O Le Perisitua Arona Maoae
O loo matuai manaomia vave lava oe e faataunuu lou tiute i le Atua. Ou te matuai talitonu o le a e faataunuuina.
Ua faamamaluina au e lauga atu i alii talavou ofoofogia o le Ekalesia. Ua faamanuiaina a’u i le feiloai atu i le toatele o outou i le salafa o le lalolagi. Ua pesi lo outou lotonaunau.
Tou te taulimaina o outou luitau i le malosi ma le lototele maoae. E faailoa atu lo’u alofa ia te outou ma lo’u talitonu ia te outou.
Tou te musuia tagata o loo siomia outou e sili atu nai lo mea e mafai ona outou mafaufau i ai. Faafofoga foi i upu a se alii talavou e le auai i lo tatou faatuatuaga. A o taumafai e faamatala lana uo e umia le Perisitua Arona: “Ou te matauina se mea e ese mai ia Lui… . O le alii lenei e le … pei o isi tagata. O se mea e mafai ona e vaaia ia te ia… . ou te le iloa foi po o le a, ae e ese ai lava o ia mai ia i latou uma. O se mea e te lagonaina; e le [o se mea] … e mafai ona e vaaitino i ai. E te lagonaina lava.”
O loo i ai se mea e sili ona taua e tulaga ese ai lava Lui ma oe foi mai isi alii talavou. Ua outou maua le Perisitua Arona. O se meaalofa paia, ma e toatele i latou ua maua ae latou te le talisapaiaina atoatoa. O le afiafi nei o le a ou fesoasoani atu ia outou iloa auala e mafai ona outou iloa ai mo outou lava le taua o le Perisitua Arona.
I. Ua Faatuatuaina Oe e le Atua
Ina ua faasafua mai e le Atua Lana perisitua paia ia te oe, ua Ia faaalia lona talitonuina tele o oe. Ua Ia silafia e mafai ona Ia faatuatuaina oe e faaaoga le perisitua e auauna atu ai i isi, e pei lava ona Ia faatuatuaina isi alii talavou e fai ni isi o Ana galuega e sili ona taua.
Mo se faataitaiga, semanu e le maua e le lalolagi le molimau mamana a le Tusi a Mamona ia Iesu Keriso pe ana leai ni alii talavou se toalua na faatuatuaina e le Atua. O Mamona le perofeta na tuufaatasia lenei faamaumauga paia, sa na o le 10 ona tausaga i le taimi na tofia ai o ia e matau ma mulimuli ane tusia le talafaasolopito o lona nuu. I le 15 o ona tausaga, sa “asiasi mai ai le Atua ia te [ia], na ou tofotofoina foi ma iloa le agalelei o Iesu” (Mamona 1:15).
O le Tusi a Mamona na faaliliuina ma lomia e Iosefa Samita, o lē sa valaauina i lana galuega maoae i le 14 o ona tausaga, ina ua faaali mai le Tama Faalelagi ma Iesu Keriso ia te ia.
Na saunoa Peresitene Thomas S. Monson: “E i ai mea maoae ua faamoemoeina mai ia te oe… . E pei o le leo o se pu le oo mai o le afioga a le Alii ia te oe, ia te au, ma i latou o loo umia le perisitua i soo se mea: ‘O lea, ia taitoatasi ai le tagata ma aoaoina lana tiute, ma galue i le tofi ua tofia ai o ia, i le maelega atoatoa’” (“O le Valaau mo le Lototele,” Liahona, Me 2004, 54, 57).
II. O Le Polokalama Fou o le Tiute i le Atua
Ina ia fesoasoani atu ia te oe e te tali atu i lena valaau faanatinati, ua faalauiloa atu ai e le Ekalesia se polokalama fou o le Tiute i le Atua, e pei ona fofogaina atu e Peresitene Henry B. Eyring i se taimi na mavae atu nei. Ua ou fiafia lava i lenei polokalama. O le a auina atu tusi ma punaoa i o outou epikopo ma peresitene o paranesi i le amataga o Iuni. E tatau ona outou amata faaaogaina i le taimi lava e maua atu ai.
