O le Lototele e Faaipoipo Ai
E alala le tusitala i Stockholm, Suetena.
Sa ou aoao e faaaoga lo’u faitalia e galue ai nai lo le tau faamalosia ina ia ou faia le faaiuga aupito sili ona taua o lo’u olaga.
Agavale: ata na tusia e Galina Peshkova; taumatau: ata na tusia e Olena Kyrian/iStock/Thinkstock
Ina ua ou toe foi mai i Suetena ina ua maea la’u misiona, sa ou tauivi mo se taimi umi ma le isi laasaga i lo’u olaga—faaipoipoga i le malumalu. Sa faamautinoa mai e le Agaga e tatau ona amata lo’u aiga ina ia avea ai a’u ma tagata e tatau ona ou avea ai. Sa matele lo’u taulai atu i le avea o lenei mea ma faaiuga aupito sili ona ta’ua o lo’u olaga, e ui ina sa ou lagonaina ua ou maua le soa e faavavau mo au, ma ua faamaonia e le Alii la’u filifiliga, ae sa masalosalo lava lo’u faatuatua. Na ma filifilia ma la’u uo teine o Evelina, se taimi mo le ma faamauga i le malumalu, faatulaga fuafuaga mo le ma tafaoga pe a uma le faaipoipoga, ma faatauina mai mama faamau a o lei faalauiloaina aloaia le ma faamauga—ona o lo’u fefe e faia se tautinoga i le faaipoipoga. Sa ou manao i le Tama Faalelagi e poloai mai ia ou faaipoipo ia Evelina ona sa ou fefe e tuuaia mo le faaiuga ina ne’i faamutaina le ma faaipoipoga. O le mata’u ma tatalo lē taialaina na ou le minoi ai i la’u filifiliga taua na faamalumalu mai pea.
O le Faitalia—o le Ala a le Alii
Na iu ina faia e uunaiga a le Agaga Paia se eseesega ina ia ou susueina le Mataupu Faavae ma Feagaiga 58:26–29: “Aua faauta, e le tatau ona ou poloai atu i mea uma; aua o ia o le e tau faamalosia i mea uma, o ia lava lea o se [paie]. …
“… E tatau i tagata ona auai ma le naunautai i se faamoemoega lelei, ma fai mea e tele i lo latou lava loto malie, ma aumai le amiotonu tele;
“Aua ua i totonu ia te i latou le mana lea ua latou pule ai ia te i latou lava. …
“Ae o ia o lē e lē faia e ia se mea seia poloaiina ai o ia, ma talia se poloaiga ma le loto masalosalo, ma ia tausia ma le paie, o ia lava lea e tausalaina.”
A o ou mafaufau loloto i nei fuaiupu, sa ou maua ai se malamalamaaga i le matafaioi a le faitalia i le fuafuaga a lo tatou Tama Faalelagi, lea na suia ai lo’u mafaufau, ma tuuina mai ai ia te au le lototele e agai ai i luma. Na aoao mai Elder Richard G. Scott o le Korama a Aposetolo e Toasefululua e faapea, afai tatou te maua le taitaiga musuia e aunoa ma se taumafaiga a le tagata lava ia, o le a tatou misia le “taua o le tuputupu a’e faaletagata lava ia” lea e oo mai “a o [tatou] taumafai e iloa auala ina ia taitaiina ai e le Agaga.”1
Mana e Agai ai i Luma
Ona tonu ai lea ia te a’u e faaaoga lo’u faatuatua ma faia se faaiuga, ma na faamanuiaina a’u e le Alii i le talitonu i lo’u gafatia e faia ai se faaiuga. Sa ou iloa ai sa tatau ona ou “auai ma le naunautai. … ma faia ni mea e tele i [lo’u] lava loto malie”—e aofia ai le faamau atu i se tasi.Ua uunaia e le Alii i tatou e faaaoga lo tatou mana i le avea ai o ni suli e pulea ai i tatou lava. O le faaaogaina o lenei mana o se vaega totonugalemu lea i o tatou olaga.
Ou te talitonu e sili atu le naunau mai o le Alii e silasila mai o tatou faaaogaina lo tatou faitalia nai lo le silasila mai o tatou faia i taimi uma ni faaiuga atoatoa. Peitai, ua Ia tuuina mai ia i tatou ni fesoasoaniga ina ia faia ai faaiuga lelei, aemaise lava pe a oo mai i le filifiliaina po o ai e faaipoipo i ai. E pei ona aoao mai Peresitene Spencer W. Kimball (1895–1985), “E le na o lagona e tatau ona faamautu atoatoa ai ni faaiuga, ae o le mafaufau ma le loto, e faamalosia e ala i le anapogi ma le tatalo ma manatunatuga loloto, o le a tuuina atu ai i se tagata se avanoa aupito maualuga o le fiafia i le faaipoipoina. E aumaia faatasi ai ma le osigataulaga, fefaasoaa’i, ma se manaomia tele o le le manatu faapito.”2
Ua tatou maua foi ni aoaoga faaletusi paia i le auala e maua ai faamautinoaga faaleagaga: “E ao ina e suesue i ai i lou mafaufau; ona ao lea ona e ole mai ia te au pe ua sa’o, ma afai ua sao o le a Ou faia ia mu lou loto i totonu ia te oe; o lea, o le a e lagona ai ua sa’o.
“Ae afai ua le sa’o, o le a e le maua ni lagona faapena, ae o le a e maua se mafaufauga papa” (MF&F 9:8–9). Ae peitai, e le o i tatou uma o le a oo i ai se mu i totonu o o tatou loto i le tali atu i faamautinoaga faaleagaga a le Alii. O i tatou taitoatasi e tatau ona aoao ia iloa o tatou lava ala faapitoa o le mauaina o nei faamautinoaga. 3 O le mulimuli ai i lenei mamanu, o le a tatou maua ai le faatuatua i o tatou gafatia e fai ai filifiliga.
Na silafia e le Tama Faalelagi manaoga o lo’u loto, agaga, ma le mafaufau. Na Ia tuuina mai ia te au nei upumoni, ia na faia ai se eseesega tele. Sa ma faaipoipo ma Evelina. Ua ma olioli nei i le tele o tausaga o le olaga fiafia faaleaiga, ma ua ma maua ni fanau aulelei se toatolu. Ou te matua faafetai lava i le Alii mo la’u molimau o le faitalia ma lana matafaioi i le faia o faaiuga aupito sili ona taua o le olaga.