O A Mea O Le A E Filifilia?
Saunia e Elder Russell M. Nelson
O Le Korama a Aposetolo e Toasefululua
Mai se saunoaga i le faigalotu a le Ofisa o Aoga a le Ekalesia, “Autalavou o le Tupuaga Tautupu: O Le A le Mea E te Filifilia?” na fofogaina atu i le Iunivesite o Polika Iaga–Hawaii i le aso 6 Setema, 2013. Mo le saunoaga atoa, alu i le cesdevotionals.lds.org.
Na tofia outou e lo outou Tama Faalelagi e fausia le malo o le Atua i le lalolagi i le taimi nei, ma saunia tagata e talia le Faaola.
Ata na tusia e Brandon Dorman
I le avea ai ma ni “autalavou o le tofi tautupu,”1 o outou o atalii ma afafine moni o le Atua, na soifua mai i lenei taimi faapitoa i le talafaasolopito o le lalolagi mo se faamoemoega sili ona paia. E ui lava o tulaga faatauaina mama ma faalelotu o le lalolagi nei, e foliga mai ua fai ifo i le salafa o le lalolagi, ae o le autalavou o lenei Ekalesia e tatau ona avea ma ni avefu’a a le Alii ma ni sulu o le malamalama e tosina mai ai isi ia te Ia. O o outou faasinomaga ma faamoemoega e tulaga ese lava.
O le a lou faasinomaga? O outou o fanau o le feagaiga lea na osia e le Atua ma Aperaamo ina ua folafola atu ia Aperaamo e faapea, “o lau fanau o le a faamanuiaina ai ituaiga uma o le lalolagi” (Galuega 3:25; tagai foi i le 1 Nifae 15:18; 3 Nifae 20:25). O outou foi o “fanau o aso na folafolaina,”2 i lenei vaitau o le talafaasolopito o le lalolagi lea ua tele ina folafola atu ai le talalelei i le salafa o le lalolagi atoa.
O le a lou faamoemoega? O outou le usoga sa muaifaauuina i le muai olaga e tauaveina le perisitua (tagai i le Alema 13:2–3). Ae o outou tuafafine, sa muai filifilia outou a’o le’i faavaeina le lalolagi e fanauina ma tausia fanau a le Atua; o le faia o lena mea, ua outou faamamaluina ai le Atua (tagai i le MF&F 132:63). Pe ua outou mafaufau ea tuafafine i le uiga moni o le avea ma soa-foafoa a le Atua?
O outou taitoatasi o alii talavou ma tamaitai talavou sa tofia e lo outou Tama Faalelagi e fausia le malo o le Atua i le lalolagi i le taimi nei, ma saunia tagata e talia le Faaola pe a oo i le taimi e pule ma nofotupu ai o Ia o le Mesia o le Meleniuma. O lo outou tofi tautupu, faasinomaga, faamoemoega, ma le tiute paia ua tulaga ese ai outou mai isi tagata uma.
Ae e le mafai e o outou tofi, po o lo outou muai faauuina i le muai olaga atoa ai ma tiute ona faaolaina pe faaeaina ai outou. O le a outou faia lena mea e ala i a outou faaiuga fai toatasi ma a’o outou filifili e faaaoga le mana o le Togiola a le Alii i o outou olaga. O le mataupu faavae maoae e faavavau o le faitalia e taua tele i le fuafuaga a lo tatou Tama. O lea la, o outou o le autalavou o le tofi tautupu, o le a le mea o le a e filifilia?
Pe o le a e filifili e faateleina lou aoaoina?
O le aoaoina o lau mea lena ia maua. E leai se tasi e mafai ona ia mauaina mo oe. Po o fea lava o e i ai, atiina ae se naunautaiga loloto e aoao. Mo i tatou i le avea ai ma ni tagata o le Au Paia o Aso e Gata Ai, o le mauaina o se aoaoga e le na o se avanoa; o se tiutetauave faalelotu. “O le mamalu o le Atua o le malamalama” (MF&F 93:36). E moni lava, o a tatou aoaoga o le a aogā mo i tatou i le faavavau.
