O Lenei Galuega Ofoofogia
Pe a e faalogo ai i le upu o atu, o le a se mea e te mafaufau i ai? O se vaa ua sauni e folau? Auai i se faamoemoega sili? O le amataga o se faigamalaga?
Pe a outou “o atu i le galuega a le Atua,” ua outou auai i le faigamalaga silisili ona maoae. Ua e fesoasoani i le Atua e faanatinati Lana galuega, ma o se aafiaga maoae, fiafia, ma le ofoofogia.
Aua ne’i tau na ona outou talitonu i la matou upu. O le tausaga ua mavae i se nuu laitiiti i Iuta, sa asiasi ai alii talavou o le korama a le au aoao i le uepisaite o gaoioiga a le autalavou (lds.org/youth/activities) e sue ai ni manatu mo se gaoioiga. E tasi se gaioioga faapitoa na latou tosina atu i ai: “Auaunaga mo Aso e Fitu.”
Sa tonu i nei alii talavou e fai se mea e sili atu ona tele: o le a latou tuuina atu ni auaunaga i aso taitasi mo se vaiaso atoa i soo se tasi o le uarota e talosagaina [le auaunaga]. Ina ua saini ni aiga e 19 e manaomia la latou auaunaga, sa faateia ma lofituina teisi alii talavou. O le a faapefea ona latou faia nei auaunaga e tele i se taimi puupuu? Peitai, na latou faia se tautinoga, o lea na tonu ai o le a latou auauna atu i ia aiga uma.
Sa na o le tasi le vaiaso, ae na latou tuuina atu ai le silia ma le 250 itula o auaunaga tuufaatasi, i le faia o galuega faatino e pei o le la’ueseina o se faaputuga maa telē, eliina o se pa oneone, faamamaina o talivai, ma le faaputuina o fafie. Ma na suia ai foi ma alii talavou.
Sa latou maofa i le malosi sa latou lagonaina ma faamanuiaga na latou mauaina. Na latou faamatalaina le lagonaina o le lotogatasi i le avea ai o se korama ma le mauaina o le fesoasoani faalelagi e fai ai a latou meaaoga ma isi tiutetauave. O le taimi nei, a manaomia e le latou uarota ni galuega e fia faataunuu, sa tali atu ma le naunautai le korama a le au aoao. Sa le na’o se vaiaso na latou auauna atu ai—sa latou taumafai e auauna atu i aso uma.
O le auauna atu ma le fausia o le malo o le Atua e moni lava o se galuega ofoofogia. Na aumaia ai le olioli i nei alii talavou, ma o le a aumaia ai foi le olioli ia te oe a o e siitiaina isi ma vaaia le suiga o o latou olaga e ala i taumafaiga mamā ma le faamaoni. E pei ona ta’ua e le au peresitene aoao o Tamaitai Talavou i le itulau e 48, o se faamanuiaga le auauna atu i le Atua.
Alu atu nei i lau auaunaga i le Atua “ma lou loto atoa, manatu atoa, mafaufau atoa ma le malosi atoa” (MF&F 4:2). Matou te fia iloa ou aafiaga o le auauna atu! Fai ni vitio ma pue ni ata o au auaunaga, tuu i luga o saite o faasalalauga o agafesootai, faasoa atu i lou aiga ma uo, ma imeli mai i le liahona@ldschurch.org. E mafai foi ona faamatala atu i isi e uiga i ai i luga o le saite o gaoioiga a le autalavou. Faamolemole ia valaaulia isi e auai faatasi ma outou i lenei galuega ofoofogia, ma sei o tatou vaai i le tele e mafai ona tatou suia ai le lalolagi.