Savali Faaleautaitai i le Eria
O Faifeautalai Matutua ma Faifeautalai Matutua mo Auaunaga—O Se Valaauga e Auauna Atu
A o asiasi atu le Au Peresitene o le Eria i uarota ma paranesi i le Pasefika atoa, ua matou vaaia ai le manaomia tele o faifeautalai matutua. E le mafai ona e vaai faalemafaufau i le tele o mea lelei latou te faia a o latou alolofa i faifeautalai faamisiona ma aoao atu i tagata o le lotoifale ia aoaoga faavae ma aganuu a Keriso ma Lana Ekalesia.
O avanoa mo faifeautalai matutua e eseese ma tele. “E manaomia foi faifeautalai matutua”1 ma fai ma sui o le Alii. E “uunaia i latou e saunia e auauna atu.”2
Na aoao mai Peresitene Russell M. Nelson, “Ou te faailoa atu le agaga faafetai mo a tatou faifeautalai matutua. E talavou i latou i le agaga, atamamai, ma naunau e galulue . . . O nei tagata pele o le ekalesia ua naunau e auauna atu ma faamalosia olaga o isi. E tusa lava pe le iloa e nei tagata matutua le gagana i le lotoifale, e maoae a latou mea na ausia, ma e taua lo latou agaga o le ositaulaga.”3
E faatatau la’u lauga ia i latou o loo mafaufau e auauna atu—pe le o mafaufau foi e auauna atu—o ni faifeautalai matutua po o ni faifeautalai matutua o auaunaga.
Faifeautalai Matutua
I le 40 tausaga le matua pe sili atu, afai e leai ni a latou fanau o tausia, e mafai e ulugalii faaipoipo ma tamaitai nofofua ona auauna atu i ni misiona matutua. E mafai ona valaauina i latou e auauna atu mai le 6 i le 23 masina—ia le itiiti ifo i le 18 masina pe afai latou te auauna i fafo atu o lo latou atunuu o loo aumau ai. E mafai e epikopo po o peresitene o siteki ona faatalanoaina I latou e iloa ai lo latou avanoa ma valaaulia i latou e saunia e auauna atu.4
Ua matou vaai i le toatele o faifeautalai matutua faamaoni ma filiga ia matou asiasiga i misiona. Sa ou feiloai talu ai nei i nisi o i latou o loo auauna atu i Papua Niu Kini ma i Alice Springs i le Misiona a Ausetalia Adelaide. Na faapea mai se tasi ulugalii:
“O le auauna atu i se misiona o se ulugalii matutua o lo ma’ua faanaunauga amiotonu lea, ae sa ma [feagai ai] ma le tele o luitau. Sa ma faaaogaina lo ma faatuatua i le Alii o Iesu Keriso ina ia taitaiina i ma’ua e le Agaga Paia i laasaga uma. E ui i o ma’ua luitau sa faamanuiaina i ma’ua i le filemu ma le mautinoa e agai i luma. Sa mafai ona ma sefeina ina ia lava le ma faasoa mo le ma misiona, totogiina o aitalafu, ma le faatulagaina o lo ma’ua aiga. Ua faamanuiaina i ma’ua i le mauaina o se mafutaga sili atu o se tane ma se ava, faapea foi ma le ma fanau taitoatasi.”
Sa faapea mai foi se isi ulugalii, “O se tasi lenei o faaiuga sili ua ma faia—o le auauna atu i ni misiona o se ulugalii matutua. Sa ma talanoa e uiga i le auauna atu pe a litaea ma fuafua i ai i tulaga tautupe. O lea ua ma fiafia i minute uma. O le ma taimi lona lua lenei e auauna atu ai, ma maimau pe ana vave amata ona ma auauna atu ina ia mafai ona umi atu la ma’ua auaunaga . . . ma te le’i iloaina o le a maua ai le fiafia tele ma le faamalieina. Ua mafai ai foi ona ma fatuina ni uo fou e faavavau ma le peresitene o le misiona ma lona faletua, ma isi ulugalii matutua o loo matou galulue faatasi. Ua faamanuiaina i maua mo le auauna atu i le Alii, ma ua ma iloa e faamanuia e le Tama Faalelagi le ma fanau ma tausia lelei i latou ma fanau a a [ma] fanau a o ma auauna atu.”
Fai mai le isi, “Na amata le ma sauniuniga a o avea I ma’ua o se ulugalii talavou faaipoipo, i le iloaina ma te le’i auauna atu faamisiona a o AM. Sa ma tauivi ma tulaga tautupe, patino, faaletino, ae faatasi ai ma le faatuatua na ma iloa ai o la ma sini o le auauna atu i se misiona. Ua ma aʻoaʻoina . . . le taua o le ola i se olaga faigofie, ia mautinoa a oʻo mai le taimi, ua ma sauni i mea tau tupe. Ua ma aoaoina afai ma te naunau e tuua e pele ia i ma’ua mo le auaunaga i se misiona, o le a ma faamanuiaina i latou i se talatuu o le a aoao ma musuia ai i latou mo augatupulaga a sau.”
