O A Ituaiga Faiaoga e Tatau ona Avea Ai i Tatou?
Afai tatou te mananao moni e avea e faapei o le Faaola, e tatau ona tatou iloa aoao atu i le ala na Ia aoao mai ai.
Tad R. Callister, peresitene (ogatotonu); John S. Tanner, fesoasoani muamua (agavale); ma Devin G. Durrant, fesoasoani lua (taumatau)
Na toeitiiti lava faamaeaina le misiona a le Alii toetu i le Atu Amerika. E lei leva atu, na afio ifo ai o Ia mai le lagi, ma aumai le malamalama e aveese ai le pogisa lea na ufitia ai laueleele o sa Nifae ma sa Lamana i le mavae ai o Lona maliu. Sa ia aoao atu ma molimau atu ma tatalo. Sa Ia faamanuiaina, taliina fesili, ma faatuina Lana Ekalesia. O le taimi la lenei, a o sauni o Ia e tuua Ona soo, sa Ia tuuina atu ia te i latou se tiute lea atonu na faatumulia ai i latou i le mautinoa:
“Ua outou iloa mea e tatau ona outou faia i la’u ekalesia; ona o galuega na outou vaai na ou faia, o mea ia tou te faia foi.
“… O lea, o a ituaiga o tagata e tatau ona outou i ai? E moni, ou te fai atu ia te outou, e pei lava o a’u nei” (3 Nifae 27:21, 27).
Na valaaulia i tatou e Iesu ia [tatou] faapei o Ia, ma o se tasi o Ona uiga faaalia maoae o Lona mafai lea ona aoao atu. O Ia o le Faiaoga Sili. Ina ia avea faapei o Ia, e tatau foi ona avea i tatou ma faiaoga sili atu ona alolofa ma suia ni olaga, e le gata i le lotu, ae faapea foi i o tatou aiga. Ina ia avea faapei o Ia, e tatau ona i ai so tatou manao loloto e aoao atu e pei ona Ia aoao mai.
Fesili ma Valaaulia
Sa Nifae e Toatolu, saunia e Gary L. Kapp
E masani ona aoao mai Iesu e ala i fesili ma valaaulia. Mafaufau i se faataitaiga mai le taimi na Ia faaaluina faatasi ma Ona soo i le konetineta o Amerika. I se taimi a’o latou tatalo, na faaali mai le Faaola ia i latou ma fetalai muamua atu i se fesili valaaulia: “O le a se mea ua outou mananao ou te tuu atu ia te outou?” (3 Nifae 27:2). E faapefea ona e tali atu pe afai e fesili atu le Faaola ia te oe i le fesili lenei?
Na tali atu le au soo: “Le Alii e, matou te mananao se’i e fofoga mai ia te i matou le igoa matou te faaigoa ai lenei ekalesia; ona o loo i ai ni finauga i totonu o le nuu e faatatau i lenei mataupu” (3 Nifae 27:3).
Na tali e Keriso la latou fesili i se tasi o Ana fesili: “Latou te le’i faitau ea i tusitusiga paia, ia ua fai mai e ao ina outou ave i o outou luga le suafa o Keriso, o loʼu igoa lea?” (3 Nifae 27:5). Na faamanatu atu e lenei fesili i Ana tagata aoao e tatau ona latou tuu ni taumafaiga i le taliina o a latou lava fesili, ma o tali i le tele o fesili e mafai ona maua i tusitusiga paia.
Ona Ia faaiuina lea i le faamanatu atu i le au soo le taua o Lona suafa. O Ana fetalaiga na valaaulia ai i latou ia faia ma folafola atu ia i latou se faamanuiaga: “Ma o soo se tasi na te ave i ona luga lou igoa, ma tumau seia oo i le iuga, o ia lava lea o le a faaolaina i le aso gataaga” (3 Nifae 27:6).