“Soo se mataupu autu o le atamai tatou te maua i le olaga lenei, o le a tu mai faatasi ma i tatou i le toetutu.
“Ma afai e maua e se tagata le poto ma le tomai sili atu i le olaga lenei …, o le a maua e ia le avanoa tele atu i le lalolagi a sau” (MF&F 130:18–19).
O se vaaiga mamao faapena o le a fesoasoani e te faia ai filifiliga lelei e uiga i le aoaoina.
Aua le fefe e tulitulimatagau au sini—e oo lava i au miti! Ae ia silafia e leai se auala ‘alo e tau atu i le tulaga silisili ma le tomai. O le aoaoina o le eseesega lea i le va o le moomoo maimau pe ana mafai ona e fesoasoani atu i isi tagata ma le mafai ona fesoasoani atu ia i latou.
O le a le ituaiga olaga o le a e filifilia?
E tatau ona tulaga ese lou olaga mai isi. Tou te silafia le upu a Paulo i le taulealea o Timoteo: “Ia fai oe ma faaaoao o e ua faatuatua, i le upu, ma le amio, ma le alofa, ma le loto, i le faatuatua, ma le le gaoia” (1 Timoteo 4:12).3 Filifili ia tulaga ese ou manatu ma amioga mai ia i latou o le lalolagi. Filifili ia tulaga ese ou foliga vaaia, ma iloa ai se faatosinaga mo le lelei o le a avea ai oe. E pei ona ta’ua i se tasi taimi e Ardeth G. Kapp, o lē sa avea muamua ma peresitene aoao o Tamaitai Talavou, “E le mafai ona avea oe ma se tagata faaola pe afai e tutusa ou foliga vaaia ma isi tagata taeele uma i luga o le matafaga.”4
I le avea ai ma autalavou o le tofi tautupu, ua maoae lo outou amataga i le olaga, ae e i ai foi sa outou tiutetauave faaopoopo. “Aua o ia o lē ua tuu atu i ai mea e tele, e tele mea ua manaomia mai ai” (MF&F 82:3; tagai foi i le Luka 12:48). O se vaega o lena mea e manaomia o le avea ma se tagata ua lesitala. Ina ua papatisoina outou, ua outou toe auai moni i le autau a le Alii.5 I le muai olaga, sa outou tutu mo Iesu Keriso i le taimi o le Taua i le Lagi. Ma o lenei o loo faaauau pea iinei i le lalolagi le taua i le va o autau o le lelei ma le leaga. E moni lava! (Tagai i le Faaaliga 12:7–9; MF&F 29:40–41). I le itu a le Atua o loo i ai Iesu Keriso, na muai faauuina e avea ma Faaola o le lalolagi (tagai i le 1 Nifae 10:4). I le isi itu o loo i ai Satani—o se tagata fouvale, o se e faaumatiaina le faitalia (tagai i le Mose 4:3).6
O le fuafuaga a le Atua ua faataga ai le fili e faaosoosoina oe ina ia mafai ona faaaoga lou faitalia e filifili ai le lelei nai lo le leaga, filifili e salamo, ia filifili e o mai ia Iesu Keriso ma talitonu i Ana aoaoga ma mulimuli i Ana faataitaiga. O se tiutetauave ma se faatuatuaga ina a maoae!
O lou saoloto e fai a oe lava [filifiliga] e matuai taua i lou alualu i luma ma lou fiafia e faavavau, lea foi e fai ai e le fili ni taumafaiga sili atu ona maoae e faavaivaia ai [lou saolotoga] (tagai i le 2 Nifae 2:27; 10:23).
Pe o le a e faatulagaina ni mea e faamuamua e fesoasoani ia te oe i le faiga o au filifiliga?
