Seia Tatou Toe Feiloai
E Mafai Faapefea Ona Ou Iloa Ua Faamagaloina A’u e le Alii?
Mai le “Ia Outou Tutu i Nofoaga Paia,” Ensign, Iulai 1973, 122.
E faapefea ona e tali atu i se tasi na sau ia te oe ma fesili mai i lena fesili?
I ni nai tausaga ua mavae sa ma saofafai ai ma Peresitene [Marion G.] Romney [1897–1988] i lo’u ofisa. Sa matala mai le faitotoa ma sau i totonu se alii talavou lelei ma se vaaiga atuatuvale i ona foliga, ma fai mai, “Uso e, o taeao o le a ou alu ai i le malumalu mo le taimi muamua lava. Na ou faia ni mea sese i le taimi ua mavae, ma ua uma ona ou alu i lo’u epikopo ma lo’u peresitene o le siteki, ma na ou ta’u mama i ai mea uma; ma ina ua mavae se vaitaimi o le salamo ma le faamautinoaga ou te le’i toe foi atu i na mea sese, ua la’ua fofogaina mai nei ua ou saunia e alu atu i le malumalu. Ae, uso e, ua le lava lea. Ou te fia iloa, ma e faapefea ona ou iloa, ua faamagaloina foi a’u e le Alii.”
O le a sau tali i se tagata o le a sau ia te oe e fesili atu lena fesili? A o ma mafaufau loloto mo sina taimi, sa ma manatua le saunoaga a le Tupu o Peniamina o loo i le tusi a Mosaea. O se vaega lenei o tagata o e na talosaga mo le papatisoga, ma na latou fai mai na latou vaaia i latou lava i lo latou tulaga faaletino:
“Ma sa latou alalaga uma leotele i le leo e tasi, fai mai: E, ia alofa mutimutivale mai ia, ma faaaoga le toto togiola o Keriso ina ia mafai ai ona matou maua le faamagaloga o a matou agasala, ma mafai ona faamamaina o matou loto. …
“… Ina ua uma ona latou tautatalaina o nei upu, sa afio ifo i o latou luga le Agaga o le Alii, ma faatumuina i latou i le olioli, ina ua latou mauaina se faamagaloga o a latou agasala, ma ina ua latou maua le filemu” (Mosaea 4:2–3).
Sa i ai iina le tali.
“Afai o le a oo mai le taimi ua maea ai mea uma e te mafai ona e faia e te salamo ai i au agasala, po o ai lava oe, ma po o fea foi o loo e i ai, ma ua uma ona e toe faaleleia ma toe totogi atu i mea uma e tusa ai ma lou iloa; afai o se mea e aafia ai oe i le Ekalesia ma ua uma ona e alu i e o i ai le pule, ona e manao ai lea i se tali e faamaonia ai pe mata ua talia oe e le Alii. I lau sailiga ia te oe lava, afai o loo e saili ma maua lena toafilemu o le mafaufau, ma o le faailoga lea e te iloa ai ua talia e le Alii lou salamo. O le a manao Satani ia e mafaufau i le isi itu ma tauanau ai oe i nisi o taimi e faapea, o le faia ai o le mea sese e tasi, atonu o le a e faia ai pea lava pea ma e le toe mafai ona e lafoaia. O se tasi lena o mau aupito sili ona sese. O le vavega o le faamagalo atu o loo avanoa ia i latou uma o e liliu ese mai a latou amioga leaga ma le toe foi atu lava i ai.