I se faasalalauga faaleaoaoga i taitai perisitua, na tuuina atu ai e Peresitene Gordon B. Hinckley (1910–2008) le valaaulia lenei: “O loo i ai se manaoga faifai pea mo ni ulugalii faifeautalai se tele,” o lana saunoaga lea. “Latou te faia ni auaunaga matagofie i le lalolagi atoa. E le manaomia e outou [taitai] ona faatali mo ulugalii e ofo mai.”5
Faifeautalai Matutua o Auaunaga
O Faifeautalai Matutua o Auaunaga e nonofo i le fale ma e valaauina e le peresitene o le siteki. O alii ma tamaitai e 26 tausaga ma matutua atu—e tusa lava pe ua faaipoipo pe ua uma ona auauna atu i ni misiona—e mafai ona valaauina I ni misiona mo faifeautalai matutua o auaunaga. O alii i le va o le 18 ma le 25, ma tamaitai mai le 19 i le 25, e mafai foi ona avea ma faifeautalai matutua o auaunaga pe afai latou te nonofo i eria e le o mafai ona iai ni avanoa faifeautalai faamisiona mo le autalavou.6
Ia Ianuari o le tausaga nei, sa ma asiasi ai ma lo’u toalua o Anita I le Motu Abaiang ma le Sui Peresitene o Kiribati ma lona toalua. Sa saunia lelei tagata o le Ekalesia e talia i la’ua. Sa matua maualuga lava le saunoaga a le Sui Peresitene e uiga i le Ekalesia.
A o iai iina, sa ou feiloai atu ai I ni faifeautalai o auaunaga e toʻafā ua maliliu a latou tane: Sister Turia Manraoi Kaiea, (75) ua 12 tausaga talu ona maliu lana tane; Sister Tiena Kiakia, (64) ua maliu lana tane mo le 10 tausaga; Sister Bakate Tekarika, (63) ua maliu lana tane mo le iva tausaga ma Sister Tengabi Ioaa, (70) ua maliu lana tane i le 10 tausaga talu ai.
O nei tagata matutua e toafa e maua fesoasoani-tupe faalemasina mai le malo e AUD$200. Sa latou o atu i le latou peresitene o le siteki ina ua uma ona latou filifili e mafai ona latou faaaogaina lelei le tupe pe a latou auauna atu i ni misiona. Na vaetofia i latou ma o atu loa i Abaiang, o se motu i fafo atu i North Tarawa. Latou te fesoasoani i le auauna atu ma aoao atu vasega o Sauniuniga mo le Malumalu i iunite a Abaiang. Na saunoa mai Peresitene Mwemwenikeaki, “O tuafafine faamaoni nei o loo taitaia e ala i ni faataitaiga i le auauna atu i misiona.”
Ia Aperila o le tausaga nei, sa ma maua ai ma Anita le avanoa e auauna atu ai i faifeautalai Papua Niu Kini faatasi ma Peresitene ma Sister Kinikini. Sa matou auai foi i le Konafesi Faaleitu a Rigo i le Aso Sa 30 o Aperila, lea na matou feiloai ai i ulugalii e 23 ma tuafafine faifeautalai matutua o auaunaga e toaono. O se tasi o ulugalii faatoa auai i le Ekalesia i le silia ma le tausaga talu ai. O paranesi uma i le itu o Rigo e toalua pe toafa ulugalii faamisiona matutua po o soa faamisiona matutua o auaunaga. E ui ina utiuti punaoa, ae e le gata i lo latou manao, faatuatua, faamoemoe, alofa mama, ma le alofa.
E pei ona faaalia e nei faifeautalai matutua i Kiribati ma PNG, o agavaa uma e auauna atu ai, atonu e sili ona taua le naunau e auauna atu. Na folafola mai e le Alii: “O lea, afai ua ia te outou le manao e auauna atu i le Atua ua valaauina outou i le galuega.”7
I isi o e atonu e manatu latou te le agavaa mo galuega faafaifeautalai, ua tuuina mai e le Alii le faamautinoaga lenei: “O le faatuatua, faamoemoe, alofa mama ma le alofa, ma le manatu tasi i le mamalu o le Atua, ia agavaa ai o ia mo le galuega.”8
Valaaulia
E tusa lava po o fea tatou te nonofo ai i le Pasefika, o loo i ai avanoa matagofie o auaunaga mo faifeautalai matutua po o faifeautalai matutua o auaunaga.
E valaaulia e le Au Peresitene o le Eria ia tagata matutua, o ni ulugalii po o ni tagata taitoatasi, e asiasi atu ma le agaga tatalo i o outou taitai ma ofo atu lau auaunaga. Matou te folafola atu o lou olaga, lou aiga, ma tagata e te auauna atu i ai o le a matuai faamanuiaina.
O ou tausaga o le poto masani o le a faamanuiaina ai isi, ma o le a e iloa ai le ofoofogia moni o tagata.