Fautuaga Faaperofeta ma Faamanuiaga o le Malumalu
Saunia e Elder Koichi Aoyagi
O Le Fitugafulu
Ou te molimau atu a tatou tatalo mo le taitaiga, mulimuli i perofeta soifua, ma fai le malumalu o se mea e faamuamua i o tatou olaga, o le a taitai ma faamanuia i tatou e le Tama Faalelagi.
A o avea au ma se alii talavou, na asiasi atu ai i Iapani ia Elder Spencer W. Kimball (1895–1985), a o avea ma se tasi o le Korama a Aposetolo e Toasefululua, ma sa saunoa i se konafesi na ou auai. Ou te manatua pea lana fautuaga: “E tatau ona o tagata talavou i ni misiona, ma e tatau ona latou faaipoipo i le malumalu.”
Sa ou lagonaina le uunaia e le Agaga Paia ma tonu ai o le a ou auauna atu i se misiona ma faaipoipo i le malumalu, e ui lava ina sa le’i i ai se malumalu a Iapani i le taimi lena.
I le taimi lena, sa 19 o’u tausaga ma o lo’u tausaga lua lea i aoaoga i le iunivesite. Sa tetee malosi o’u matua, o e sa le o ni tagata o le Au Paia o Aso e Gata Ai i la’u faaiuga e auauna atu i se misiona. I aso uma, sa ou tatalo ai ina ia tuuina mai le la faatagaga ma faamanuiaga. O le ono masina mulimuli ane, na tali mai ai le Alii i la’u tatalo.
Na fai mai o’u matua ia te a’u, “Ua tatou feagai ma faigata tautupe, ma ua le mafai ona ma toe totogia lau aoga ma le tausiga o oe. “E amata atu nei ua tatau ona e tausia oe lava ia. E le afaina foi ia ma’ua pe afai e te alu i se misiona!”
Sa ou maua mai le faamanuiaga a o’u matua, o lea na ou le toe ā’oga ai, faia se misiona faakamuta i le Ekalesia, ona amata ai lea ona su’e sa’u galuega e maua ai se tupe mo se misiona talai. Faatasi ai ma le fesoasoani a le Alii, sa ou maua ai ni galuega se tolu! O aso uma lava sei vagana ai Aso Sa mo le tausaga na sosoo ai, sa ou tilivaina ai nusipepa mai le 3:00 i le vaveao seia oo i le 7:00 i le taeao, tapena ni fale mai le 9:00 i le taeao seia oo i le 4:00 i le afiafi, ma faigaluega o se kuka mai le 5:00 i le afiafi e oo i le 7:30 i le po. Ona sui lea o o’u lavalava ma ou galue o se faifeautalai a le itu i le po.
Ina ua 22 o’u tausaga, sa valaauina a’u i le Misiona a Matu i Sasae Mamao. E ala mai i la’u auaunaga faamisiona sa ou oo ai i le olioli silisili na ou lagonaina, maua ni avanoa se tele na ou iloa ai le alofa o le Atua, ma maua ni faamanuiaga se tele. Sa faamanuiaina foi lo’u aiga i le taimi o la’u auaunaga ina ua toe faaleleia luitau o mea tau tupe a o’u matua.
Mulimuli i le perofeta
Ina ua faamaeaina lau misiona, sa uunaia a’u e le Agaga e mulimuli i le vaega lona lua o le fautuaga a Peresitene Kimball ma aua nei faatuai le faaipoipo i le malumalu. I le tausaga na muamua atu, na amata fuafua ai e tagata o le Ekalesia i Iapani se malaga i le Malumalu o Sate Leki. Ona sa toe tolu masina alu le latou malaga, sa ou tatalo ma anapogi ina ia taitaiina atu a’u i se tamaitai talavou agavaa e mafai ona ou aveina atu i le malumalu.
O se taimi puupuu mulimuli ane sa ou auai atu ai i se gaoioiga a le Ekalesia i lo’u nuu o Matsumoto. A o o’u i ai iina, sa ou feiloai ai ia Shiroko Momose, o lē sa aoga i le aoga maualuga lea sa ou aoga ai foi ina ua ou auai i le Ekalesia. Sa vave ona faamautu mai e le Agaga o ia lea sa saunia lava mo au.
Na le’i leva ona ma tafafao faamasani ma Shiroko a’e ou fai loa i ai ma te faaipoipo. Sa ia faafiafiaina a’u ina ua ia taliaina, ae sa ia faateia au i lana tala na sosoo mai ai.