O le avea ai ma se tiakono, aoao, ma se ositaulaga, o le a e auai ai i gaoioiga o le a fesoasoani ia te oe e fausia ai le malosi faaleagaga ma aoao ma faataunuu ai ou tiute faaleperisitua. O gaoioiga taitasi e mulimuli i le mamanu faigofie lenei:
Muamua e te aoao i se mataupu faavae o le talalelei po o se tiute o le perisitua. E te iloa ai le mea ua finagalo le Tama Faalelagi e te faia, ma taumafai ai ia e maua se molimau faaleagaga i le mafuaaga ua taua ai.
O le isi vaega e sosoo ai e te faia ni fuafuaga ina ia e galue i le mea ua e aoaoina. Ua fautuaina oe ina ia faavae au fuafuaga i mea e te manaomia, tulaga, ma avanoa e auauna atu ai i isi. O se avanoa matagofie lenei e te nafa ai mo lou lava tuputupu ae ma atiina ae ai le faalagolago faaleagaga o le tagata ia te ia lava.
Ona faasoa atu lea o mea ua e aoaoina ma ou aafiaga i isi. A o e faia lea mea, o le a faamalosia lau molimau ma fausia le faatuatua ia i latou o loo siomia oe. O le a faateleina ai lou mafai ona talanoa atu i isi e uiga i le talalelei.
Ou te faafetai i se alii talavou o lē na faasoa mai ia te au le aafiaga lenei. Na tofia i la’ua ma se isi alii e umia le Perisitua Arona e aveina atu le faamanatuga i se tamalii ua le toe mafai ona fealuai ma ua ma’i tigaina lava. Sa la taunuu atu i lona fale ma le le iloa e lei leva ona uma ia togafitiga faafomai, na taofia ai o ia mai le taumafaina o soo se meaai—e oo lava i se fasi falaoa o le faamanatuga. Ina ua uma ona faamanuia le falaoa, na tuu atu loa e le alii talavou le faamanatuga i le tamā vaivai. Sa ia uuina se fasi falaoa ua uma ona faamanuia, faatalitali mo sina taimi, ona tuu lea i ona laugutu. Fai mai le alii talavou, ina ua vaai i le faaalia e lenei uso faamaoni o lona migao mo le faamanatuga, sa ia lagonaina e pei lava na vaai atu o sogi o ia i aao o le Faaola. Sa ia iloaina lava e alofa o ia i le Faaola.
O le taua o le faamanatuga sa faagaeetia ai lena alii talavou i lena aso i se auala e le mafaagaloina. O le a e maua foi ni aafiaga paia, e pei lava ona sa maua e lenei alii talavou.
E i ai se tiute taua a ou matua, taitai, ma tagata o le korama i le polokalama o le Tiute i le Atua. O a outou sauniga a korama i Aso Sa, o le a maua ai ni avanoa se tele e aoao ai, galue, ma faasoa atu. O le polokalama fou o le Tiute i le Atua, o le a taialaina ai oe i lau faigamalaga e faataunuu lou tiute i le Atua ma iloa ai le matagofie o le Perisitua Arona.
III. Faataunuu Lou Tiute i le Atua
I le tausaga na tea nei, sa ou alu ai i se malaga ua suia ai e faavavau le tulaga ou te vaai ai ia te outou ma le Perisitua Arona. Ou te fiafia i lo outou sailia mo outou lava lea mea na ou mauaina. O le a outou aoao ai le mafuaaga e matuai taua ai le Perisitua Arona i lou olaga ma lona taua i le Ekalesia. O le a outou talisapaia le mafuaaga e ta’ua ai o se tasi o “ulu pito sili” o le perisitua (tagai MFF 107:6). O le a e malamalama lelei ai i le uiga o ki o le perisitua, asiasiga ma galuega a agelu, ma le talalelei sauniuni (tagai MFF 13; 84:26).
O le a taumafai Satani ia e mafaufau e te laitiiti tele po o le, e toalaiti tele outou mo le faia o mea taua i le Perisitua Arona. E leai ma se tasi o na manatu e sa’o.
O le fetalaiga a le Atua ia Mose e mo outou foi i le aso: “Faauta, o lo’u atalii lava oe; … ma o loo ia te au se galuega mo [oe]” (Mose 1:4, 6).