O au filifiliga o le a lē na o le va o le lelei ma le leaga. O le tele lava o ni filifiliga e i le va o ni filifiliga lelei se lua. E le o upumoni uma na tutusa le foafoaina, o lea e manaomia ai ona e faatulagaina mea e faamuamua. I lou tulitulimatagauina o le malamalama, ia iloa o le upumoni sili ona taua e mafai ona e aoaoina e mai le Alii. I Lana Tatalo Faatoga i Lona Tama, na faamaonia ai e le Faaola lava Ia le mea lenei. Na fetalai o Ia, “O le ola e faavavau foi lenei, ia latou iloa oe le Atua moni e toatasi, atoa ma Le ua E auina mai, o Iesu Keriso lea” (Ioane 17:3). E sili atu i isi mea uma o loo outou saili e aoaoina, saili ia iloa le Atua, lou Tama Faalelagi, ma Lona Alo, o Iesu Keriso. Ia outou iloa i La’ua ma alolofa ia i La’ua, e pei ona ou [iloa ma alofa ia i La’ua].
O le isi mau e uiga i mea e faamuamua, na fesoasoani ia te a’u i lo’u olaga o le: “Ae ia outou muai saili le malo o le Atua, ma lana amiotonu; ona faaopoopoina atu lea o ia mea uma ia te outou” (Mataio 6:33).
E sili atu nai lo soo se mea i lenei lalolagi, tou te mananao e fai filifiliga e tau atu i le taunuuga tupito ma le mamalu o le ola e faavavau. O le mamalu sili lena o le Atua mo outou (tagai i le MF&F 14:7; Mose 1:39). Filifili le ola e faavavau e avea ma mea aupito sili ona e faamuamuaina! Suesue i tusitusiga paia, e pei o le vaega e 76 ma le 88 o le Mataupu Faavae ma Feagaiga, ina ia malamalama atili ai e uiga i faamanuiaga eseese o loo faatalitali mai mo i latou o e filifilia le ola e faavavau, ma i latou o e e lē [filifilia le ola e faavavau]. Filifili le ola e faavavau e avea ma mea aupito sili ona e faamuamuaina, ona e matauina lea o le sologa lelei o isi filifiliga.
O ai o le a e filifilia lua te fegalegaleai?
O le a outou miōmiō faatasi ma le toatele o tagata lelei o e talitonu foi i le Atua. Pe o i latou o ni tagata Iutaia, Katoliko, Porotesano pe Mosalemi, ua silafia e tagata faatuatua e moni lava o loo i ai upumoni a’ia’i. O loo i ai i e talitonu i le Atua se iloatino. O e talitonu e usiusitai ma le lotomalie i tulafono faalemalo ma tulafono faalelagi, e oo lava i tulafono ia atonu e le faamalosia.
Faatasi ai ma lau tautinoga e usitai i tulafono faalemalo ma tulafono faalelagi, e te tu ai i se moli lanumumu, e tusa lava pe le o vaaia ni isi taavale. I le avea ai ma se atalii o le Atua e te iloa, e tusa lava pe le maua oe e leoleo, o le gaoi ma le fasioti tagata e sese, ma o le a iu ina faamasinoina ai oe e le Atua. Ua e silafia o taunuuga o le le usitaia o tulafono e le gata ina faaletino ae faavavau foi.
A o e soifua i lou olaga, o le a e masani foi i tagata o e e le talitonu i le Atua. O le toatele o i latou e le’i oo i le taimi latou te maua ai upumoni paia ma e le o iloa po o fea e su’e i ai. Ae o outou o le autalavou o le tofi tau tupu ua o mai e laveai i latou. I ni aofaiga toatele, ua outou taliaina le valaau a perofeta a le Atua mo ni faifeautalai se toatele. Matou te matuai faafetai mo outou uma taitoatasi!
A o outou femiōmiōa’i ma tagata le talitonu, ia nofouta atonu e i ai ni nai tagata e le popole moni mo lou manuia (tagai i le MF&F 1:16; 89:4). O le taimi lava e te iloatino ai lena mea, sola ese vave mai ai i latou ma aua nei toe foi atu i ai, (tagai i le 1 Timoteo 6:5–6, 11).
O le mea e faanoanoa ai, o le a e feiloai atu i tagata o loo latou matua saili faatapito se mea lea e foliga mai ia i latou o se fiafiaga, e ave ifo i latou i lalo i se tifato maseesee o le agasala. Ia faaeteete i lena tifato maseesee! O soo se tuinanau i le agasala o le a na’o sina taimi lava, ae o mafaufauga atuatuvale o le agasala ua faatumulia i le popole ma le ta’usalaga e faavavau. O le mimiloina faaamioleaga o le tuufaatasiga na mamanuina faalelagi e faatasia ai le tane ma le avā ua na o se mea noa taufaasese. O aafiaga faasāina e aveesea mai ai le uiga loloto ma mea matagofie e manatuaina.
