O Tatou Aiga, O Tatou Auaiga
O Le Auala i se Aiga Faavavau
O tusitala e mai i Alaska, ISA, ma o loo auauna atu i se misiona i Toga.
O le taimi lava na liliu mai ai, sa naunau ai lava le aiga o ‘Akau’ola ia oo atu i le malumalu.
Ata na tusia e James L. Johnson; ata pue mai faaaloaloga a tusitala
I le taeao o se tasi o Aso Sa, ina ua uma se inugapia ma se inuga ‘ava ma ni uo i se taimi umi o le po, sa toe foi atu Siope ‘Akau’ola o Toga i le fale ae ona vaaia ai se aiga o laei ni ofu lelei o le Aso Sa. Sa talitaliē ma talanoa a o latou savavali faatasi. Sa mafaufau Siope pe o le a se mea ua mafua ai ona latou fiafia, o lea na ia mulimuli ai ia i latou e vaai po o fea na o i ai.
Na vaai atu Siope ua ulufale le aiga i se falelotu o le Ekalesia o le Au Paia o Aso e Gata Ai. Sa ia autilo atu i le faamalama a’o taunuu atu isi tagata. Sa vaaia le fiafia o susulu mai i o latou foliga a o saofafai faatasi aiga ma pepese i viiga tapuai.
Sa faasolo mafaufauga o Siope i lona toalua, o Liu. O le alofa lea na la lagonaina i le taimi muamua na la faaipoipo ai ua mou atu. Na manao Siope e toe maua mai lena alofa. Sa ia faanatinati atu i le fale ma ta’u atu i lona toalua ua ia maua le ala e fesoasoani ai ia manuia lo latou aiga: e tatau ona latou auai i le Ekalesia.
O lena lava aso na alu atu ai Siope i le maota o le epikopo i lona nuu. Sa iloa e le epikopo ia Siope, na vaai o onaonā solo i le alatele. A o la talanoa, na vaaia e Siope le masalosalo i foliga o le epikopo, ae sa mausalī lava lana faaiuga; sa ia ta’u atu ma le le fefe i le epikopo ua manao e papatiso. Sa tu le epikopo, valaaulia Siope i totonu [o lona maota], ma amata ona aoao atu ia te ia le talalelei a Iesu Keriso.
Sa musu Liu i le taimi muamua ae na vaavaai atu i le suiga malie o lana tane mo le lelei. Sa amata ona faaalu e Siope ni taimi se tele ma le la fanau ma faaali atu le alofa faateleina i lona toalua ma le aiga e ala i ana amioga. O lea na amata ai loa ona fai lesona a Liu, ma e lei umi ae papatisoina loa i la’ua.
A o lata ina atoa le tasi o le tausaga talu ona la papatiso, sa mafaufau le aiga o Akau’ola i faamanuiaga matagofie o le malumalu. Na fai mai Siope, “Afai e sili atu le maoae o faamanuiaga o le malumalu nai lo o faamanuiaga ua matou mauaina mai le papatisoina, se’i manatu la i le matagofie tele o faamanuiaga o le malumalu.” E ui i lo latou mananao ina ia faamauina, ma ona sa faia ni galuega mo le toe faafouina o le malumalu i Toga, o lea o le a latou faatali ai i le sili atu ma le tausaga, pe fai foi se malaga taugata i Niu Sila po o Fiti e auai atu ai i le malumalu.
Sa mafaufau loloto le aiga ma tatalo mo se mea e tatau ona fai. Na iu ina latou filifili e fai se nonogatupe laitiiti. A o faatali mo le faamaonia [o le nonogatupe], sa faapea ona faatamaia le faletupe sa faagasolo ai le latou nonogatupe i se malaia. O le a tolopoina uma nonogatupe seia oo i le tausaga na sosoo ai.
