O Lo’u Aiga Tuai, Fou Lava
O loo alaala nei le tusitala i Iuta, ISA.
Afai e te faatagaina, e leai se mea e le mafai ona suia e le talalelei.
Ata na tusia e Lobo
Sa sii i luga e faifeautalai se ata. “O le a le mea o e vaaia?” na la fesili mai ai.
“O se aiga fiafia,” sa ou tali atu ai.
“Pe o fiafia aiga uma?”
Na lūlū lo’u ulu e leai. “Ua lua vaai i lo’u aiga,” na ou faamalamalama atu ai.
O au o se tagata e 16 tausaga le matua i Pasila, lea sa ou nofo ai i lou olaga atoa. Sa aoaoina au e faifeautalai mo ni nai vaiaso, ae e leai se isi na fia faalogo o lou aiga. I lena taimi, sa masani ona vaai faifeautalai i lou aiga o misa ma finau. E leai se mea na tutusa ai lo’u aiga ma le aiga o loo fe’atai i le ata.
Fai mai se tasi o alii faifeautalai, “Masalo e le o faapena lou aiga o i ai nei. Ae e mafai ona e fausia lou aiga i le lumanai ia ese lava.”
Ina ua uma le matou asiasiga, sa la toe fai mai ia te au e tatalo e uiga i mea sa matou suesueina. E pei ona masani ai, ou te lei folafola sa’o atu e faia. Sa ou fiafia i ou lagona pe a asiasi mai faifeautalai, ma na foliga sa’o le talalelei ia te au. Ae sa ou fefe i le tali ou te ono mauaina. Afai e moni le talalelei, e tatau ona ou faia ni suiga se tele.
O Se Filifiliga Fou
Ina ua malaga ese atu faifeautalai, sa le mafai ona taofi lou mafaufau e uiga i aiga fiafia. Sa le latalata i ai lo matou aiga. E lei i ai lou tama i lou olaga. Sa le manaia le ma mafutaga ma lou tina. O Tinamatua le tagata lea na tausia i matou, ae e leai se tasi o i matou na amio e pei o se aiga i le auala na aoao mai e faifeautalai. E leai ma se tasi o i matou na faaalia le alofa o le tasi i le isi pe na faaaluina le tele o taimi e faatasi ai.
O lou olaga atoa na ou folafola ia te au lava o le a avea au ma se tama lelei i se aso. O le a avea au ma se matua ou te lei mauaina lava. Ae peitai ina ua aoaoina au e faifeautalai, sa amata ona ou iloaina sa ou faia mea lava ia e tasi na faia e ou matua i lou matua lea. Sa ou tafao i le tuneva o le po, faia soo se mea sa ou manao ai, ma ola ai e pei o se fouvale. E aunoa ma se manatu i ai, sa ou toe faia foi e pei o ou matua.
Ua oo i le taimi e fesili atu ai i le Atua.
Ina ua iu lava ina ou tatalo, sa ou maua le tali sa ou faamoemoeina i le taimi atoa lava. E moni le Ekalesia! Ua oo nei i le taimi e fai ai se filifiliga.
O Se A’u Fou
Sa tatau ona tuuina mai se faatagaga a lou tinamatua ae ou te lei papatiso. Sa tetee i ai o ia, ae sa ou finau pea.
“Tinamatua, o le fea le Leonardo e te manao ai?” Sa ou fesili ai. “O le tagata e tafao ma inu ma ulaula ma tuai mai i le fale? Pe e te manao i le mea ua ou i ai nei? O nei suiga ua faia ona o le talalelei.”
Sa iu ina ioe mai tinamatua, ma sa papatisoina ma faamauina au. Mai lena taimi, sa amata ona tupu se mea manaia i lou aiga—o se mea ou te lei iloaina atoa seia oo i ni nai tausaga mulimuli ane.
O Se Aiga Fou
Ae ou te lei alu i lau misiona i Pasila i saute, sa ma auai faatasi atu ma tinamatua i se konafesi faalesiteki. Ina ua maea, sa matou faia se sauniga molimau laitiiti ma aiga ma uo. Sa ou tei, na manao tinamatua e fai sana tala.
“Talu mai le taimi na auai ai Leonardo i la outou Ekalesia, sa amata ona avea lo matou aiga ma se aiga moni ,” sa ia fai mai ai. Ona ia lisiina lea o ni auala na faasolo ina vavalalata ai lo matou aiga atoa: ua matou faaaluina nei faatasi le taimi. Sa amata ona matou fai atu “Ou te alofa ia te oe” i le tasi ma le isi, ae matou te lei faia muamua lava. Na taofia le misa ma le finau. O faauoga moni na atiina ae ia i matou uma. Sa tele a matou meaai ma sa faamanuiaina i le anoanoai o isi mea.
Sa ou matauina foi nei suiga, ae ou te lei iloaina e mafai ona fesootai le taimi i tua i le taimi na ou papatiso ai.
“Atonu e le o au o se tagata o la outou Ekalesia,” sa ia fai mai ai, “ae o au o se uo a la outou Ekalesia. Ma ou te iloa ua faamanuiaina lo matou aiga ona o le filifiliga a Leonardo.”
O Se Malamalamaaga Fou
Sa faigata ona ou talitonu i ai! Ae peitai, a o talanoa tinamatua i le felata’i atili o lo matou aiga, sa faafuasei lava ona ou manatuaina le ata sa faaali mai e faifeautalai ia te au i tausaga ua mavae. I lena taimi, sa ou manatu na pau la’u auala e maua ai se aiga fiafia o lou aiga lea i le lumanai.
Ae sa ou sese. Sa fiafia lou aiga o i ai nei! Sa faateleina lo matou alofa o le tasi i le isi.
Atonu e leai se tasi o tagata o lou aiga o le a auai i le Ekalesia i lenei olaga atoa. Ae e tusa lava pe latou te le faia, ou te iloa ua uma ona faamanuiaina i matou e le Atua i le tele o auala. Ua faaali mai e le talalelei a Iesu Keriso ia i tatou le auala e faaleleia ai o tatou aiga, e tusa lava pe faape’ī foliga o le tulaga o lo tatou aiga.