ITULAU I LE LOTOIFALE
Mai Tana i le Malumalu
O le avanoa e asiasi atu ai i se malumalu O Le Ekalesia a Iesu Keriso o le Au Paia o Aso e Gata Ai o se miti e foliga faigata, ae e pele mo i latou e va i le vasa le mea e nonofo ai. O se vaega o tagata mai le Motu laitiiti o Vanuatu o Tana sa matua faafetai i se malaga sa faia talu ai nei i Suva Fiti e tapuai atu ai i le malumalu iina.
Na onosaia e tagata o Tana le tele o faigata i tausaga talu ai e pei o afa ia na faatamaia le tele o fale ma meatoto. O lenei malaga i le malumalu o se mea lelei ma se uunaiga a o latou faaauauina le galuega o le toe fausiaina o o latou olaga.
Mo se tasi o tagata o le vaega, o Rex Morgan Ialulu, o le tapuai ai i le Maota o le Alii sa o se “aafiaga e lemafaagaloina.” Fai mai a ia, “Sa matou matua fiafia e lagona le alofa o lo tatou Alii ma Faaola o Iesu keriso i le malumalu. Ou te iloa o loo soifua le Atua, e alofa o ia i Ana fanau ma e i ai se fuafuaga mo i latou e toe foi atu ia te Ia. O le malumalu o le Maota o le Alii.”
Na toe foi Iesu Keriso i le malumalu i Ierusalema i le faagasologa o Lona soifuaga, ina ia aoao, tapuai, ma maua mai ai le malosi mai Lona Tama Faalelagi. I le avea ai ma soo o Iesu Keriso i lenei vaitaimi, o le Au Paia o Tana, ma le faitau miliona o isi i le salafa o le lalolagi, e o mai i malumalu mo mafuaaga lava e tasi.
O faamanatuga, po o sauniga o le malumalu, e aoao atu ai fuafuaga a le Atua mo Ana fanau, e aofia ai le Talalelei a Iesu Keriso. O malumalu ua mafai ai foi e tagata tapuai ona osia ma tausia folafolaga, po o feagaiga paia, ma le Atua, ma ia toe tuufaatasia o ni aiga mo le faavavau.