Na fetalai le Faaola o le agaga o finauga e mai le tiapolo (tagai i le 3 Nifae 11:29). O le a le eseesega i le va o le le ioe ma le fefinaua’i?
O le mea masani mo tagata le eseese o o latou manatu, ma e i ai taimi e manaomia ai e soo o Iesu Keriso ona tutu atu e tetee i le itu agai mo mea tatou te talitonu i ai. Ae e manaomia ona tatou faailoa atu lo tatou tulaga i se auala lelei ma sao e aunoa ma le ita, tiga, po o le le mafaufau. E faapefea la ona tatou aloese mai feeseeseaiga faafinau?
Atonu ua outou faalogo e mafai ona tatou “le ioe e aunoa ma le fefinaua’i.” O le aloese mai finauga e amata i ou faamoemoega ma manaoga. Fai mai le mau e “na o le faamaualuga lava e tupu ai le misa” (Faataoto 13:10). Afai e sili atu lou popole i le “manumalo i se feupuaiga” po o “i [lou] sa’o,” e toetoe lava a mautinoa le sosoo atu ai ma le agaga o finauga.
Na aoao mai e Elder Russell M. Nelson o le Korama a Aposetolo e Toasefululua, nisi o auala e aloese ai ma finauga: (1) “faaali atu le popole alofa mo isi”; (2) “taofiofi le manao e tautala atu pe tusitusi faafinau mo lou lava viiga po o le mamalu”; ma le (3) “i le usitai lotomaualalo, ia [alofa] moni i le Atua.”1 Ona mafai lea ona i ai le Agaga o le Alii ma i tatou, ae le o le agaga o finauga.