Tuuina Atu o le Meaalofa Sili Ona Lelei
E alala le tusitala i Texas, ISA.
Sa ou tuuina atu i la’u uo le meaalofa aso fanau sili ona lelei na ia mauaina.
Ata na tusia e Taia Morley
Ina ua 13 o’u tausaga, sa saunoa mai le perofeta i tagata o le Ekalesia e faitau le Tusi a Mamona i totonu o le lima masina i le faaiuga o le tausaga lena, ma folafola mai ni faamanuiaga mo le faia o lena mea. I se tasi aso a’o faitau la’u tusi i luga o le pasi, sa saofai mai se teineitiiti e igoa ia Cynthia i o’u talaane ma fesili mai po o le a lena tusi. Sa ou fai atu o le Tusi a Mamona ma o se tusi faapitoa. Sa ou fai atu i ai sa ou manao ia uma ona faitau a o le’i uma le tausaga ina ia mafai ona ou maua faamanuiaga.
Sa amata ona ia faia mai nisi fesili, ma sa ou fai atu i ai, e mafai ona sau i lo’u fale ina ia mafai ona ma talanoa atili e uiga i ai. Sa ia taliaina la’u valaaulia, ma sa ma faaaluina le tele o ni itula i aso na sosoo ai e talanoa e uiga i le Tusi a Mamona ma le Ekalesia.
O le Aso Gafua na sosoo ai, sa ou valaauliaina ai o ia i le afiafi faaleaiga, lea sa ou faailoa atu ai o ia i faifeautalai. Sa amata ona la aoaoina o ia i lesona, ma sa amata ona sau i le lotu ma i gaoioiga uma a le autalavou ma isi sauniga a le Ekalesia.
Sa tonu ia te ia ua manao e papatiso, ma faatasi ai ma le faatagaga a ona matua, sa faapea ona papatisoina ai o ia i lona aso fanau i le tausaga lena. Sa fai mai o ia, o le meaalofa sili lea na ia mauaina. Sa auai lona tina ma nai ou tei i le papatisoga. Sa fai mai o ia ou te usuina le pese “O Le Agaga o le Atua” (Viiga, nu. 2), ma sa ia talosagaina lo’u tama e faia le papatisoga. Ina ua sau o ia mai le vai, sa ma feopoa’i ma fetagisi. O le a ou le faagaloina lava lena aso, aua sa ou lagonaina ai se fiafia tulaga ese.
O se tausaga mulimuli ane, na siitia ese ai lo’u aiga. Sa faigata ona sa mamae le ma faigauo ma Cynthia ma ni uso i le talalelei.
E ui lava ma te le o toe nonofo felata’i i le tasi ma le isi, ae o loo ma uo lelei pea. E ma te talanoa soo i le telefoni, ma talu ai nei sa ia valaau mai ai e ta’u mai na faalogologo lona tina i lesona a faifeautalai. O lenei mea sa ou fiafia ai lava, ona o le taimi muamua sa le fia faalogo lona tina i lesona. Fai mai Cynthia e i ai se aso e faamoemoe e o atu ai i le lotu ma lona aiga atoa. Sa ia faafetai mai ia te au mo le faailoaina atu o ia i le Ekalesia.