O se Faataitaiga o le Aoao Atu
I nai fuaiupu puupuu nei, ua tuuina mai ai e Iesu Keriso ia i tatou se faataitaiga faalelagi o le aoao atu. Sa Ia amataina i se fesili faatupu manatu na fuafuaina ia iloatino ai manaoga o Ana tagata aoao. Ona Ia faatalitali lea ma faalogo atu i a latou tali.
Ina ua uma ona tali atu ana tagata aoao, ona Ia fesoasoani lea ia i latou ia maua le mea sa latou sailia e ala i le faasino atu o i latou i tusitusiga paia.
Mulimuli ane, sa Ia tuuina atu ni valaaulia se lua ma folafola atu se faamanuiaga matagofie ia i latou o e naunau e faatino Lana valaaulia. O le metotia faafaiaoga a Keriso i le tulaga lenei e mafai ona aoteleina i mataupu faavae nei e lima:
1. Fai atu ni fesili aoga.
Sa fesili le Faaola, “O le a se mea ua outou mananao ou te tuu atu ia te outou?” O lenei fesili e valaaulia ai ni tali eseese. A o tatou fai atu ni fesili faapena, ua tatou fesoasoani i tagata aoao e faamatala mai mea o loo latou mananao e aoao, ma tatou fesoasoani ia i latou e taulai atu i na mea e sili atu ona taua; tatou te fa’a auai i latou i le aoaoina o mea aogā.
2. Faalogo i au tagata aoao.
Sa faafofoga atu Iesu Keriso a o latou fai mai, “Le Alii e, matou te mananao se’i e fofoga mai ia te i matou le igoa matou te faaigoa ai lenei ekalesia.” E ala i le faalogo ma le toto’a, tatou te saunia lelei ai e taulai atu i manaoga o o tatou tagata aoao.
3. Faaaoga tusitusiga paia.
Sa faamanatu atu e Keriso i Ona soo, “Latou te le’i faitau ea i tusitusiga paia, ia ua fai mai e ao ina outou ave i o outou luga le suafa o Keriso, o loʼu igoa lea?” E tatau i le faiaoga ma le tagata aoao ona faaalu ni taimi i tusitusiga paia e saunia ai mo lesona. O le suesue i tusitusiga paia o se vaega autu lea o sauniuniga faaleagaga mo faiaoga ma tagata aoao.
4. Valaaulia au tagata aoao e faatino loa.
Sa valaaulia e le Alii Ona soo e (1) tauave Lona suafa i o latou luga ma (2) tumau e oo i le iuga. Fai mai le Tala’i La’u Talalelei, “E seāseā lava, pe afai e i ai, ona e talanoa atu i tagata pe aoaoina i latou e aunoa ma le tuuina atu o se valaaulia ina ia faia se mea o le a faamalolosia ai lo latou faatuatua ia Keriso.”1 O se fautuaga lelei lenei, e le mo na o faifeautalai, ae mo faiaoga uma o le talalelei.
5. Faamanatu atu i tagata aoao ia faamanuiaga folafolaina o le usiusitai.
Ma le mea mulimuli, na folafola mai e Iesu Keriso i Ana tagata aoao, o i latou o e faatinoina Ana valaaulia “o le a faaolaina i le aso gataaga.” E masani ona folafola mai e Keriso Ana faamanuiaga silisili mo lo tatou usiusitai (tagai i le MF&F 14:7). E mafai foi ona tatou faia lena mea e tasi, i le avea ai ma faiaoga o Lana talalelei.
O faataitaiga o loo i luga ua faapupula atu ai ni nai metotia taua faafaiaoga na faaaoga e le Faaola. E le gata i lea, o nisi taimi sa Ia aoao mai e ala i faataoto po o tala faatusa. E i ai taimi sa Ia luiina ai ma na oo lava ina aoaiina ai le au faitio. Ae o taimi uma sa Ia aoao atu ai ma le alofa, e oo lava foi ia i latou na Ia aoaiina (tagai i le Faaaliga 3:19).