Pe o le a e filifilia le saoloto po o le pologa?
Ua taape solo au a le amioleaga. O le mea moni o loo outou nonofo i teritori a le fili.7 Ua faateteleina le mala faataumaoi o ponokalafi. Na te maileia ai i latou uma o e gauai atu i ana mailei taufaasese.
O lenei mea na muai silafia e le Alii, lea na fetalai mai, “Ma o lenei ou te faailoa atu ia te outou se mealilo, o se mea lea o loo faia i totonu o potu faalilolilo, e aumai ai lo outou faafanoga i le āluga o taimi, ma sa outou le iloaina” (MF&F 38:13; tagai foi i le fuaiupu e 28).
Mafaufau po o le a le toatele o tagata o loo i totonu o potu faalilolilo o loo saili e faaumatia lou olaga ma lou fiafia! O faaosoosoga i le tino, e le o se mea fou. Na lapatai mai le Aposetolo o Peteru e uiga i lenei lava mailei ina ua ia tusia:
“Latou te maileia i tuinanau o le tino … o e na matuā sosola ese. …
“Ua latou folafola atu ia te i latou le saolotoga, a o i latou lava ua fai ma pologa o le amioleaga: auā pe a toilalo se tasi i se tasi, ua nofo pologa o ia ia te ia” (2 Peteru 2:18–19).
Aloese mai lena pologa, ou uso e, ma tuafafine pele. Afai o loo e matamata i polokalafi i le taimi nei, tuu nei loa! Saili le fesoasoani mai lou epikopo. E leai se tasi e lava sona poto na te faatoilaloina ai na o ia le fili, pe afai ua latou onanā i ponokalafi. E pei lona faataumaoi o le lepela, e faavaisu e pei o le fualaau oona o le [meth], ma e aati e pei o le vailaau malosi o le [lye].
Pe o le a e filifili e mulimuli i le Alii po o manatu faafilisofia o tagata?
Suesue ma le toto’a le “O Le Aiga: O Se Folafolaga i le Lalolagi.”8 Ua osofaia le aiga i le lalolagi atoa, ae o upumoni o le folafolaga i le aiga o le a faamalosia ai oe.
E tatau ona e malamalama i le ogaoga o taunuuga o le tetee o le lalolagi i le taimi nei i le faauigaga o le faaipoipoga. O le finauga i le vaitau lenei o le fesili lea pe mafai ona faaipoipo ni tagata se toalua o le itupa e tasi. Afai e i ai sau fesili e uiga i le tulaga o le Ekalesia e faatatau i lenei mea po o soo se faafitauli taua lava, ia mafaufau loloto i ai ma le agaga tatalo, ona gauai atu lea i savali a perofeta soifua. O a latou upu musuia, faatasi ai ma musumusuga mai le Agaga Paia, o le a avatu ai i lou mafaufau se malamalamaaga atoatoa ma moni.9
“O le finauga i le faaipoipoga ua na o le tasi lea o le mau feeseeseaiga o le a luitauina ai lou lumanai. I le faasagatau atu i leo malomaloā o le fili, o outou, i le avea ai ma tagata talavou o le tofi tautupu, o le a outou filifili e tutu atu mo le Alii ma Lana upumoni.
Na valoia e le Aposetolo o Paulo le tulaga pagatia o o tatou aso (tagai i le 2 Timoteo 3:1–5). O lana faaaliga sa’olele e uiga i le faatafunaga faaleagaga o o tatou aso, na sosoo mai ai ma lana faaiuga faamalosiau, e ta’u mai ai ia i tatou le ala e tumau ai i le saogalemu: “Talu foi ina o e tama itiiti ua e iloa Tusi Paia, e mafaia ona faapoto ai ia te oe e iu ai i le ola i le faatuatua ua ia Keriso Iesu” (2 Timoteo 3:15).
