Ua Na’o Tusiga Faatekinolosi: Talavou Matutua
O Le Faapefea, Aisea, o Afea, ma o Fea o le Sefeina o Tupe
O le tusiga ua saunia i se feutagaiga ma E. Jeffrey Hill, PhD, o se tagata suesue i mea tautupe faaleaiga
Pe e te tagai atu i le tupe o se mea e auina mai le lagi pe na o se mea leaga e manaomia, e mautinoa lava e manaomia. Ae i le avea ai ma talavou matutua, e masani ona tatou lagona le faapea e le taitai a lava ni a tatou tupe mo na o o tatou manaoga o aso taitasi, e oo lava i ni faalavelave faafuasei na le mailoa! O le mea lena e taua tele ai le i ai o ni teugatupe.
Ina ia fesoasoani ia te oe, o motugaafa nei e lima e amata ai le fausiaina o au teugatupe ina ia e olioli ai i faamanuiaga o le tulaga mautu o mea tautupe i se taimi mulimuli ane.
-
E Faafefea? Amata i le faia o se paketi. Ia fuafua ma le faaeteete pe fia le aofai o lau tupe maua o le a alu atu i le totogiina o le sefuluai ma mea e te manaomia (pili, meaai, aitalafu, ma isi mea faapena.) Soo se mea lava e totoe, o le a e maua ai se manatu pe fia le mea e mafai ona e sefeina i masina uma ma le tele o mea o loo totoe e faaalu i ou manaoga.
Siaki i lau faletupe e uiga i filifiliga e faafaigofie ai ia teugatupe, e pei o le tuuina o se pasene faapitoa o lau tupe maua i le teugatupe i masina taitasi. O lena auala, e le faapea o le a tatau ai lava ona e mafaufau i ai! Ma ia mautinoa e faaaoga soo se ituaiga o fuafuaga faateugatupe faalitaea e ono ofoina atu e lau pule i le falefaigaluega.
-
O a fea? I le taimi lenei! … A le o lena amata i lou totogi o loo sosoo. Atonu e te lagona e le o i ai se avanoa i lau paketi e teu ai i le taimi nei, ae o le amataina ona e sefe e tusa lava pe na o sina tupe itiiti i masina taitasi, o le a e fausiaina ai se faiga masani o le a faamanuiaina ai oe i le lumanaʻi!
-
E fia? Ia teu le aofai e te mafaia i totonu o lau paketi. Afai o loo fufusi le faasoa pe o i ai ni au aitalafu, atonu e te manao e sefe na o le 5 pasene i masina taitasi. Ae a o faateleina lou totogi, e mafai ona e faateleina le 10 po o le 15 pasene pe sili atu foi i le aluga o le taimi. O se sini lelei atonu o le le itiiti ifo lea ma le tasi le sapalai o tupe mo faalavelave faafuasei o le masina e tasi. Ona amata lea ona sefe ia lava e kava ai le 3 i le 6 masina ma ia faaauau pea le faaputuina.
-
O fea? O se manatu lelei le tuu o au tupe teu i totonu o lau oe lava tusitupe—o le a taofia ai oe mai le tofotofoina e faaalu i mea e fai i aso uma. Afai o loo e sefeina mo se mea patino, taumafai e faatulaga se tusitupe patino e mafai ona e faaigoaina (e pei o le “nofoa” po o le “komepiuta feaveai”) e faamanatu atu ai ia te oe lau sini.
Afai e i ai lava ni au fesili, ia feiloai ma se faufautua o mea tautupe. E mafai ona latou fesoasoani ia te oe e faia ni sini e tusa ai ma au tulaga tautupe.
O le mea e sili ai, ia manatua o le laasaga muamua lava i le malupuipuia o mea tautupe o le totogi muamua lea o lau sefuluai! Talitonu i le folafolaga a le Alii o le a Ia “toina pupuni o le lagi, ma sasaa atu le manuia mo outou, ina seia silisili ona tele” (Malaki 3:10; 3 Nifae 24:10). O nisi taimi tatou te faamoemoe ai o na faamanuiaga o tupe o loo toulu pei o se timu i luga o i tatou, ae ia manatua o nei faamanuiaga e mafai ona aofia ai ni mea faaleagaga (tagai ia David A. Bednar, “O Pupuni o le Lagi,” Liahona, Nov. 2013, 17–20).
Na fetalai mai le Alii “o [Lona] faamoemoe o le faia lea o mea mo [La’u] au paia” (Mataupu Faavae ma Feagaiga 104:15). O le teuina o tupe e mafai ona foliga faigata—aemaise lava i le avea ai ma se talavou matua, lea e matua tele naua vaega o lou olaga atonu e le o mautu—ae o sina mea itiiti i i ma sina mea itiiti i o, e mafai ai ona e faia. O le a fesoasoani le Tama Faalelagi ia te oe e suia ou uiga masani ma mea e faamuamua ina ia ola faalagolago ia te oe lava ma ia malupuipuia i tulaga tautupe.