O Le Totonugalemu o Lo’u Olaga

Saunia e Roberto Pacheco Pretel

E alala le tusitala i Arequipa, Peru.

Sa ou iloaina galuega a Keriso mai le Tusi Paia, ae pe na mafai moni ona Ia asiasi atu i le atu Amerika?

Ina ua atoa lo’u 18, na faataga a’u e lo’u tamā ou te papatiso i soo se ekalesia sa ou manao ai. Sa ou manao e auai i se lotu Kerisiano aua sa ou suesueina le Tusi Paia i nisi o aulotu ma talitonu ai ia Iesu Keriso.

I se tasi aso na valaaulia mai ai e se tamaloa o le matou aiga ni tamaitai faifeautalai se toalua i le matou fale. Sa la talanoa mai ma se tautinoga maumaututu i lo la’ua talitonu i le Tusi a Mamona o se tasi molimau ia Iesu Keriso, ma fai mai sa asiasi atu o Ia i le konetineta o Amerika.

I le taimi lena, sa faailoa atu i ai i lo’u manatu, atonu na sese i la’ua, ona e le’i i ai se taimi o lo’u olaga na ou suesue ai e uiga i lena mea. Sa maligi loimata o se tasi o tamaitai faifeautalai ma fai mai ia te a’u ma le agalelei, “Tuagane Roberto, o le mea moni e faapea e te le iloa e moni le Tusi a Mamona e le faapea ai ua ma sese. Ou te iloa e alofa Iesu Keriso ia i tatou ma sa i ai o Ia i lenei konetineta, ma sa Ia aoao mai Lana talalelei e pei ona sa Ia faia i le Nuu Paia.”

Sa la taumafai e fesoasoani mai ia te au i le tele o o’u popolega ma masalosaloga i le taimi o lena talanoaga muamua, ma na malilie o le a toe asiasi mai ia te au i le vaiaso na sosoo ai.

O le po lena sa amata ai ona ou susueina itulau o le Tusi a Mamona. A o ou faitauina le itulau autu, sa ou tosina atu i se fasifuaitau e tasi: “O Iesu o le Keriso, o le Atua e Faavavau, e faaali mai o ia lava i atunuu uma.” Sa ou faitau foi i le 3 Nifae 11 e uiga i le asiasiga a le Faaola i le atu Amerika, ma sa ou lagonaina se fiafia i lo’u loto. O lea na ou faia ai le mea sa ta’u mai e faifeautalai ia te au e fai: Na ou tootuli ma ole atu i lo’u Tama Faalelagi pe moni le tusi.

Ina ua uma le tatalo, sa ou lagonaina se filemu ma se iloatino o lea lava. Sa i ai se taimi sa ou faapea ai, o loimata o tamaitai faifeautalai na ou ootia ai ma mafua ai ona ou talitonu i la la’ua molimau. O lea sa faaauau ai ona ou faitauina le Tusi a Mamona seia oo ina te’a laitiiti le 4:00 i le vaveao. O taimi uma lava sa ou tatalo ai, sa ou lagonaina ma se malosi faateleina le faamautinoaga na afio mai Keriso i le atu Amerika, ma ua finagalo o Ia ia ou aoao atili e uiga i Lana talalelei moni.

I ni nai vaiaso, sa ou faaumaina ai le faitauina o le Tusi a Mamona ma lagonaina le tatau ona ou papatiso i totonu o le Ekalesia moni.

O le faitauina o le Tusi a Mamona na fesoasoani ou te latalata atili atu ai ia Iesu Keriso ma faia o Ia ma totonugalemu o lo’u olaga. Ou te matua faafetai lava ona o le tuu e le Faaola o faifeautalai ma Lana Ekalesia i totonu o lo’u ala.