Ua Faatuina e le Lui o le Faavasegaina o Igoa se Talafaamaumau

Sa faatuina e tagata auai i le Lui o le Faavasegaina o Igoa Faavaomalo se talafaamaumau fou mo le toatele naua o tagata auai i le faavasegaina o igoa i luga o le Initoneti i le aso e tasi. O se aofaiga e 66,511 volenitia na o i luga o le Initoneti i le aso 22 Iulai, 2014, e maimoa i ata o talaafamaumau faasolopito ma tusia le faamatalaga ina ia faaaofia ai i le utofaamatalaga sailiili i le FamilySearch.org. O le faamaumauga e tasi le aso lea sa i ai o volenitia e 49,025 sa faatuina ia Iulai 2012 i le vevela o taumafaiga o le faavasegaina o igoa a le I.S. Census i le 1940.

Na maua mai ai foi i le lui le aofaiga maualuga lona lua tuufaatasi (faavasegaina po o le siakiina) o talafaamaumau ua auina atu, e sili laitiiti atu lava i luga ma le 5.7 miliona. (O faamaumauga taitasi e faavasegaina e volenitia e toalua ma toe iloiloina e se volenitia lona tolu, ua iloga o se tagata e siakia, e faamautinoaina le lelei ma le sa’o.)

“Sa auai a matou tagata o le au paia, talavou ma matutua, ma se loto fiafia,” na fai mai ai Epikopo Crouet i Toulouse, Farani. “O se aafiaga ina a matagofie.”

Fai mai Christopher Jones o Uelese, “Sa faatulagaina la matou afiafi faaleaiga ina ia mafai e i matou uma ona faavasegaina ia igoa—lua matua ma tamaiti e toafitu mai le 18 tausaga i le 5 tausaga. Sa tauina mai e i latou uma, i le avea ai ma se aiga sa matou faavasegaina ni igoa e silia ma le 900 faamaumauga!”

Fai mai Natalie Terry o Bangkok, Taialani, e fiafia o ia e auai i le aso o le faavasegaina o igoa i le lalolagi atoa faatasi ai ma lana tama teine e 13 tausaga. Ma sa fai mai Chris Shead o Chorley, Egelani, sa mafai ona ia maua pe a ma le 30 igoa fou o aiga, e aofia ai “se teineitiiti na maliu i se taimi faatoa mavae lona papatisoga ma sa pau i avanoa i le va o faamaumauga o igoa.”