Atiina Ae o Faamasinoga Lelei ae Le o le Faamasinoina o Isi
O le faamasinoga lelei e manaomia e le gata ia malamalama ai i tagata, ae faapena foi i filifiliga e taitaiina atu ai i tatou po o le taitaieseina foi mai le Tama Faalelagi.
O loo tatou ola i se lalolagi o loo i ai le tele o tulaga e manaomia ai i tatou e faia faamasinoga na e masani ona faigata. Ae peitai, na tuuina mai e le Faaola le poloaiga e “aua le faamasino atu”1 i o tatou uso a tagata. E faapefea ona tatou lē faamasino atu ma faia pea faamasinoga lelei i se lalolagi e tumu i le taufaasese ma le pi’opi’o? E tatau ona tatou faamasino lelei pe a faia ni filifiliga taua i vaega taitasi o o tatou olaga, e pei o le filifiliina o uo, sailia o se soa faavavau, po o le filifilia o se galuega o le a mafai ai ona tatou tausia o tatou aiga ma auauna atu i le Alii. E ui lava na fetalai mai le Faaola e aua le faamasinoina isi, ae ua faamoemoe mai o Ia ia tatou faaaogaina le faamasinoga e sili ona lelei.
Atonu e masani ona tatou faia faavave ni faamasinoga o tagata, na e mafai ona suia ai pe faaleagaina ai lo tatou va ma i latou. E masani ona faia faamasinoga sese ona o le le lava o faamatalaga, po o ua tatou le iloa atu foi o tua atu o mea o loo i o tatou luma tonu lava.
Ina ia faamalamalamaina, e faamatalaina soo le tala i le taimi na asiasi atu ai Iesu i le aiga o Maria ma Mareta, sa nonofo i Petania ma lo la tuagane o Lasalo. O se nofoaga e talia aloaia ai le Matai, e mafai ona Ia malolo ai ma olioli i le i ai i se siosiomaga o se aiga amiotonu. I se tasi o Ana asiasiga, sa pisi Mareta i le sauniaina o se taumafataga ae na filifili Maria e nofo i tafatafa o aao o le Matai ma faalogo i Lana fetalaiga.
“A ua tiga Mareta i le fatuaiga, ua tu mai, ma faapea mai, Le Alii e, e te le manatu mai ea, ina ua tuu mai e lo’u uso ia te au e sauni toatasi? …
“A ua tali atu Iesu, ua faapea atu ia te ia, Mareta e, Mareta e, ua e popole, ma ua pupu lou loto i mea e tele:
“Ao le mea lava e tasi e ao ina ia maua: ua filifilia foi e Maria lea mea lelei, e le aveeseina ia te ia.”2
Ua tele lesona o Aso Sa e aoaoina, ua faaaoga ai lenei tala, ua tuuina ai Mareta i se tulaga maualalo e tusa ai ma lona faatuatua. Ae peitai e i ai se isi tala i lenei tina maoae, o Mareta, o loo tuuina mai ai ia i tatou se vaaiga loloto o lona malamalama ma lana molimau. Na tupu ina ua taunuu atu le Faaola e faatuina mai lona tuagane, o Lasalo, mai le oti. I le vaega lenei, o Mareta na alu atu ia Iesu “i le taimi lava na faalogo ai” ua maliu mai o Ia. Ina ua ia feiloai atu ia te Ia, na ia fai atu ua ia iloa o “mea uma [Na te] faatoga atu ai i le Atua, e foaiina mai e le Atua ia te [Ia].”
Ona faasoa atu lea e Keriso ia Mareta le aoaoga faavae taua o le toetu ma faapea atu,
“O au nei o le toetu, ma le ola, o le faatuatua mai ia te au, e ui lava ina oti, a e ola lava ia:
“O tagata ola uma o e faatuatua mai ia te au, e le oti lava e oo i le faavavau. Po ua e talitonu mai ea i lena mea?”
Ona tali atu lea o ia ma lana molimau malosi: “Ioe, le Alii e: ua ou talitonu lava o oe le Keriso le Alo o le Atua, o le maliu mai i le lalolagi.”3
Ua faafia ona faamasino sese Mareta o se tagata e sili lona popole i le tausi aiga nai lo le Agaga? Ae ui i lea, o lana molimau i le tofotofoga i le maliu o lona tuagane e faaalia manino mai ai le loloto o lona malamalama ma le faatuatua.
