Auala e Ausia ai Sini e Faavavau

Saunia e Elder Robert D. Hales

O Le Korama a Aposetolo e Toasefululua

Mai se saunoaga na tuuina atu i le Iunivesite o Polika Iaga-Idaho i le aso 11 o Tesema, 2004.

Ou te fia fautuaina atu ni nai sini aupito sili ona taua i le olaga, o le a e maua ai le olioli a o e faataunuuina lau misiona i lenei lalolagi—sini e faavavau o le a fesoasoani e toe foi atu ma le mamalu i lou Tama oi le Lagi. E aofia ai:

1. Faaipoipo i le malumalu ma atiina ae sootaga faaleaiga e faavavau e ala i le faapaleniina ma le agaga tatalo o le tele o mea o le olaga, e pei o le aiga, galuega, faaauauina o aoaoga, gaoioiga e fiafia i ai, ma faafiafiaga.

2. Ia ola faamaoni ma usiusitai i lau tapuaiga ma faamaoni i au feagaiga o le papatisoga ma le malumalu, ia le aunoa ona faatauaina mea lelei o le olaga.

3. Taofimau pea i le vaaiga e faavavau, ia manatua o mea o le malo e faavavau ma le mea o le lalolagi e faaletino, pe le tumau.

4. Ia manatua e tuuina atu auaunaga tuuto i lou olaga atoa ma ia le aunoa ona tausia ē le tagolima o e atonu e manaomia lou alofa ma isi fesoasoaniga.

O sini nei o le olaga atoa e manaomia le taulai atu i ai ma e umi se taimi e ausia ai. E lē lava le na ona fai o nei sini; ae e tatau ona tatou faia se fuafuaga e faataunuu ai.

O le po nanei po o taeao ia mafaufau loloto i mea e te manao e ausia i lou olaga ae o a foi au sini e tatau ona i ai. Faaalu se taimi e tusi i lalo ma iloilo na mea i le gasologa o tausaga o lumanai. Ona faaalu lea o ni nai itula e te fesili ai ia te oe lava, po o a ni mea e mafai ona e faia e faataunuu ai nei sini i le asō, taeao, vaiaso a sau, ma i masina o lumanai.

E faapefea ona e filifilia ma faamatalaina nei sini taua e faavavau? Ma, e tusa ai foi ma lona taua, e faapefea ona e faia se fuafuaga e ausia ai? Ia manatua: o le taimi o le elemene autu lea—e taua tele—i au fuafuaga. Mai le tulaga o loo e i ai nei, atonu e foliga mai e te matuai le iloa po o le a le umi o se taimi e ausia ai nei mea e faavavau.

E i ai taimi o tagata uma; e moni. Ae e le faapea la o le mavae atu o le taimi o lo tatou alualu foi lea i luma.

“O le olaga lenei o le taimi lea mo tagata e saunia ai e feiloai ma le Atua; ioe, faauta o le aso o le olaga lenei o le aso lea mo tagata e fai ai a latou galuega” (Alema 34:32).

O le mea lilo, o le filifili lea ma le atamai o na gaoioiga ia o le a fesoasoani ai ia i tatou ia ausia a tatou sini musuia mai le lagi, ona tatou maua ai lea o le malosiaga o uiga faaalia ma le talitonuga maumaututu e lafoai ai mea o le a faalavefau pe taotaomia ai i tatou mai lo tatou taunuuga e faavavau.

Ou te molimau atu o le a lava lou taimi i le lalolagi e faataunuu ai au sauniuniga ma faatino galuega o le misiona o lou olaga—pe afai e te faaaogaina ma le tatau lou taimi. Ma e leai se taimi e sili atu ona lelei e faia ai lena mea nai lo le taimi nei, i lou talavou (tagai i le Alema 37:35).