Alofa i Au Tagata Aoao
Lovest Thou Me More Than These? saunia e David Lindsley
E tatau foi ia i tatou ona aoao atu ma le alofa ma le alofa mama pe afai o le a tatou aoao atu i le ala a le Faaola. O le alofa e tau fai matala uma ai le loto o le faiaoga ma le tagata aoao, ina ia mafai ona “faagaeetiaina ma olioli faatasi i laua uma” (MF&F 50:22).
O se faataitaiga manino o le alofa o le Faaola mo Ona tagata aoao e mafai ona maua i le 3 Nifae lea sa Ia tatalo ai mo tagata, tutulu faatasi ma tagata, ma faamanuia i tagata. A o tatalo atu o Ia i Lona Tama mo i latou, na lagona e sa Nifaē Lona alofa: “E leai se tagata e mafai ona malamalama i le olioli lea na faatumuina ai o matou loto i le taimi na matou faalogo ai ia te ia o tatalo atu i le Tama mo i matou” (3 Nifae 17:17).
Sa tutulu fiafia o Ia mo i latou ma faamanuiaina i latou ona o lo latou faatuatua, sa matuai maoae Lona alofa:
“Amuia lava outou ona o lo outou faatuatua. Ma o lenei faauta, ua atoatoa lo’u olioli.
“Ma ina ua uma ona ia fetalai mai o nei upu, sa tutulu o ia” (3 Nifae 17:20–21).
“O le malosi o le alofa e mafai ai ona aoaoina mea e tele. O loo tusia i tusitusiga paia sa “fiafia atu ona fofoga ia i latou” ma “sa matalatala o latou loto ma sa malamalama i o latou loto” (3 Nifae 19:25, 33).
Ia Uunaia Au Tagata Aoao e Molimau Atu
Sa tuuina atu foi e le Faaola i Ona tagata aoao avanoa e faasoa atu ai a latou molimau. “Mo se faataitaiga, ina ua maliu atu Iesu i le laueleele o Kaisareia Filipo, ona fesili atu ai lea o ia i ona soo, ua faapea atu, Pe se a le upu a tagata ia te au le Atalii o le tagata, po o ai?
“Ona latou fai mai ai lea, o le upu a isi, o oe o Ioane le papatiso: a o isi o Elia; a o isi, o Ieremia, po o se tasi o le au perofeta.
“Ona fetalai atu lea o ia ia te i latou, A o outou, pe se a le outou upu ia te a’u, po o ai?
“Ona tali mai ai lea o Simona Peteru, ma faapea mai, O oe o le Keriso, o le Alo o le Atua soifua” (Mataio 16:13–16).
Ina ua uma ona faasoa atu e Peteru lana molimau, sa folafola atu e Keriso ni faamanuiaga ofoofogia ia te ia:
“Amuia oe Simona Paiona: aua e le se tagata na faaali atu ai ia te oe, a o lo’u Tama o i le lagi.
“Ou te fai atu nei au ia te oe, O Peteru oe, ou te ati ae foi la’u ekalesia i luga o lenei papa; e le mafai foi e faitotoa o seoli ona manumalo i ai.
“Ou te avatu foi ia te oe ki o le malo o le lagi: o se mea foi e te fusifusia i le lalolagi, e fusifusia foi lea i le lagi: o se mea foi e te tālā i le lalolagi, e tatalaina foi lea i le lagi” (Mataio 16:17–19).
I le taumafai e avea ma faiaoga sili, o i tatou foi o le a masani ona fai atu fesili e uunaia ai tagata aoao e faasoa mai a latou molimau, e ala ia latou upu ma i o latou lagona. O le a tatou valaaulia tagata aoao e saili ni aafiaga e atinae ai ni molimau patino i o latou olaga i aso taitasi. Ona sosoo ai lea, afai e lagona le Agaga i le siosiomaga i le potuaoga po o le aiga, o le a lagona e o tatou tagata aoao le to’alelei i le faasoaina atu o aafiaga faaleagaga ma molimau i le tasi ma le isi.
