ITULAU I LE LOTOIFALE
Totōina o Fatu o le Faatuatua ma Galuega i Falani Polenisia
O le naunau o se faifa’ato’aga latisi ina ia ola tuto’atasi sa fa’atuputeleina ai lona malosi e alofa ma tausia lona aiga ma lona nu’u.
O Lamana Manarani, o se tagata o Le Ekalesia a Iesu Keriso o le Au Paia o Aso e Gata Ai, e manatu o ia lava o se tagata faamanuiaina. Na atagia mai e Lamana, “E lei faigofie la’u malaga, ae faafetai i le Talalelei a Iesu Keriso, ma le tuuina o Ia i le totonugalemu o o matou olaga, ua faamanuiaina ai lo matou aiga.”
O Lamana Manarani o se fai faiva, sa amata ona fai faatoaga ina ua siitia atu o ia ma lona aiga i le motu o Tahaa i Farani Polenisia.
Ua totoina e Lamana le latisi e ala i le faaaogaina o se faiga o faatoaga e ta’ua o le aquaponics, o se tuufaatasiga o faiga e lua e gaosia ai meaai, hydroponics ma le aquaculture. E mafai e Lamana ona gaosia ni nai latisi i le fa vaiaso e faaaoga ai le faigafaafaatoaga aquaponics.
Sa faia e Lamana se suesuega i maketi i Tahaa ma matauina ai le leai o ni salati ma fualaau faisua i le motu. Ina ia fesoasoani e faʻatumu le gaogao o fualaau faisua, na ia filifili ai e totoina le latisi Batavia.
Sa faatau atu e Lamana le latisi e ala i le alu atu i lea faitotoa i lea faitotoa. Na faamatala e Lamana, “Na ou aoao e alu atu i lea faitotoa i lea faitotoa i la’u misiona mo le Ekalesia. O lea la e tiliva atu e Lamana le latisi e tasi i le faatolu i le vaiaso i le maketi i le lotoifale ma o loo fuafua e faalautele lana faatoaga ma totoina isi meaai.
Ua ta’ua e Lamana lona manuia i le faalagolago i le Atua, o lona auai atu i se vasega o le ola tutoatasi ua saunia e le Ekalesia, ma le galue malosi.
Sa ia faapea mai, “Ina ua faatoa ma faaipoipo, sa ma nonofo ma lo’u toalua o Laetitia i Tahaa, a o i ai i Tahaa, na lusi ai le galuega a lo’u toalua o se faiaoga, sa ma anapopogi ma tatalo i le Alii ina ia iloa le mea e fai, ma o le tali o le toe foi i Tahiti. Sa ma faalagolago i le Alii ma toe foi atu i Tahiti.”
Ina ua la toe foi atu i Tahiti, sa vaaia e Lamana ma Laetitia faitotoa o matala ma sasaa mai faamanuiaga ia i laua. Na faamatala e Lamana, “Na pasi le suega faa-faiaoga a lo’u toalua, sa mafai ona ou auai atu i le kosi o le ola tutoatasi, ‘Amataina ma le Faatupulaia o La’u Pisinisi’. Ina ua maea la’u kosi, sa ou atiina ae se faleoloa i’a ma pisinisi taavale toso i’a i Arue.”
Ae paga lea, ona o le KOVITI, sa pagatia ai pisinisi a Lamana. Sa faaauau le tala a Lamana, “Sa ma toe tatalo ma lo’u toalua i le Alii mo se taitaiga. Sa ma lagona le loloto o le finagalo o le Alii e ma te toe foi i Tahaa. E tusa lava pe faigata ona faamatuu atu a ma pisinisi i Tahiti, sa toe faatuatuaina le Alii.”
Sa iai ia Lamana ma Laetitia le sini ia ola tutoatasi I mea uma la te faia. Sa faaauau le tala a Lamana, “Ae ma te lei toe foi atu I Tahaa, sa ma auai I ni vasega ma se tagata o le tatou Ekalesia I le aquaponics. Sa ou faia foi le tele o suʻesuʻega patino i luga o le initoneti. Faafetai i le kosi o le ola tutoatasi, sa ou atiina ae ai se mausa o le aoaoina ma sa ou saili e faalolotoina lou malamalama i la’u matata.”
Sa faaauau ona faapea mai Lamana, “Sa faaauau pea ona ou faia le tele o suesuega e foia ai faafitauli i aso taitasi sa ou fetaiai. Na ou fausia mea uma mai mea e maua solo ma punaoa I luga o le motu. Sa i ai faalavefau i tulaga uma, ae sa faatuatuaina pea le Alii.”
Na iloa foi e Lamana e manaomia e le Alii lona aiga e toe foi atu i Tahaa e faamalosia le Ekalesia i Haamene, Tahaa. Ua auauna nei Lamana i le taitaiga a le ekalesia a Bora Bora. O loo auauna atu Lamana ma fesoasoani i isi.
Ina ua vaai Lamana i le tuputupu ae o lana faatoaga sa ia maofa i le auala e fua mai ai mea uma na ia totoina. Fai mai a ia, “Ua ou vaai i le aao o le Atua i nei faamanuiaga uma. Ou te totogi la’u sefuluai ma ou vaai atu i pupuni o le lagi o sasaa mai i luga o lo’u aiga.”
O Elder Peter F. Meurs, o se tasi o le Au Peresitene o le Eria o le Pasefika o le Ekalesia, ma lona faletua, o Sister Maxine Meurs, sa asiasi atu ia Lamana ma lona aiga ma sa musuia i latou i le tomai o Lamana e maua ai fualaau faisua o le tulaga maualuga, ma lona naunau e auauna atu i isi.
Na saunoa mai Elder Meurs, “Sa ave e Lamana se kosi o le ola tutoatasi ma mulimuli ai i mea o loo aoao mai e le kosi i tamaiti aoga e fai, o le vaavaai lea mo mea e manaomia. I Tahaa, sa vaaia ai e Lamana le manaomia o fualaau faisua fou, aemaise lava le latisi. Ua saunia nei e Lamana le latisi i lona nuu ma supamaketi i isi eria. Ua manuia tagata uma.”
Sa faaauau le saunoaga a Elder Meurs, “I le avea ai ma se au peresitene o le eria, matou te popole i galuega, ola tutoatasi ma galuega mo tagata o le Ekalesia. Sa faamanuiaina i maua e le Alii e ala I le mauaina o le avanoa ma lo’u toalua e feiloai ai ia Lamana ma vaai i mea ua ia ausia i lana faatoaga aquaponics. Ua aʻoaʻoina ai i tatou e mafai lenei ituaiga o mafaufauga. E mafai ona tele tagata o loo gaosia meaʻai i auala eseese e manuia ai le nuʻu ma fesoasoani i aiga e tausia i latou lava.”
Na faaopoopo mai Sister Meurs, “O Lamana o se tagata galue malosi ma o loo tausia lona aiga i se vaaiga mamao ma faataitaiga faatasi ai ma se toalua lagolago malosi. O se tulaga musuia.”
“Ou te alofa i le Atua, ou te alofa i lo’u aiga ma ou te alofa i lo’u atunuu,” o le tala lea a Lamana. “E le mafaatauina le alofa o le Atua, ua sauni o Ia e fesoasoani mai, e faalagolago mea uma i lo tatou mafaia ona faalogo, faatino, ma faatuatua ia te Ia. Pe a e auauna i le Alii, o le a Ia faia lana vaega.”