Tatalo i luga o le Pasi
E alala le tusitala i Chihuahua, Mekisiko.
Na toeitiiti lava atoa le valu tausaga o Sofia. Sa sauni o ia ina ia papatisoina. E tele ni mea taua sa ia aoaoina. O se tasi o mea sa ia aoaoina o le tatalo. Sa ia iloa e mafai ona ia tatalo atu i le Tama Faalelagi i soo se taimi. Sa ia iloa e mafai ona ia tatalo i soo se nofoaga.
I se tasi aso sa tonu ai ia Sofía ma lona tina e asiasi atu i lona tamā i le galuega. O se malaga o le a umi. Sa galue lona tamā i se isi nuu. O le a la o atu i se pasi, ona o ai lea i se loli, ona toe o ai lea i se taavale la’upasese.
I le taimi o le malaga i le pasi, sa faapea ona moe ai Sofía. Na ala o ia ina ua ia faalogoina le tagi a se pepe. Sa tulioso mai i luga o le pasi se tina ma se tamā ma se pepe. Sa ma’i le pepe ma sa tagi leotele. Sa foliga popole matua o le pepe.
Sa faanoanoa alofa Sofia mo le pepe. Sa faanoanoa alofa foi i matua. Ona oso ae lea sona manatu. Sa musumusu atu o ia i le taliga o Tina. “E mafai ona ou faia se tatalo e ole atu ai i le Tama Faalelagi e faamanuia le pepe?”
“Ae a, na fai atu ai Tina ma ataata.
Na punou Sofía ma faia se tatalo le leoa. Sa tatalo malosi o ia. Sa ia ole atu i le Tama Faalelagi e faamanuia le pepe. Sa ia talosagaina o Ia e fesoasoani ina ia toe manuia le pepe ma ia uma lona tagi.
Na iloa e Sofía e le o taimi uma tatou te maua ai mea tatou te ole atu ai. Sa ia iloa foi, e le o taimi uma e vave maua mai ai tali o a tatou tatalo. Ae i se taimi e le’i umi, ae to’a mai le pepe. Ona uma ai lea o le tagi o le pepe. Sa foliga mai na faasolo manuia o ia. Sa tau le foliga popole foi ona matua.
Sa lagona e Sofía le mafanafana ma le fiafia o lona loto. Sa fiafia o ia mo le pepe—ma mo matua o le pepe. Sa ia iloa na faafofogaina e le Tama Faalelagi lana tatalo.