Tatou te Tautalatala e uiga ia Keriso
Se Itula e Mataala faatasi ai ma Ia
E alala le tusitala i Ica, Peru.
I se tasi aso na ou sauni ai e tuuina atu se tautalaga i le sauniga faamanatuga. Sa ou suesue i le tusiga “O Le Togiola a Iesu Keriso” na saunia e Elder Jeffrey R. Holland o le Korama a Aposetolo e Toasefululua i le Liahona o Mati 2008. I lana tusiga, na faamatala ai e Elder Holland se miti a Elder Orson F. Whitney (1855–1931) lea na ia vaai ai i le Faaola i le Faatoaga o Ketesemane. Na faamatalaina e Elder Whitney ia tiga ma puapuaga na ia vaaia o onosa’ia e le Faaola. Ona ia tusia lea:
“E le’i umi ae tulai o Ia ma savali atu i le mea na tootutuli ai [le] au Aposetolo—ua momoegapepe! Sa Ia fagufagu lemu i latou, ma faafeala, ma i se leo o le aoaiga agavaivai, ma le le faaalia o se ita po o le otegia, na fesili atu ai ia i latou pe le mafai ea ona latou mataala faatasi ma Ia i se itula e tasi. …
“O le foi atu i Lona nofoaga, na toe tatalo ai o Ia ma toe alu atu foi ma maua atu ua toe momoe foi i latou. Sa Ia toe fafaguina i latou, apoapoa’i atu ia i latou ma toe foi atu ma tatalo e pei ona sa faia muamua. Na faatolu ona tupu lenei mea.”1
A o ou faitauina lenei mea, na oo mai le agaga o faaaliga i lo’u mafaufau. I lena lava taimi, sa ou iloaina ai o le ala e mafai ona ou “mataala faatasi ai ma Ia i le itula e tasi” sa i ai i le ala ou te taulimaina ai le sauniga faamanatuga i Aso Sa taitasi. Talu mai lena taimi, ua ou aoaoina ai o se itula lenei e mafai ona tatou tatalo atu ai i lo tatou Tama Faalelagi i se auala e sili atu ona anoa. O le tatalo e taua i taimi uma, ae o le i ai o le Agaga i lena itula o le faamanatuga o se avanoa e siitia ai i tatou lava e latalata atili atu i le Tama Faalelagi ma lo tatou Faaola, o Iesu Keriso. A taulai atu o tatou manatu i le Alii, i se tasi itu, o loo tatou i ai faatasi ma Ia i lena taimi o le tiga lea na Ia onosaia a’o tauaveina i Ona lava luga a tatou agasala. O se taimi e faailoa atu ai le tiga na Ia puapuagatia ai mo i tatou.
E taua tele le sauniga faamanatuga ia te au. Ia te au, o le itula lea o le faaolataga e le iu. Ua avea o se taimi paia lea ou te manatua ma tuuto ai i le tatalo ma i le agaga e faamamalu ai au feagaiga, ma mulimuli i le faataitaiga atoatoa o lo’u Faaola. Ou te iloa o loo soifua o Ia ma alofa ia te au. Ou te iloa ua na o Lana taulaga ma Lona toto lea na faamaligiina, e mafai ona faaolainaina ai i tatou uma. Ou te iloa e moni lenei mea aua a o ou galue i le “mataala faatasi ma Ia,” ua faapea ona faamalamalamaina ai lo’u malamalama, ua faamanuiaina ai lo’u olaga, ma ua loloto atili ai la’u vaai mamao e uiga i le ola e faavavau i Lona afioaga.