Ua Na’o Tusiga Faaeletonika: Autalavou Matutua
Fesootai ma i Latou o i tua atu o le Veli
Ina ua ou alu i le malumalu mo le taimi lona lua, sa ou mauaina se faamautinoaga e moni upu a le perofeta.
Ua lua tausaga talu mai la’u asiasiga muamua i le malumalu, ma sa ou tulimatai atu e toe auai faatasi ma se vaega o talavou matutua. O la’u taulaiga o le faamalosia lea o a’u lava, faia ni uo, ma maua le avanoa e faatino ai sauniga paia.
A o ou i ai i le potu papatiso o le malumalu, sa fai si ou le mau manatu ona o le popole. Sa na o lou taimi lona lua lea ou te alu ai i le malumalu, ma sa ou fefe i fai se mea sese a o ou faatinoina sauniga. Ae o se tasi o le au peresitene o le malumalu, o lē sa fesoasoani i papatisoga, sa fai mai ia i matou o loo faatalitali i le laina e faapea, afai e mafai ona matou sii ae le veli mo se sekone, e mafai ona matou iloa le toatele o tagata o loo i ai i le lalolagi o agaga o loo faatalitali ina ia fesoasoani atu i ai.
O lena manatu na tuia ai lo’u loto, ma na faafuasei lava ona ou iloaina le taua o nei sauniga.
Lagonaina le Olioli i Galuega o le Malumalu
A o ou tomanatu i mea sa ia fai mai ai, sa ou manatuaina se metotia sa ou aoaoina i se vasega o le faletifaga lea na tuu ai e tagata faatino i latou lava i le tulaga o tagata latou te faatinoina ina ia faaalia lelei atili ai i latou. Sa ou mafaufau pe mafai ona fesoasoani mai le Tama Faalelagi ia te au a o ou taumafai e tuu au lava i seevae o tagata sa ou faatinoina i ai sauniga o le malumalu.
O le a so’u lagona pe afai, i le mavae ai o le tele o tausaga po o le tele o seneturi o faatalitali, ua iu lava ina mafai ona ou maua sauniga faaola sa ou moomoo i ai?
A o ou taumafai e mafaufau atili e uiga ia i latou sa ou faia galuega i ai, sa fesoasoani mai le Agaga Paia ia ou lagonaina se lagona o le olioli lofituina. Sa le mafai ona taofiofi o’u loimata. Sa mafai ona ou lagonaina le fiafia o i latou ia faatoa uma ona ou sui papatiso ai. Sa ou lagonaina se uunaiga malosi i le auala na o latou faatalitali ai mo se taimi umi tele mo o latou sauniga faaola.
Sa ou popole e uiga i le alu i le malumalu, ae sa ou iloaina afai e faagalo ou lava popolega ma lagona ae taulai atu i le avea atoatoa ma sui o tagata uma sa ou sui papatisoina ai, o le a mafai ona ou lagonaina lo latou olioli i le veli.
Sa ou matua faafetai lava i le mafai ona ou auauna atu i le aso atoa i le malumalu ma fesoasoani ia i latou o e sa manaomia au e lagolagoina i latou ina ia mafai ona latou saunia e toe foi atu i le afioaga o le Tama. Sa ou malamalama atili i le faaaliga na tuuina mai e le Atua i le Perofeta o Iosefa Samita i le Malumalu o Katelani: “O i latou uma o e na maliliu e aunoa ma se malamalama e uiga i lenei talalelei, o e semanu latou te mauaina pe ana faatagaina i latou e ola, o le a avea ma suli o le malo selesitila o le Atua” (Mataupu Faavae ma Feagaiga 137:7).
E Suia Oe e Galuega o le Malumalu
A o lei toe foi mai i le fale mai le malumalu, sa potopoto faatasi uma le autalavou matutua e faasoa a latou molimau ma aafiaga. Sa pa’i atu le Agaga Paia i loto o tagata uma, ma sa matou iloa sa ese i matou nai lo le taimi na matou faatoa taunuu ai i le malumalu ona o la matou taulaiga fou i le faia o galuega faalemalumalu ma talafaasolopito o aiga.
E ao ona tatou manatua le saunoaga a lo tatou perofeta pele, o Russell M. Nelson: “Ao i ai i galuega o le malumalu ma talafaasolopito o aiga le mana e faamanuia ai i latou o i tua atu o le veli, o loo i ai foi le mana lava lea e faamanuia ai e o soifua. O loo i ai se uunaiga faamama ia i latou o loo faia lea galuega.”1
O loo ou auauna nei o se fesoasoani i le korama a toeaina ua tofia i le galuega o le malumalu ma talafaasolopito o aiga. Tatou te galulue agai atu i le sini o le i ai o le maota o le Alii i la matou eria. A o matou tauivi, ua mafai ona ou lagonaina patino lena faatosinaga faamama lea na ta’ua e Peresitene Nelson.
Ou te iloa a tatou faia lenei galuega, e faamanuiaina tele i tatou e le Alii. O folafolaga uma na Ia faia ia i tatou e ala mai i Ana perofeta ma aposetolo o le a faataunuuina, pe i lenei olaga po o le olaga a sau. E pei ona aoao mai Elder Dale G. Renlund o le Korama a Aposetolo e Toasefululua: “O le a faamalosia, fesoasoani, ma lagolagoina i tatou e le Atua [tagai Isaia 41:10]; ma o le a Ia faapaiaina ia i tatou o tatou mafatiaga sili ona loloto [tagai Viiga, nu. 45]. A tatou aoina o tatou talafaasolopito o aiga ma o i le malumalu e fai ma sui o o tatou tuaa, o le a faataunuu e le Atua le tele o nei faamanuiaga folafolaina i le taimi lava lena i itu uma e lua o le veli.”2
Ou te molimau atu i le mana o loo i ai galuega o malumalu ma talafaasolopito o aiga i o tatou olaga. O le faia o lena galuega e mafai ona fesoasoani ia i tatou e faamalosia ai lo tatou faatuatua ma lo tatou faavae i le talalelei a Iesu Keriso. E mafai ona avea i tatou ma e fesoasoani i tagata i le isi itu o le veli—ma i le faia o lena mea, o le a tatou lagonaina le olioli lea e sau mai na aafiaga paia.