Ola i Mea e Te Aoao Atu
Sa aoao atu Iesu Keriso i isi ia faia mea na Ia faia (tagai i le 3 Nifae 27:21)—e mulimuli atu ai ia te Ia (tagai i le Mataio 4:19). Sa soifua o Ia i mea na Ia aoao mai, ma faapea ai ona Ia aoao mai e ala i faataitaiga.
Sa ia aoao mai e uiga i le auaunaga e ala i le auauna atu. Se lesona ina a mataina mo Ona soo ina ua Ia mulumuluina o latou vae! “O lenei afai o au le Alii, ma le Aoao, ua ou mulumuluina o outou vae, e tatau ona outou femulumuluai o outou vae.
“Aua ua ou avatu le faaaoao ia te outou, e pei ona ou faia ia te outou, ia faapea lava e outou ona fai” (Ioane 13:14–15).
Sa ia aoao atu e uiga i le alofa e ala i le alofa. “O le poloaiga fou ou te tuu atu ai ia te outou, ia outou fealofani; faapei ona ou alofa atu ia te outou, ia fealofani foi outou”.
Sa ia aoao atu e uiga i le tatalo e ala i le tatalo. Ina ua uma ona faia ni tatalo na o’oo’o le patino ma matuai musuia, ia na le mafai ona tusia, na Ia fetalai mai, “Ma e pei ona sa ou tatalo faatasi ma outou ia faapea lava ona outou tatalo i la’u ekalesia. … Faauta o a’u o le malamalama; ua ou faatuina se faataitaiga mo outou” (3 Nifae 18:16).
Ua tuuina mai e Iesu Keriso se mamanu mo faiaoga uma o le talalelei o e naunau e aoao atu i Lona ala. E ui ina tatou le atoatoa e pei ona sa i ai o Ia, ae e mafai lava ona tatou taumafai ma le maelega e ola i mea tatou te aoao atu. I upu o le pese a tamaiti, e tatau i faiaoga ona mafai ona faapea atu, “Fai e pei ona ou faia; mulimuli mai ia te au!”2
Aoao Atu i le Ala a le Faaola
Ua valaaulia faiaoga uma o le talalelei ia faaaoga mataupu faavae autu e ono nei, lea e atagia mai ai le ala na aoao mai ai le Faaola:
1. Alofa ia i latou e te aoaoina.
-
Saili atu i tagata taitoatasi.
-
Taulai atu i manaoga o ou tagata aoao.
2. Saunia oe lava ia faaleagaga.
-
Ola i mea e te aoao atu.
-
Iloa punaoa o loo maua.
3. Aoao atu e ala i le Agaga.
-
Fesoasoani i ou tagata aoao ia iloa le Agaga.
-
Avea ma se faiaoga aoaogofie.
-
Fatufatua’i se siosiomaga e aoao ai.
4. Iloaina o le talalelei faatasi.
-
Faatutu ni faamoemoega maualuluga.
-
Uunaia ou tagata aoao e molimau atu.
-
Fai atu ni fesili anoa.
-
Faalogo i ou tagata aoao.
5. Aoao atu le aoaoga faavae.
-
Faaaoga tusitusiga paia.
-
Faaaoga tala ma faataitaiga.
-
Folafola atu faamanuiaga ma molimau atu.
6. Ia valaaulia ou tagata aoao ia faatino.
-
Fesoasoani i ou tagata aoao e faataitai.
-
Tulitatao ia valaaulia.
A o tatou faaaogaina nei mataupu faavae, o le a avea i tatou o ni faiaoga sili atu ona lelei, ni tagata aoao sili atu ona lelei, ni matua sili atu ona lelei, ma ni soo sili atu ona lelei o Iesu Keriso. Aua ua Ia poloaiina i tatou e “aoao i le tasi” “ma le filiga,” i se auala “e mafai ona faagaeetia ai o tagata uma” (MF&F 88:77, 78, 122). Talosia ia iloa mai i totonu o i tatou, e i latou uma o e tatou te aoaoina se mea e uiga i le Matai o Faiaoga, ma ia le gata e o ese mai aafiaga [o le aoaoina] ma ni aoaoga, ae ia latou suia foi.