“Ua ou matua fiafia lava e iloa o lou Alii o lo’u Alii lea”, o lana tala lea. “Ina ua latou faasilasilaina mai le malaga i le Malumalu o Sate Leki, sa ou moomoo lava ou te fia alu ai. Sa tele taimi na ou tatalo ai ia fesoasoani mai le Alii ia te a’u e saili se tasi e mafai ona ou faaipoipo i ai iina. Pe a ma se tausaga ua mavae, na ou iloa ai e ala i le Agaga a o o’u tatalo, e tatau ona ou faatali mo oe ma o le a e faamalamalama mai ia te au pe a foi mai lau misiona.”
O se aafiaga maoae faaleagaga lena mo i ma’ua, ma na faamalosia ai la ma’ua faaiuga e faaipoipo i le Malumalu o Sate Leki. Sa itiiti se ma tupe na i ai mo le malaga, ae ma te lei faatagaina lena mea e faavaivaia ai i ma’ua. E oo ane i le taimi lena ua ma iloa a ma faalagolago i le Alii ma tausi Ana poloaiga, e fesoasoani mai o Ia ia i ma’ua e ausia mea na semanu e le mafai ona ma faataunuuina.
Sa ma ole atu i lo tatou Tama Faalelagi i le tatalo ma faia a ma’ua taumafaiga uma e saili ai le tupe na manaomia. O na taumafaiga faatasi ai ma le fesoasoani tautupe mai se tasi o uo a Shiroko, na mafai ai ona ma auai atu faatasi ma le Au Paia Iapani o e na malaga atu i le Malumalu o Sate Leki.
E le mafai ona faamatalaina le olioli na ma lagonaina i le faamauina o se ulugalii e faavavau. O le a le mafai lava ona ma faagaloina lena aafiaga. O le mea na faaopoopo mai i lo ma’ua olioli o le ma sailia lea o augatupulaga e lima o o ma’ua tuaa ma saunia o latou igoa mo galuega o le malumalu. A o ma i ai i le Aai o Sate Leki, sa ma faataunuuina ai sauniga sui mo na tuaa. O le faia o na sauniga na fesoasoani ma te lagona ai le latalata atu ia i latou. Sa ma iloaina sa faatumulia i latou i le fiafia ona o a ma’ua taumafaiga.
Sa avea i ma’ua o se ulugalii fou matitiva faatoa faaipoipoina, ae sa ave le ma faamuamua i le auai atu i le malumalu, ma mulimuli ane, sa fai ma ma o atu i le Malumalu o Laie Hawaii pe a talafeagai ai ma mea tautupe.
Faamanuiaina i le Malumalu
Na saunoa le Perofeta o Iosefa Samita, “E sili atu ona tatou manaomia le malumalu nai lo se isi lava mea.”1
I le ata o le faaolataga a le Atua, o le malumalu e taua i lo tatou fiafia e faavavau ona tatou te faia ai sauniga paia ma sauniga o le faaolataga iina. Ua ta’u mai e le Bible Dictionary, o le malumalu o le nofoaga tapuai e sili ona paia i le lalolagi ma o “se nofoaga e mafai ona afio mai ai le Alii.”2
Afai tatou te faamamaluina a tatou feagaiga o le malumalu ma o mai i le malumalu “ma ni loto maualalalo, i le mama, ma le mamalu, ma le amio sa’o,”3 o le a tatou lagonaina le Agaga Paia ma maua le malamalama ma le poto atili. Pe a tatou tuua le malumalu, o le a tatou tuua ua faaauupegaina i le mana mai le Alii ma Lona suafa i luga o i tatou, ma Lona mamalu e siomia ai i tatou, ma Ana au agelu e leoleo i tatou (tagai i le MF&F 109:13, 22).
Ina ua ma toe foi atu i Iapani i le ma’ea ai o le ma faaipoipoga, na faataunuu folafolaga a le Alii i lo’u olaga a o ou sueina se galuega tumau.
E Faataunuu e le Alii Ana Folafolaga
Sa na o sa’u galuega faavaitaimi na i ai i le taimi na fanau ai le ma tamaitiiti muamua. Sa ma matuai fiafia lava, ae na ou iloaina o le a le mafai ona ou tausia lo matou aiga lea na faasolo ina toatele e aunoa ma se galuega tumau. Sa amata ona ma tatalo faatauanau mo se fesoasoani a le lagi.