Sa lagona e Siope ma Liu le lotovaivai. Sa latou nonofo faatasi i lo latou potu malolo laitiiti ma tatalo mo se vavega. A o latou tatalo ma fefautuaai faatasi, na oo mai le tali: “Sa ou vaai faalemafaufau i le veni a le matou aiga o ataata mai ia i matou, ma na ou iloa ai o le tali lea i a matou tatalo,” o le tala lea a Siope. Sa mafai ona latou faatauina atu le veni i le aso na sosoo ai, ma faatau ai ni pepa malaga i le vaalele i Fiti mo lo latou aiga e toalima.
Sa latou taunuu atu i Nadi, Fiti, i le leva o le po, faatasi ma se fanau lelavava e toatolu ma se tietiega umi o loo loma latou te o atu ai i le malumalu i Suva. Fai mai Liu, “Sa ou iloaina, o le tele lava o lo matou taumafai ina ia latalata atili atu i le maota o le Alii, o le tele foi lea o le taumafai o Satani ia matou faavaivai ae matou te le’i mauaina le faamanuiaga.”
A o saofafai ai i le malae vaalele ma taumafai e filifili po o le a le isi mea o le a latou faia, sa faapea ona fesoasoani atu ia i latou se tamaitai e faafesootai le mea e faamautu ai ma le auala e malaga atu ai i Suva i le aso na sosoo ai i se tau taugofie nai lo o le tau na masani ona i ai. Sa latou lagonaina na auina mai e le Atua se agelu e fesoasoani ia i latou.
Sa latou taunuu i le malumalu i le aso na sosoo ai. “A o matou ulu atu i le malumalu, sa ou lagonaina se filemu ma se toafimalie i lo’u loto,” o le tala lea a Liu. “Ou te lei vaai muamua i se mea na sili ona mamā ma pa’epa’e e pei o totonu o le malumalu. Na oo mai se manatu i lo’u mafaufau: Afai o le malumalu o se fale na faia e le tagata ma ua ese le matagofie, ai lava se mataina o le maota ua folafola mai e le Tama Faalelagi mo i tatou!”
O lo latou aafiaga i le malumalu na suia ai olaga o le aiga. Fai mai Liu, “O le taimi atoa na matou i ai i Fiti, sa ou vaaia ai le alofa o lo tatou Tama Faalelagi ia i matou. A tatou filifili e mulimuli ia te Ia, Na te vaaia lelei i tatou.”
Sa faaauau pea ona oo mai faamanuiaga matagofie mo le aiga o Akau’ola ina ua latou toe foi mai. Sa maua uma e Siope ma Liu ni sikolasipi i le iunivesite, maua ni tikeri faafaiaoga, ma sa faafaigaluegaina i le Aoga Maualuga a Liahona.
A o faiaoga ai, sa amata ona la matauina ni tamaiti na manaomia se nofoaga e nonofo ai. O nisi taimi e taitoatasi, ae o le tele o taimi e taitoalua ma taitoatolu, na amata ona tu’itu’i atu tamaiti i le faitotoa o Siope ma Liu. Ma sa ave i latou e Siope ma Liu latou te nonofo faatasi. O le taimi nei e toa 20 tagata o loo nonofo i si o latou fale laitiiti. E i ai isi a la tamaiti e toalima na “vaetamaina” o e ua o ese atu e aooga i le kolisi pe auauna atu faamisiona.
Ua iloa e Siope ma Liu o nei tamaiti o le a tutupu ae ma manuia pe a faaali atu i ai le alofa ma le faavae i o latou olaga. O i latou o e sa le o ni tagata o le Ekalesia ua taliaina le talalelei ma o loo faatupulaia pea lo latou mananao e auauna atu faamisiona. E valaau e Siope ma Liu ia tamaiti uma o loo i lalo o le la tausiga o le la fanau, ae e valaau e tamaiti uma ia Liu ma Siope o Tina ma Tama. Ua iloa e le auaiga o Akau’ola ua matuai faamanuiaina i latou ma e fiafia lava e faasoa atu nei faamanuiaga i isi.