E toatele tamaitai o le Ekalesia ua faalogo i le tala muamua ma taumanatunatu ai po o ia o se Maria po o se Mareta, ae peitai o loo taoto le mea moni i totonu o le iloaina o le tagata atoa ma i le faaaogaina o le faamasinoga lelei. O le iloaina atili e uiga ia Mareta, ua tatou iloa ai o ia lava o se tagata e loloto lona faaleagaga, o le e i ai se molimau toa ma le le fefe i le misiona a le Faaola ma Lona mana paia e pulea ai le ola. O le faamasinoina sese o Mareta atonu e le mafai ai ona tatou iloa le natura moni o lenei tamaitai maoae.
I se tulaga patino, i le avea ai ma se fomai talavou sa ou aoaoina ai se lesona e uiga i le faia o faamasinoga faavavave. Ao ou galue i se sifi i le tulua o po i se matagaluega o faalavelave faafuasei, na oo mai se tama talavou ma lona toalua ona sa afaina le tina i se tiga tuga. Mai o la lavalava ma le le tumama, sa faigofie ona iloa atu o o la olaga e fai si faigata. O lona lauulu sa ve’uve’ua ma uumi naua. E lei tataina o la lavalava mo se taimi, ma na iloa atu i o laua uma foliga le taunuuga o se olaga faigata.
Ina ua maea le suesuega, sa ou nofo i lalo faatasi ma ia e faamalamalama le faafitauli ma talanoaina le togafitiga. Sa tilotilo mai lenei tamaloa ia te au ma se vaaiga o le alofa loloto lena e seasea ona vaaia ma fesili mai o se toalua e tumu i le alofa ma le agalelei, “Fomai, pe o le a manuia ea si ou toalua pele?” I lena taimi, na ou lagonaina ai le molimau mai o le Agaga o ia o se atalii o le Atua ma na ou vaaia i ona mata le faamaoniga a le Faaola. Sa faaalia moni lava e lenei tama le alofa mo le tasi ma na ou faamasinoina sese o ia. O se lesona lena ou te manatuaina pea lava.
O le faamasinoga lelei e manaomia e le gata ia malamalama ai i tagata, ae faapena foi i filifiliga e masani lava ona taitaiina atu ai i tatou po o le taitaieseina foi mai le Tama Faalelagi. I lou toe tepa i tua i lou lava ia olaga, e mafai ona ou vaai i le tele o taimi na i ai se suiga laitiiti o le olaga ona o faamasinoga le lelei, semanu e taitaiina mamao ai au mai le mea e finagalo le Alii e tatau ona ou i ai—filifiliga e pei o le faia o se aiga a’o aoga, toaga i vaega uma o le talalelei, totogiina o le sefuluai ma taulaga ao utiuti lava le tupe maua, ma le taliaina o valaauga i taimi faigata, lena na fesoasoani ou te malamalama atili ai e uiga i le ositaulaga. E tele faamanuiaga i le olaga ua misia ona ua faaaogaina faamasinoga faalelalolagi i tulaga na e manaomia ai le filifiliga faaleagaga moni lava.
E tele uiga faaletagata o e ua atiina ae faamasinoga lelei. O le a ou ofoina atu ni taiala se fa mo le atiina ae o na faamasinoga i le faia o filifiliga taua.
Muamua, tuu ou oe lava tulaga faatauaina patino ia talafeagai ma le talalelei a Iesu Keriso. E le mafai ona avea se tagata ma se faamasino lelei e aunoa ma le talalelei a Iesu Keriso e avea ma se punaoa. O le talalelei o loo i ai se faamaumauga umi ma le manuia i le taialaina o tagata i le fiafia. O nisi o manatu o le lalolagi e tuua ai tagata e feseai e taumafai e faamatalaina o latou lava tulaga faatauaina. Ona o lenei mea, tatou te faalogoina fuaitau e pei o le “o se olaga mama fou.” O lenei fuaitau e taufaasese! O tulaga faatauaina o le olaga mama e faavavau ma e lei suia; e le mafai foi ona tatou taumafai e sailia sona faaliliuga fou. Mo le autalavou o nei tulaga faatauaina o loo tusia i le tamai tusi “Mo le Malosi o le Autalavou.” O nei tulaga faatauaina e talafeagai lelei lava ma le talalelei a Iesu Keriso ma e faamoemoe e faaauauina i le olaga matua. Atonu e lelei mo i tatou ua matutua ona suesue ma faaaoga lenei tamai tusi i o tatou olaga.