Ae ou te le’i alu atu i la’u misiona, sa ou fia faigaluega ai i se galuega i se atunuu i fafo. Ae ina ia faafaigaluegaina e se kamupani o matata eseese, o le mea masani e tatau ona avea se tagata talosaga ma se tagata faauu mai se iunivesite ma na umia ni tusipasi faapitoa. Sa le’i maea la’u aoga i le iunivesite ma sa leai ni o’u tusipasi, ae a o ma tatalo, sa ma lagonaina o le a faamanuia i ma’ua e le Alii ma saunia se galuega mo a’u.
Sa ou filifili e su’e i suega a tagata talosaga mo ni galuega a nisi o kamupani o matata eseese e ui lava i le le lava o a’u aoaoga. O kamupani muamua e lua sa le’i taliaina ai a’u, ae na i ai so’u aafiaga mataina ina ua ou talosaga atu i le kamupani lona tolu.
I Iapani i lena vaitaimi, sa toaitiiti lava ni tagata o le Ekalesia sa i ai, ma o le toatele lava o tagata sa faailoga tagata i le Ekalesia. Ina ua faatalanoaina a’u e ni sui se toatolu o le kamupani lona tolu, sa latou tilotilo i le talaaga o o’u tomai ma tulaga faaleaoaoga, ma iloa ai o au o se tagata o le Au Paia o Aso e Gata Ai. Sa amata ona latou fesiligia a’u e uiga i le Ekalesia, ma talosagaina mai ni tali auiliili. I lo’u faatoa foi mai ai i le misiona, sa leai se faafitauli i le talanoa atu e uiga i le Ekalesia toefuataiina a Iesu Keriso.
Mo se umi na le itiiti ifo ma le 40 minute, sa ou talanoa ai e uiga i le talalelei ma tuuina atu la’u molimau i le soifuaga o Iesu Keriso, le Liliuese, le Uluai Faaaliga a Iosefa Samita, le Tusi a Mamona, le Toefuataiga o le Ekalesia moni a Iesu Keriso, ma aoaoga a le Ekalesia.
Sa leai se tasi o le au faifaatalanoaga na taofia a’u a o ou tautala. I ni nai aso mulimuli ane na ofo mai ai ia te au e le kamupani se galuega i se totogi na tulaga ese le maualuga. Mulimuli ane, ina ua ou fesili atu i lo’u pule pe aisea na latou faafaigaluegaina ai a’u, sa ia tali mai, “I le taimi o lou faatalanoaga sa ou mauaina se faamautinoaga sa e mafaufau toto’a, faamaoni, ma faatuatuaina, ma o oe o se tagata o le a galue i se auala faapena mo la matou kamupani.”
Ou te molimau atu e faataunuuina e le Alii Ana folafolaga. I le taimi o lo’u faatalanoaga sa lagona le mana ma le Agaga o le Alii ia te au, e pei lava ona Ia folafola mai ia i latou o e auai atu i le malumalu ma faamamalu a latou feagaiga o le malumalu. Sa ou lagonaina foi Lona Agaga ia te au a o ou galue ai mo le kamupani, lea sa faamanuiaina au e fai ai ni saofaga taua se tele.
Ua Oo Mai Se Malumalu i Iapani
I se konafesi faalisone i Tokyo i le 1975, na fofogaina ai e Peresitene Kimball le fausiaina o le Malumalu o Tokyo Iapani. O le lofituina o le Au Paia Iapani i lagona ootia, na tau fai pati faatasi ai e faaali ai lo latou olioli ma le agaga faafetai.
Na faamaeaina le Malumalu o Tokyo Iapani i le 1980. I le taimi o le fale tatala ma sauniga o le faapaiaga, sa faamanuiaina le Au Paia i aafiaga faaleagaga matagofie ma le olioli tele. O na aafiaga na faaauau pea i le ma’ea ai o le faapaiaga o le malumalu a’o amata ona maua e le Au Paia o latou sauniga o le malumalu ma fai ma sui mo o latou tuaa ua maliliu.
I le taimi nei, ua toeitiiti atoa le 45 tausaga talu ona ma faaipoipo ma Shiroko, o la’u filifiliga e mulimuli i fautuaga faaperofeta o loo faaauau pea ona faamanuiaina ai o matou olaga ma olaga o le ma fanau. Ua matou fausia se fale matagofie i le ala a le Alii—ua faavaeina i luga o le talalelei a Iesu Keriso, e aofia ai feagaiga o le malumalu.
Ou te molimau atu pe a tatou tatalo mo le taitaiga, mulimuli i perofeta soifua, ma fai le malumalu o se mea e faamuamua i o tatou olaga, o le a taitai ma faamanuia i tatou e le Tama Faalelagi.