Ofoina atu e se Aposetolo se Fautuaga e uiga i Ala o Faasalalauga Faaleagafesootai

“E amata atu i lenei nofoaga i le aso, ou te apoapoai atu ia te outou ina ia faatumulia le lalolagi i savali ua tumu i le amiotonu ma le upumoni, o savali e moni, faagaeetia, ma tauleleia, ma ia faatumulia ai le fogaeleele e pei o se lolo,” sa saunoa ai Elder David A. Bednar o le Korama a Aposetolo e Toasefululua i se lauga o le Vaiaso Aoga a le Iunivesite a Polika Iaga i le aso 19 Aokuso, 2014.

“Ou te tatalo o le a le na o lo tatou auai i se lologa lea e vave ona faatupulaia ma vave ona toe mouese atu,” sa ia saunoa mai ai i se savali lea sa taulai atu i le mana o ala o faasalalauga faaleagafesootai e fesootai atu le upumoni. Sa ta’ua e Elder Bednar lo tatou vaitaimi o se “vaitau tulagaese i le talafaasolopito o le lalolagi,” lea ua faamanuiaina ai i tatou i “se faagasologa alualu i luma o taulagalaga ma fatufatuga lea ua mafai ai ma faanatinaiina le galuega o le faaolataga.”

“Pe a ma le 40 pasene o la tatou autau faafaifeautalai i le lalolagi atoa ua le o toe mamao ae faaaogaina ia masini faafuainumera e avea ma meafaigaluega i le galuega o le liua, faatumauina, ma le faatoaagaina mai,” sa ia saunoa mai ai. “Ou te mautinoa ua tatou iloaina foi le auala ua faateleai ai e tekinolosi le galuega o talafaasolopito o aiga ma le malumalu, suesuega a le tagata lava ia ma aiga o tusitusiga paia o le talalelei toefuataiina, ma ua mafai ai ona tatou aoao, vaai, ma tofo i le lalolagi i ni auala mataina.”

Sa ia faasino i ni taumafaiga o ala o faasalalauga faaleagafesootai talu ai nei lea e aofia ai le vitio o le Eseta na gaosia e le Ekalesia, Because of Him, ma sa silia ma le faalima miliona ona maimoaina i atunuu ma teritori e 191, o le faailoga #didyouthinktopray, lea na oo atu i le silia ma le 40,000 talanoaga e uiga i le manaomia o le tatalo.

O nei mea ma isi taumafaiga ua “na o sina tamai sinasina,” sa ia saunoa ai, valaau atu i Au Paia o Aso e Gata Ai ina ia “fesoasoani e faaliliu le sinasina i se lolovai.” Sa ia saunoa mai foi afai e faaaoga le ala o faasalalauga faaleagafesootai:

• “E le tatau ona tatou soona faateleina se mea, faalautele, pe faafoliga i se isi, po o se mea e le o avea ai i tatou. E tatau ona faatuatuaina ma anoa a tatou anotusi.”

• “O a tatou savali e tatau ona faagaeetia ma siitia, nai lo le tauupu, finau, faasala, po o le faamaasiasi.”

• “Ia lototele ma lototoa, ae le o le faamaualuga, i le lagolagoina ma le puipuia o o tatou talitonuga, ma aloese mai le finauga. I le avea ai ma soo, o la tatou faamoemoega o le faaaoga lea o alaata o ala o faasalalauga faaleagafesootai e avea o ni auala o le puipuiga o le malamalama ma le upumoni o le talalelei toefuataiina a Iesu Keriso.”

• “Ua tele naua taimi e mafai ona faamaumauina, tele naua mafutaga ua afaina pe ua faaleagaina, ma ua mafai ona faalavelave le faaaoga sese o tekinolosi i mamanu o le amiotonu. E le tatau ona tatou faatagaina e oo lava i le faaaogaaga lelei o ala o faasalalauga faaleagafesootai e pulea le faaaogaina lelei ma sili atu o o tatou taimi, malosi, ma punaoa.”

• “E le tau manaomia le avea o i tatou ma ni tagata ua atamamai i ala o faasalalauga faaleagafesootai. Ma e le manaomia lo tatou faaaluina o le tele o le taimi i le fatuina ma le faasalalauina atu o savali faigata.”