Lua, faalogo i savali a perofeta soifua. E fia ni faamasinoga le lelei i mea tautupe se manu e aloese mai ai pe ana faapea tatou te faalogo i tausaga o fautuaga na tuuina mai e o tatou perofeta e uiga i le aloese mai taumatematega matautia ma mulimuli i le faasoaina ma le faaeteete o tupe ina ia aloese mai le faatau aitalafu? E fia ni faaipoipoga se manu e faasaoina i le faaaogaina o le faamasinoga lelei i le aloese mai faasalalauga na e taitaiina atu i le vaisu o ata leaga ma le loto tiga? O konafesi aoao taitasi ma le mekasini a le Ekalesia e maua ai fautuaga mai perofeta na, afai e faaaogaina, o le a taitaia i tatou i le faamasinoga lelei. E leai sa tatou alofaga pe a tatou le amanaiaina.
Tolu, faatupuina faatasi ma le Agaga Paia se faia o le faalogo. E tuuina mai ia i tatou le meaalofa o le Agaga Paia pe a maea le papatisoga, ae masani ona tatou tuua lenei meaalofa i luga o le fata, ae galo ai o le a Ia fesoasoani ia i tatou i faamasinoga sili ona taua i o tatou olaga. Ua tuuina mai e le Alii lenei meaalofa, ma le silafia o le a tatou feagai ma filifiliga faigata i le olaga. O le faalogo atu i lenei leo e matua taua tele i le atiinaae o le faamasinoga lelei. O se faia ma le faalogo e masani ona manaomia ai se siosiomaga filemu e mafai ai ona tatou faaaluina le taimi e manatunatu loloto ai ma faalogo i le leo itiiti, ma le filemu. O lenei siosiomaga filemu e tutusa lava i fafo ma totonu. O le mea lea, e sili atu nai lo le tapeina o le musika a le lalolagi po o le pa mai o isi faasalalauga; o le tapeina foi o le leo o agasala o totonu lena o tatou agaga. O lenei mea o le a tatalaina le fesootaiga ma le Agaga, lena e matua manaomia lava.
Na fetalai mai Keriso, “Ou te tuuina atu ia te outou le manuia, o lou manuia ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau.”4 O le filemu e sau mai le faalogo i le Agaga Paia e aveesea le fefe i le faia o se faamasinoga le lelei i le olaga.
Fa, tausi poloaiga. O le naunau e tausi poloaiga a le Atua e matala ai ia i tatou le tele o faamanuiaga ua folafolaina mai. O le Tusi a Mamona, e faaopoopo atu i le avea ma se isi molimau ia Iesu Keriso, o se tusi e uiga i taunuuga o le tausia ma le le tausia o poloaiga. Na fetalai atu le Alii ia Nifae i le mataupu e lua o lana tusi muamua: “Afai foi e te tausia au poloaiga, e te manuia… .”5
O lenei folafolaga na toe tuuina mai e toetoe lava o perofeta tautaua uma i le Tusi a Mamona. O le afe o tausaga o le talafaasolopito ua faamaumauina o loo tuuina mai ai molimau o nei mea e moni. Ma o le savali lava lea e tasi e aoga ia i tatou i aso nei. O le faamasinoga lelei e sili ona aoaoina ma faaaogaina i totonu o tuaoi ua faatulagaina e le Alii i le tuuina mai lea ia i tatou o poloaiga.
Ou te molimau atu a o tatou feagai ma filifiliga faigata ma mulimulitai i nei taiala o le a tatou iloa ai fai ni faamasinoga e sili atu. I le suafa o Iesu Keriso, amene.