Sa Ma Mulimuli i le Ala

Rut de Oliveira Marcolino, Rio Grande do Norte, Pasila

E lei leva ona ma amata savavali atu i le alasopo ma te le’i masani ai, ae ma vaaia se tamaitai o savali mai ia i ma’ua. Sa le mafai ona ma ‘alo mai le matauina na tagi o ia.

I le eria mulimuli o la’u misiona, sa ma galulue ai ma la’u soa i ni afioaga se lua o loo i totonu o le setete o São Paulo, Pasila. I le va o afioaga e lua sa i ai se auala alo e ui atu i le togavao ma te le’i ui ai lava ona sa ma manatu e lamatia ma ailoga matou te fetaui ai ma se tagata iina.

I se tasi aoauli a o ma latalata atu i le auala alo, sa uunaia a’u e le Agaga Paia, ma ta’u mai e tatau ona ma o atu i le togavao. Sa ou tilotilo atu ia Elder Andrade ma ta’u atu ia te ia e uiga i le uunaiga na faatoa ou maua. Na ia fai mai sa ia lagonaina foi lea lava mea e tasi.

E lei leva ona ma amata savavali atu i le alasopo ma te le’i masani ai, ae ma vaaia se tamaitai o savali mai ia i ma’ua. Sa vaapiapi le auala, ma a o matou fepasia’i, sa ma matauina na tagi o ia.

Ina ua ea a’e o ia i luga, sa ia valaaulia i ma’ua e mulimuli atu ia te ia i lona fale, lea sa ma feiloai ai i lana tane. O le taimi lava lena na amata ai ona ma aoaoina le ulugalii na fiailoa le talalelei. Ina ua mavae ni nai vaiaso sa ma valaauliaina i laua ina ia papatisoina. Sa ma fiafia ina ua la vave taliaina, ona ua atoa le tausaga talu ona faia le papatisoga mulimuli a le uarota. Sa ma faafetai ona sa ma faalogo i le uunaiga e ui atu i le auala alo i lena aso.

Ae peitai, o se taimi na le’i toe umi oo i le la papatisoga, ae fai mai le fafine e fia talanoa ia i ma’ua. Fai mai o ia, ua tele tausaga o miti lava i le mea e tasi. I lana miti, sa i ai o ia i le nofoaga autu o São Paulo. Na oo atu se tamaloa matua atu ma fai atu ia te ia, e toalua ni alii talavou o loo o mai e suia lona olaga. Ona ia vaaia lea o ni alii talavou se toalua o o atu, ae o taimi uma lava e gata ai iina lana miti.

I se tasi aso i ni nai vaiaso na muamua atu, sa salu lona fale ae ta’u atu e se leo ia te ia ua o atu alii talavou e toalua, ma e tatau ona alu atu loa lava i le taimi lena i le auala alo, lea na ma vaai muamua ai ia te ia. O le le malamalama i le uunaiga ae sa manao e fia iloa le tali o lana miti, sa faataatiaese ai lana salu ae savali atu i le alasopo.

A o savali o ia, sa oo atu vaaiga o lana miti i lona mafaufau e faapei o se ata tifaga, lea na faaiuina i le vaai i foliga o alii talavou e toalua. Sa ia vaaia foi na tofu i laua ma se pine uliuli o o la’ua igoa. Fai mai o ia, e le’i umi, ae ma oo atu ma Elder Andrade i ona luma i le alasopo. Sa lofituina o ia i le ootia, ma sa le mafai ona taofiofi lona tagi.

I le taimi nei, o le manatuaina o lena aafiaga paia, ua ou lagonaina le Agaga ma toe vaaia ai i lo’u mafaufau foliga loimatā o lena tuafafine o lē na taliaina le talalelei. O le mea na faafetai ai, sa ma mataala ma la’u soa ma lototetele e mulimuli i le ala na finagalo le Alii ma te uia i lena aso.