“Pe ‘Faitaulia’ le Savavali ma Talatalanoa o se Auaunaga?,” Liahona, Oke. 2023.
Matua ma le Faatuatua
Pe “Faitaulia” le Savavali ma Talatalanoa o se Auaunaga?
O le faaali atu tatou te popole e faitaulia i le Alii ma le tasi ma le isi.
A o ma laiti ma lo’u uso, sa ma fiafia e asiasi i lo ma tināmatua. Sa nofo o ia pe tusa ma le 15 minute le mamao mai lo matou fale, o lea sa ma asiasi soo atu ai ia te ia. O le tele o taimi pe a ma taunuu i lona fale, e i ai lava o ia i luga o le telefoni. Sa toetoe lava o aso uma e valaau atu ai se tuaoi e talanoa. E lē mafai ona matou malamalama pe aisea na faaalu ai e Tināmatua lena taimi atoa e talanoa ai ma se tuaoi i le telefoni. O lea na ma fai atu ai ia te ia e ta’u atu i lona tuaoi o loo pisi o ia. Ona faamaea lea e Tināmatua le valaau, ataata, ona liliu mai lea ia i ma’ua.
I le onosefulu po o le sili atu foi o tausaga mulimuli ane, ua ou iloa ai sa le’i popole Tināmatua i valaau faifai pea a lona tuaoi. Ae, o nei fafine e toalua ua oti a la’ua tane sa lagolagoina e le tasi le isi—talanoa faatasi pe a lē i ai se taimi po o le fiafia o isi e asiasi atu ai.
O Le Auauna Atu o se Faataitaiga o le Avea ma Soo
A o tatou saili ia avea atili e faapei o lo tatou Faaola, tatou te taliaina avanoa e auauna atu ai, e tusa lava po “o ai” po o “afea” foi. Matau le taimi na faaalu e le Faaola e aoao ai Nikotemo—o se Faresaio—o le na sau i le po e fesili atu ia te Ia ni fesili (tagai i le Ioane 3). E faapena foi, na faaalia e Iesu le alofa ma le agaalofa a o Ia aoao atu le fafine Samaria i le vaieli (tagai Ioane 4).
Ae faapefea pe afai tatou te pisi i le faia o mea lelei ma ua manaomia e se isi tagata la tatou fesoasoani i le taimi lava e tasi? O le Faaola lava lo tatou faaa’oa’o sili. Ina ua aapa atu le fafine sa i ai se punatoto e pa’i atu ia te Ia a o Ia savali atu e auauna atu i se isi, sa tu o Ia ma auauna atu ia te ia a o le’i alu atu e auauna atu i le tamaitai talavou o le a maliu (tagai Mataio 9:20–25). O le faataitaiga a Iesu ua faaali mai ai ia i tatou e oo lava i mea faalavefau o ni avanoa tamaoaiga faaleauaunaga.
Sa tuuina mai e Sister Jean B. Bingham, o le sa avea muamua ma Peresitene Aoao o le Aualofa, se aotelega matagofie o le auala e mafai ai ona tatou auauna atu i le tasi ma le isi a o latalata mai le Afio Mai Faalua: “O le a se auala sili atu e saunia ai e feiloai ma Ia nai lo le taumafai ia avea e faapei o Ia e ala i le auauna atu ma le alofa i le tasi ma le isi! E pei ona aoao atu e Iesu Keriso Ona soo i le amataga o lenei tisipenisione, ‘Afai e te alofa mai ia te a’u, e te auauna mai ia te a’u’[Mataupu Faavae ma Feagaiga 42:29]. O la tatou auaunaga i isi o se faailoaga lea o le avea ma soo ma lo tatou lotofaafetai ma le alofa mo le Atua ma Lona Alo, o Iesu Keriso.”1
Ata pue o Uso Rigby ma Uso Bracken mai faaaloaloga a le tusitala
O Fea Tatou te Maua ai Avanoa Faaleauaunaga?
E masani lava, o le auaunaga faa-Keriso e faia i ni faatinoga laiti ma faamaoni e te faia i aso uma.2
O lo’u tuaoi o Marriner Rigby e 95 tausaga le matua. I ni nai tausaga ua mavae, sa i ai o ia i se paka o taavale ae solomuli atu se avetaavale sa lei ano i lana solomuli ma so’a o ia ma lavea ai lona vae agavale. Ina ua mavae le ono vaiaso o taumafaiga ia toe manuia lona vae, sa mafai ona ia toe savali faatasi ma le fesoasoani a se tootoo savali. Sa amata ona ia savali i le maila i aso taitasi. I le suia o se auala i se tasi taeao, sa ia pasia ai le fale o Ron Bracken e 84 tausaga le matua, o se tagata o le uarota sa feagai ma le kanesa o ponaivi i lona tulaga 4. Talu ai e leai se tasi o i la’ua na i ai se tofiga faaleauaunaga, sa tonu ia i la’ua e auauna atu le tasi i le isi a o savavali ai i le vai’a’ai.
Sa la’ua talanoa e uiga i mea uma: faatuatua, mea tautupe, aiga, fuafuaga i le lumanai. Ioe, fuafuaga i le lumanai. Sa moni i la’ua e uiga i o la ma’i ae sa faaosofia e le tasi le isi e tulitulimatāgau ni sini i le lumanai. O le isi foi mea, sa le o le tele o mea sa la’ua talanoa i ai ae o le tau lava ina la faatasi. Sa la’ua faaavanoa se taimi mo le tasi ma le isi.
O le auaunaga e mafai ona aofia ai le faasoa atu ma le faalogo, savavali ma talanoa, fuafuaina ma faamanatu atu. O nisi taimi atonu tatou te popole po o a mea e “faitaulia” o ni auaunaga. Ae o le alofa faamaoni e faitaulia e le Alii ma le tasi ma le isi. E mafai e tagata uma ona faia lena mea—ma e faia ai se eseesega faa-Keriso!
E alala le tusitala i Iuta, ISA.