Ou te faaopoopo atu i lana fautuaga: Ia suesue pea i tusitusiga paia. Ia faia pea mea e atiae ai lou faatuatua ia Iesu Keriso. Ona mātau lea o filifiliga poto e ta’ina atu i ai oe e fai.
O lou faatuatua ia Iesu Keriso ma Lana talalelei o le a e maua ai le lototele e faaipoipo ma aumai ai fanau i totonu o lou aiga a o e talavou ma mafai ona e fanauina. A oo ina e matua e pei o a’u, o le a e faatauaina lau fanau, fanau a lau fanau, ma a latou fanau, e sili atu nai lo soo se lauiloa po o oa ia semanu e maua mai.
E faapefea ona e saunia mo lau faatalanoaga patino ma le Faaola?
O outou o le autalavou o le tofi tau tupu e le’i atoatoa i le taimi nei. E leai ma se tasi o i tatou ua atoatoa. O lea la, faatasi ai ma i matou uma, tatou te matuai faafetai mo le Togiola a le Faaola, ua aumaia ai le faamagaloga atoatoa pe a e salamo faamaoni. Ua e iloa foi o lou nofo ai iinei i le olaga faitino e fai si puupuu. I se taimi, o le a faauu ai outou uma taitoatasi mai lenei olaga maaleale ae agai atu i le lalolagi e sosoo ai.
O loo faatalitali mai le Aso Faamasino mo i tatou taitoatasi. Ua ou iloa “o le leoleo o le faitotoa o le Paia e Toatasi o Isaraelu; ma na te le faaaogaina se auauna iina” (2 Nifae 9:41). Ioe, o i tatou taitoatasi o le a i ai se faatalanoaga faaletagata lava ia ma Iesu Keriso.
O aso taitasi i le lalolagi e te maua ai le taimi ma le avanoa e saunia ai mo lena faatalanoaga. Faamolemole ia iloa le mea lenei: A e filifili e ola i le itu a le Alii, e le tuua lava na o oe. Ua tuuina mai e le Atua ia te oe le gafatia e maua ai Lana fesoasoani a’o e uia le auala sili ona lamatia o le olaga faitino. A o sasaa atu ma le filiga, ma le naunautai lou loto ia te Ia i le tatalo i aso taitasi, o le a Ia auina mai Ana agelu e fesoasoani ia te oe (tagai i le MF&F 84). Ua Ia tuuina mai le Agaga Paia ia i ai i ou autafa a o e ola agavaa. Ua Ia tuuina mai ia te oe tusitusiga paia ina ia e taumafa atoatoa ai i afioga a Iesu Keriso (tagai i le 2 Nifae 9:51; 32:3). Ua Ia tuuina mai ia te oe upu ia faalogo i ai mai perofeta soifua.
O ai o le a tuu i ai lou faatuatuaga?
Ua e iloa o le Atua o lou Tama. E alofa ia te oe. E finagalo o Ia ia e fiafia. Ia tuu atu lou faatuatuaga ia te Ia (tagai i le 2 Nifae 4:34; 28:31). Ia taula’i atu lau vaai i Lona malumalu paia.Ia e agavaa e maua ou sauniga o le faaeega paia ma le faamauga. Tumau i le faatuatua i na feagaiga, ma toe foi atu soo i le malumalu. Ia manatua, o lau sini tupito o le maua lea o le faamanuiaga silisili a le Atua, o le ola lea e faavavau (tagai i le MF&F 14:7). O sauniga o le malumalu e taua tele mo lena faamanuiaga (tagai i le MF&F 131:1–3).
Ou te valaaulia outou e suesue ma le agaga tatalo i le faamatalaga faatusitusiga paia o o outou faasinomaga, faamoemoega, ma faamanuiaga (tagai i le MF&F 86:8–11). Ioe, o outou moni lava o le autalavou o le tofi tau tupu, na foafoaina i le faatusa o le Atua. O outou o suli moni faaletulafono, ia tofotofoina ma suesueina. Talosia ia outou filifili e avea ma se malamalama i le lalolagi, e fesoasoani e laveai fanau a le Atua, ia maua le olioli, ma iu ai ina maua le faamanuiaga o le ola e faavavau.