Savali a Faiaoga Asiasi
O Uiga o Iesu Keriso: Atalii Usiusitai
Ia suesue ma le agaga tatalo lenei savali ma saili ia iloa mea e faasoa atu. O le a mafai faapefea e le malamalama i le soifuaga ma le matafaioi a le Faaola ona faateleina lou faatuatua ia te Ia ma faamanuiaina ai i latou o loo e tausia e ala i le faiaoga asiasi? Mo nisi faamatalaga, alu i le reliefsociety.lds.org.
Faatuatua, Aiga, Toomaga
O le mulimuli i faataitaiga a Iesu Keriso o le usiusitai, e faateleina ai lo tatou faatuatua ia te Ia. “Pe o se mea la e ofo ai,” o le saunoaga lea a Elder Jeffrey R. Holland o le Korama a Aposetolo e Toasefululua, “le filifilia muamua ma taulamua e Keriso e faamatalaina o ia lava e faatatau i lona tamā—e alofa ia te ia ma usitai ia te ia ma gauai atu ia te ia e pei o le atalii faamaoni sa i ai o ia? … O le usiusitai o le tulafono muamua lea o le lagi.”1
Ua aoao mai tusitusiga paia “a tatou maua se faamanuiaga mai le Atua, e maua i le usiusitai i lena tulafono ua faavae ai i luga” (MF&F 130:21). E tuputupu ae lo tatou faaleagaga a’o tatou faalatalata atu i le Atua e ala i le usiusitai, ma valaaulia le mana o le Togiola a le Faaola i o tatou olaga.
Na saunoa mai Elder D. Todd Christofferson o le Korama a Aposetolo e Toasefululua, “A tatou savavali i le usiusitai i mataupu faavae ma poloaiga o le talalelei a Iesu Keriso, tatou te olioli i se soloaiga faifai pea o faamanuiaga na folafolaina mai e le Atua i Lana feagaiga ma i tatou. O na faamanuiaga e maua ai punaoa tatou te manaomia e galulue ai nai lo le tau faagaoioia e galulue a’o tatou ola ai i le olaga. … O le usiusitai tatou te maua ai le pulea sili atu o o tatou olaga, o le mana sili atu e o mai ma o atu ai, e galulue ai ma fatufatua’i.”2
Mau Faaopoopo
Mai Tusitusiga Paia
E mafai ona tuuina atu i se isi tagata le malosiaga faaleagaga lea e maua mai i le usiusitai e le aunoa i poloaiga? o le fesili lea a Elder David A. Bednar o le Korama a Aposetolo e Toasefululua. “O le tali e manino lava … e leai.”3
O le faataoto i taupou e toasefulu o se faataitaiga lea o lenei mataupu faavae. E ui o taupou uma na ave a latou lamepa e “fetaiai ma le faatoafaiava,” ae sa na o le toalima sa popoto na ave suauu i a latou lamepa. O le isi toalima sa vālea aua “sa leai se suauu ia te i latou.”
Ona sau ai lea o le alaga i le tulua o po: “Faauta, ua sau le faatoafaiavā; inā o ia outou e faafetaiai ia te ia.” Na teuteu e taupou uma a latou lamepa, peitai sa leai ni suauu a taupou vālea. Sa latou fai atu i taupou popoto, “aumai ni a outou suauu ma matou; auā o le a mamate a matou lamepa.”
Na tali mai taupou popoto, “E leai; ne’i le lava ia i matou ma outou: ae o … ma faatau mai ni a outou.” Ma a’o ō taupou vālea, na sau le faatoafaiavā, ona o ai lea o taupou popoto faatasi ma ia, ona “pupuni ai lea o le faitotoa.” (Mataio 25:1–13).