Taialaina i se Galuega

Saunia e Ildinete de Santo Souza, São Paulo, Pasila

Sa lē mafai ona ou maua se galuega, ae sa ou mautinoa o le a faamanuiaina a’u e le Alii mo a’u taumafaiga ina ia ola tutoatasi.

I le taimi o la’u semesa mulimuli o le kolisi, sa ou lagona ai e tatau ona amata ona ou saili mo se galuega i la’u matātā o suesuega, o aoaoga lea. Sa ou fuafua e galue faavaitaimi o se faiaoga i aoga tulagalua. E oo atu i lena taimi, ua matutua la’u fanau.

Ina ia saunia e ulufale atu i le siosiomaga faigaluega, sa ou lesitala ai i se tasi o kosi o le ola tutoatasi a le Ekalesia e fesoasoani ia te a’u e su’e se galuega.¹ Ina ua ou taunuu mo la’u vasega muamua, sa na o a’u le tagata aoga iina. O le faiaoga o se tamālii ma se tautala faa-Amerika ua naunau e auauna atu i isi. I le taimi o a maua lesona, sa ia faamalamalama mai ai mataupu faavae o le talalelei o le a fesoasoani ia te a’u e atiina a’e ai le faatuatua i le Alii ma faatino ai i le faatuatua.

E lua itula na ou malaga ai i le nofoaga autu o le ola tutoatasi a le Ekalesia i São Paulo, ae sa ou i ai i le vasega i le taimi sao i vaiaso uma taitasi. Sa ou matuā manatu mamafa i le kosi auā sa tāua ia te a’u.

Peitai, i le faaiuga o le kosi, sa lē mafai ona ou maua se galuega faafaiaoga. Ae ui i lea, sa ou ta’u atu i lo’u faiaoga ou te talitonu o le a faamanuia a’u e le Alii ma o le a lē umi se taimi ou te saili ai se galuega. Sa ou suesue mo suega sa manaomia ona ou faia ina ia mafai ai ona ou tauva mo se tulaga o le faiaoga, ma sa amata ona ou auai i se kosi o le ola tutoatasi i le auala e amata ai se pisinisi.²

I le taimi lava na uma ai la’u suega, sa ou faanatinati atu i la’u vasega o le ola tutoatasi a le siteki. Sa ou ta’u atu i tagata uma iina le saunia o o’u lagona mo suega—faafetai i a’u suesuega ma a’u kosi o le ola tutoatasi.

Mulimuli ane, sa ou maua le galuega sa ou manao ai. Sa ou lagonaina le fiafia tele, ma sa ou faafetai i le mafai ona totogi sefuluai ma taulaga i le Alii. I le taimi o la’u kosi lona lua o le ola tutoatasi, sa uunaia ai a’u e le Agaga e ave le EnglishConnect 2 ma amata le galuega mo se faailoga mulimuli mai.³

Sa ou lagonaina le faamanuiaina tele e ala i lenei taitaiga mai le Alii i le faia o na faaiuga tāua i lo’u olaga. Ou te iloa Na te tausia Ana folafolaga ma afai tatou te tausia Ana poloaiga, o le a Ia faamanuiaina i tatou i le faaletino ma le faaleagaga i mea e manaomia ona tatou manuia ai (tagai Mosaea 2:41).