Autalavou Matutua
O le Mea e Tasi e uiga i le Lumanai e Mafai ona Ou Pulea
Atatusi mai le Getty Images
O lena leo itiiti i totonu o lou ulu sa faigata ona ou le amanaiaina. O lenei ua 28 ou tausaga, o loo nofotoatasi pea ma ou te le mautinoa pe o le a se mea ou te manao e fai faapolofesa e ui lava ina sa ou maua se galuega lelei o se tausisoifua faatosaga. Sa ou lagona le pei o vaega uma o lou olaga e le o lelei. Sa ou masalosalo i filifiliga o le olaga ma sa ou le iloa po o fea le auala e ui ai. Sa na o lo’u lagonaina o le lē mautonu.
I se tasi aso a o ou lagonaina le lē fiafia, sa valaau mai se uo ou te lei toe talanoa i ai i se taimi umi lava. Ina ua ia fesili mai po o a mai au, sa ou faamatalaina atu i ai na lagona uma sa ou tauivi ai. Sa faalogologo mai ona ia fai mai lea, “Ua lelei, ae o faapefea mai oe faaleagaga?”
“Oi ioe, lelei atoatoa lava,” sa otometi lava lau tali atu. “E lei i ai se isi taimi ua ou lagonaina ai le latalata atili atu i le Atua i lou olaga.”
Sa ia tali mai, “O lona uiga la e le tatau ona e popole i se isi lava mea.”
Talitonuga i le Fuafuaga Atoatoa a le Atua
Talu mai le talanoaga, sa ou iloaina ai ni mea se lua. Muamua, na ou iloaina ou te matua faafetai i le i ai o [sau] molimau malosi i le talalelei toefuataiina, ma le mafai ona ola i poloaiga ma lagona le fesootai ma le lagi.
O le ola tutoatasi faaleagaga e taua tele ia te au, ma o loo ou aoao pea i le auala e tatala ai le lagi i lou olaga. O le tatalo ma le suesueina o tusitusiga paia i taeao uma o ni mea faigofie se lua ou te lagona ua faia ai se eseesega tele i lou gafatia e maua ai faaaliga patino. Ou te lagona foi le fesootai atili ma le lagi pe a ou faia se taumafaiga e agalelei, ia ola i se olaga maloloina ina ia mafai e le Agaga ona avea ma au soa, ia usitai i poloaiga, ma salamo ma le faamaoni.
Lona lua, sa ou iloaina o lau tali i le fesili a lau uo e lei matua sa’o lava—sa ou faapea sa ou “atoatoa” faaleagaga, ae sa ou manaomia le i ai o le faatuatua sili atu, taofi le popole tele, ma faalagolago i le Atua e faia mea e le mafai ona ou puleaina.
E tusa lava pe o nisi o vaega o lou olaga e le o lelei tele e pei ona ou manao ai, ae ou te iloa o le mea taua o le faatino lea o le faatuatua ma faaali atu i le Atua ou te faaaogaina lou faitalia e fai ai filifiliga lelei. Sa ou aoaoina afai e le sologa lelei le olaga i le ala ou te manatu i ai, o le mea lena e mafai ai ona ou aoao ma tuputupu ae i auala o le a le mafai ona ou oo i ai i se isi tulaga.
Ou te lei mafaufauina o le 29 o ou tausaga o le a ou lagonaina ai le le mautonu e uiga i lau matata ma le isi tulaga o lou olaga. Ae peitai, e ui lava i nei mea uma e le mailoa, ua ia te au le talitonuga atoa o loo i ai se fuafuaga atoatoa a le Atua mo au. Na te silafia lelei le mea o loo tupu ma mea ou te manaomia, ma o le a Ia tausia lava au i taimi uma (tagai i le Mataio 6:28–34). E pei lava ona aoao mai Elder L. Todd Budge o le Fitugafulu, “E ui ina faigata ona malamalama i ai, ae maise lava i taimi o o tatou olaga e malolosi mai ai matagi ma sousou ai le sami, e mafai ona tatou maua le toafimalie i le iloaina o loo uunaia atu pea i tatou e le Atua i Lona agalelei le iu e agai atu i le aiga” (“Faalagolago Tumau ma Malosi,” Liahona, Nov. 2019, 48).
Faateleina le Talitonu; Faaitiitia le Popole
O nisi aso e lagona ai le faigata tele o le olaga, ae pe a ou matua mafaufau lava i ai, ou te iloa e le tatau ona ou popole. Mai lea vaega i lea vaega, ua ou iloa ai e tatau ona ou faalagolago atili i le Atua ma itiiti le popole i mea e le mafai ona ou puleaina. O le mea e tasi e mafai ona ou pulea e uiga i le lumanai o le talitonu i le Atua ma galue ia latalata atili atu ia te Ia i aso uma.
Pe a ou lagona le lē mautonu, e lava lava le malamalama mo au e laa ai i le lē mailoa ma agai ai i luma. Ma afai ou te faaaogaina le faatuatua ma tausia au feagaiga, pau lava le mea ia ou manatua lou faasinomaga moni o se afafine o ni Matua Faalelagi ma taumafai pea lava pea, o le a tutupu mea i le taimi ma le tulaga e tatau ona i ai, ma na o le pau lena o le mea e taua moni lava.