Elder Juan A. Uceda

O Le Fitugafulu

Ina ua amata ona faauo atu Elder Juan Alberto Uceda Andrade ia Maria Isabel Bendezú—o le tamaitai lava lea o le a iu ina ia faaipoipo atu i ai—sa ia iloa o ia o se tagata faapitoa. Sa liliu uma i laua i le Ekalesia a o talavou, ma na faamisiona uma i la’ua i lo laua lava atunuu moni o, Peru.

Ae peitai o le naunautaiga o Sister Uceda e faaipoipo atu i le malumalu lea na faia ai se eseesega. I lena taimi, o le malumalu pito i lata ane na i São Paulo, Pasila. “E fitu aso e malaga ai faatoa taunuu iina, e faaaoga ai tulaga tau femalagaaiga uma o loo maua,” na faamatala mai e Elder Uceda. “Sa ma o i le pasi, taavale, vaa, taavale solofanua, nofoaafi, loli, ma na oo lava i le vaalele. Ina ua ma taunuu i le malumalu, sa aapa atu o ma lima e pa’i i puipui tau lava ina ia mautinoa ai, ua le na o se miti. Sa avea lea o se aafiaga taua tele mo i ma’ua uma.”

Sa faaipoipo le ulugalii i le Malumalu o São Paulo Pasila i le aso 13 o Aperila, 1979. O i la’ua o ni matua o se fanau e toalima.

Sa soifua mai Elder Uceda ia Iulai 1953 i Lima, Peru, ia Juan Jose Uceda Perez ma Ines Andrade Uceda. Ina ua uma ona liliu mai i le Ekalesia i le 1972, sa aoaoina ia Elder Uceda i le matata o le suetusi ma le va i fafo i le Inisitituti a Jose Carlos Mariátegui i Lima. Sa ia aoao foi i mataupu tau pulega faapisinisi i le Inisitituti a Centro Andino de G.E. ma na maua lona faailoga o le tagata malaga o le va i fafo mai le Iunivesite o San Luis Gonzaga.

Sa galue Elder Uceda i le Matagaluega a Aoga a le Ekalesia o se faatonusili o le eria mo Peru ma Bolivia. I le 2003 sa siitia atu ai o ia mai Peru i New Jersey, ISA, ina ia fesoasoani i lona tama e atiina ae se pisinisi o le aoaoina o mea tau aoaoga ma le gagana.

E le gata i lana auaunaga faafaifeutalai, sa avea foi Elder Uceda o se fautua maualuga, epikopo, peresitene o le siteki, peresitene o le Misiona a Lima Peru i Matu, ma se Fitugafulu Eria. Ua avea nei o ia o se tasi o le Korama Muamua a Fitugafulu.

“O loo ia te au se molimau malosi o le mana o faaaliga mo le tagata lava ia mai le Agaga Paia,” na saunoa i ai Elder Uceda. “O lena molimau e faaauau pea ona faamautinoa mai e ala i faamanuiaga e oo mai i le usiusitai.”