
O le “ola fiafia ai lea” e le o se mea e na o talafatu e maua ai. E mafai ona e maua! O loo avanoa mo oe! Peitai, e tatau ona e mulimuli i le faafanua a le Tama Faalelagi.
Tuafafine, faamolemole opomau i le talalelei a Iesu Keriso! Aoao ia alofa i lou Tama Faalelagi ma lou loto atoa, malosi atoa, ma le mafaufau atoa. Faatumu o outou agaga i le mama, ma ia alolofa i le lelei. Ia taumafai i taimi uma e faaalia mea silisili o ia te outou ma isi.
Aoao e talia ma faatino tulaga faatauaina o Tamaitai Talavou. Ola i tulaga faatonuina o loo i le Mo Le Malosi o le Autalavou. O nei tulaga faatauaina e taialaina ai ma faasino oe i lou lava ola fiafia ai lea. O le ola ai i nei tulaga faatauaina, o le a saunia ai outou e osia feagaiga paia i le malumalu ma faatuina a outou lava talatuu o le lelei i o outou olaga taitoatasi. “Tutu … i nofoaga paia, ma ia le maluelue lava”5 tusa lava po o a tofotofoga po o faigata. Ou te folafola atu ia te outou o le a maua e augatupulaga i le lumanai le agaga faafetai mo oe ma faamanu i lou igoa ona o lou lototoa ma le faamaoni i lenei taimi taua o lou olaga.
O’u tuafafine talavou pele—o outou o loo tutu atu mo le upumoni ma le amiotonu, outou o loo saili mo le lelei, outou ua ulu ifo i le vai o le papatisoga ma savavali i ala o le Alii—ua folafola mai e lo tatou Tama oi le Lagi o le a “sii ae apaau e pei o aeto; latou te femoei ae le vaivai.”6 O le a “le faaseseina” outou.”7 O le a faamanuiaina ma faatamaoaigaina outou e le Atua.8 “O le a le manumalo ai faitotoa o seoli ia te outou; … [ma] e tafieseina e le Alii le Atua le malosi o le pogisa mai o outou luma, ma luluina le lagi mo lo outou lelei, atoa ma le mamalu o lona suafa.”9
Tuafafine, matou te alolofa ia te outou. Matou te tatalo mo outou. Ia outou lototetele ma lotototoa. O outou moni lava o ni afafine agaga tamalii o le Atua Silisiliese. O outou o purinisese, ua faamoemoe e avea ma masiofo. O lena ua amata o outou lava talaaga ofoofogia. O lo outou “o aso lava la ua leva” o le taimi lenei.
I le avea ai o se Aposetolo a le Alii o Iesu Keriso, ou te tuuina atu a’u faamanuiaga ma tuuina atu ia te outou se folafolaga afai tou te talia ma ola ai i tulaga faatauaina ma mataupu faavae o le talalelei toefuataiina a Iesu Keriso, o le “a saunia [outou] e faamalolosia le aiga ma le auaiga, ma osia ma tausia feagaiga paia i le malumalu, ma olioli ai i faamanuiaga o le faaeaga.”10 Ma o le a oo mai le aso, pe a e sueina le itulau faaiu o lou lava talaaga faamama’i, o le a e faitauina ai ma iloa le faataunuuina o na upu faamanuia ma le ofoofogia: “Ona latou ola fiafia ai lea.” Ou te molimau atu ai i nei mea i le suafa paia o Iesu Keriso, amene.