Ua Ia tuuina mai ia te oe Lona mana e fai ai mea silisili. A o e faataunuuina ou tiute i le Atua, o le a e faamalosia ma faamanuiaina lou aiga. O lou tiute silisili lenei faaleperisitua. Faalogo i le faamatalaina e se tina o le aafiaga a lana tama tama i lona aiga: “O Leo ua i ai le perisitua i lo matou aiga, ma o se faamanuiaga tele lea. O ia o se faataitaiga lelei i nai ona tei; … na te faamautinoa e fai e le aunoa a latou tatalo. Na te tufaina le faamanatuga i Aso Sa. E tilotilo atu lona uso laitiiti ia te ia. E fesoasoani o ia … i tatalo faaleaiga. Ou te iloa o le a faaauau ona avea o ia ma se faamanuiaga pe a matua. O le a mafai ona ia papatisoina lona uso laitiiti. O se faamafanafanaga ma se meaalofa ia i matou.”
A o e faataunuuina lou tiute i le Atua, o le a e aapa atu i au uo e le auai i la tatou ekalesia, ma fesoasoani e saunia i latou ia auai i le Ekalesia. E pei o se uso moni, o le a vaavaaia i latou ma faamalosia i latou. O le a e taitai i le laveaiina o isi alii talavou o e ua leiloa o latou auala.
A o e faataunuuina lou tiute i le Atua, o le a avea oe ma malosiaga mo le lelei i taimi uma ma i soo se tulaga. O au faataitaiga amiotonu ma au auaunaga faamaoni faaleperisitua, o le a avea ma se auala mamana e valaaulia ai tagata uma e iloaina oe ia o mai ia Keriso.
I o latou taimi na sili ona faigata, na vaavaai atu ai sa Nifae i se alii talavou, o Mamona, mo le taitaiga ma musumusuga (tagai Mamona 2:1–2). O le asō ua matou vaavaai atu ia te outou e avea ma se malosiaga tele i le Ekalesia ma se malosiaga mo le manuia o le lalolagi. O le mea lena o loo faamoemoe mai ai le Alii.
IV. Avea ma se Alii Perisitua Faamaoni
Ou te molimau atu o le a e lagona le suia o lou loto a o avea oe ma se alii perisitua faamaoni. O le a e saili ia e mama atoatoa ma faatinoina ma le agavaa le faamanatuga. O le a e taulimaina ma le agalelei ma le faaaloalo tamaitai talavou uma. O le a e ava i ou matua. O le a e le faatiga i le Agaga i ou mafaufauga, upu e te tautala ai, po o mea e te faia. O le a iu ina e iloa le Alii, o lē o loo e auauna i ai, ma o le a e taumafai pea ia avea e faapei o Ia.
Ou te molimau atu o au auaunaga faamaoni i le Perisitua Arona, o le a suia ai olaga o i latou o loo e tautuaina. O loo i ai tagata o loo manaomia lau auaunaga faaleperisitua. E manaomia oe e lou aiga. E manaomia oe e lau korama. E manaomia oe e le Ekalesia. E manaomia oe e le lalolagi.
O loo matuai manaomia vave lava oe e faataunuu lou tiute i le Atua. Ou te matuai talitonu o le a e faataunuuina.
I se taeao malulu lava i nai vaiaso ua tuanai atu, sa ou toleni atu ai i autafa o le Vaitafe o Tagus i Lisbon, Potukale. Na ou tau atu i se maafaamanatu na ofo alofa ai mo tagata folau Potukale mai seneturi ua mavae. Sa ou tu a o oso ae le la ma faasusulu atu lona malamalama mafanafana i le maafaamanatu mata’ina faapea foi ma a’u. Na musuia au a o ou vaavaai atu i foliga naunautai o tagata folau o pulato’a atu i le vasa. O alii nei na naunau e fai mea sa na o ni nai tagata na faia. Ua latou tuua se lalolagi masani ma lagolelei ae folau atu ma le lototetele i le vasa e le mailoa ma maua ai ni laueleele fou. Na latou suia le lalolagi.
Ou te vaai ia te outou pe a ou mafaufau i lena maafaamanatu o tagata folau lototetele. Ou te vaai ia te outou i se faigamalaga patino lea e itiiti lava ni tagata i le lalolagi i aso nei ua filifili e mulimuli i ai. Ou te vaai i lou faataunuuina o lou tiute i le Atua.
Ou te tatalo ina ia tatou malamalama uma i le matagofie o le Perisitua Arona, ma talitonuina, e pei o le Atua, i latou o loo tauaveina. I le suafa o Iesu Keriso, amene.