Autalavou Matutua
O le Pogai na Finagalo ai le Tama Faalelagi ia Ou Maua le A’otauina
Po o a lava ou manaoga amiotonu, o le a saunia e le Tama Faalelagi se ala mo oe e te ausia ai.
Talu mai lo’u laitiiti, sa ou manao lava i taimi uma e faia ia mitamita lo’u Tama Faalelagi ma lo’u aiga o i ai nei ma le lumanai. Sa ou manao ia maua aoaoga uma ou te mafaia e faaleleia ai au lava ma lou olaga.
I lou atunuu, o Peru, o aoaoga lelei e taugata tele ma, i nisi o eria, e matua le mafaia lava. E lei maua e lo’u aiga ia punaoa uma e lagolago ai foi lau aoga. Ae na aoaoina au e ou matua, o le galue malosi, ia filiga, ma ole atu i le Tama Faalelagi mo se fesoasoani e mafai ona fesoasoani ina ia taunuu ai o tatou manaoga amiotonu. Ma sa ou fuafua e galue malosi.
I le tulagalua ma le aoga maualuga, sa ou maelega ai lava i au suesuega ina ia mafai ona ou faaleleia au lava i tausaga taitasi. Ina ua maea le aoga maualuga, sa taliaina au i le Iunivesite e sili ona maualuga o Peru ma maua ai se sikolasipi lelei. A o i ai iina, sa ou galue i le tele o faalapotopotoga, e aofia ai se galuega faataitai i se faalapotopotoga o le lalolagi, ma maua ni avanoa e taitai ai le tele o ituaiga o galuega faatino eseese.
I le taimi o lena galuega faataitai, sa ou lagona ai e pei o se avanoa sili mo au le mauaina o se aoaoga i le gagana Peretania. O lea na ou filifili ai e siitia atu i le Iunivesite o Polika Iaga–Idaho. Sa lofituina le lagona, ae sa ou iloa o le a fesoasoani mai le Tama Faalelagi ia te au e ausia lenei sini—sa na o lo’u faatuatuaina lava o Ia ma faia la’u vaega.
O Se Suiga o Fuafuaga
Sa tuu ou te alu i le IPI–Idaho, ae i le taimi o le faagasologa o le talosaga, sa ou lagonaina se uunaiga malosi e tatau ona ou auauna atu i se misiona a o lei siitia atu iina. O lea na ou mulimuli ai i le finagalo o le Tama Faalelagi ma valaauina ai au e auauna atu i Trujillo, Peru. Ina ua ou toe foi atu i le fale, sa ou fuafua ou te toe foi i le Iunivesite i Peru ona sa ou lagona le pei e vave ona ou maua se faailoga iina. Ae peitai, sa ou iloaina o au sikolasipi sa faaleaogaina ona sa ou tuua au suesuega mo le sili atu ma se tausaga e auauna atu ai i lau misiona.
Sa lofituina a’u ma lē mautonu. Sa ou le iloa po o le a le mea a fai. Ou te lei iloa pe aisea ua uunaia ai au e auauna atu i se misiona pe afai o lona uiga o le aveesea o lou avanoa e maua ai se tikeri o le kolisi.
Ae i se tasi aso, na ou manatuaina ai lou peresitene o le misiona o tau mai ia i matou e uiga i le BYU-Pathway Worldwide. Sa ia valaaulia i matou e faaleleia atili a matou Igilisi ma ia tulimatai atu i lenei avanoa pe a matou toe foi mai i le fale—ma sa ou faia!
O Lau Malaga ma le BYU-Pathway Worldwide
Sa ou iloa o le faamatala mai e lou peresitene o le misiona e uiga i le BYU-Pathway Worldwide e le o se mea na tupu fua. Ina ua ou amata i le polokalama o le Pathway, na manaomia ai lou malaga i le toeitiiti tolu itula i vaiaso taitasi ou te feiloai ai ma lau vaega. Sa ou ositaulagaina ni mea se tele, ae na ou iloaina o le mauaina o se aoaoga e taua uma ia te au ma le Alii. Ma o na taulaga na oo atu ai i le tele o faamanuiaga.
O le BYU-Pathway Worldwide sa avea ma faamalama o avanoa sa ou sailia. Na ou maua ai le avanoa i le aoga i se tau taugofie, faatagaina ai au e taofia se galuega, ma sa fesoasoani ia te au ia maua se aoaoga i le gagana Peretania. Ma e ala i na mea uma, sa ou maua ai ni uo maoae o e sa uunaia au ia ou lototele ma faaauau pea ona ou galue agai i au sini. Ua ou lagonaina le malosi sili atu faaleagaga ma ua avea ai au ma se soo e sili atu o Iesu Keriso.
Na iu ane, o au le uluai tamaitiiti faavaomalo na maua se faailoga tikeri i le BYU-Pathway Worldwide. Ua tatalaina e aoaoga ni avanoa ofoofogia mo au. Ua avea nei au ma se tagata faapitoa o le Uelefea ma le ola-tutoatasi mo le Eria i Matusisifo o le Ekalesia i Amerika i Saute, ma o au foi o se faifeautalai volenitia mo le BYU-Pathway i Peru. Ua ou vaai i le tele o le malamalama i tamaiti aoga taitoatasi, ma ou te uunaia i latou e agai i luma e pei lava ona uunaia ai au e au uo i le taimi o le aoga. O le malaga lenei, ua ou iloa ai sa faatasi le Tama Faalelagi ma au i laasaga uma o le ala.
E Finagalo le Tama Faalelagi ia Tatou Manuia
Ua faamalosia e la’u malaga la’u molimau e uiga i aoaoga. Ma o loo ou fuafua pea e faatumauina le tuputupu ae ma le aoaoina i le tele o mea ou te mafaia i aso taitasi. O loo tatou i ai i le lalolagi ina ia alualu i luma, ia tofotofoina, ia tuputupu ae, ia faamaonia lo tatou usiusitai, ma ia faalagolago i le Faaola ina ia agavaa e toe foi atu i lo tatou Tama Faalelagi. I le Atua, “o mea uma … e faaleagaga”—e aofia ai le aoaoga (tagai Mataupu Faavae ma Feagaiga 29:34). O aafiaga uma ua tatou maua ma le malamalama tatou te maua i le lalolagi o le a fesoasoani ia i tatou e avea atili ai e pei o lo tatou Faaola ma o le a saunia ai foi i tatou e faia ni faaiuga sili atu, ina ia sili atu ai le auaunaga i le lalolagi, ma ia avea ma ni meafaigaluega sili atu i Ona aao.
O le a’otauina e tuuina mai ai se ala e maua ai le malamalama ona faatino lea, e tu atu mo le upumoni ma le mea sao, ma ola ai i se olaga e finagalo ai lo tatou Tama Faalelagi mo i tatou—o se olaga e tumu i le olioli.
Ou te iloa e faamanuiaina e lo tatou Tama Faalelagi a tatou taumafaiga, aemaise lava pe a manaomia ona alualu i luma le manao o o tatou loto ma auauna atu ia te Ia ma Ana fanau. Ou te iloa a Ia tuuina atu i Lana fanau le taitaiga, “o le a saunia e ia se ala mo i latou ina ia mafai ai ona latou faataunuuina o le mea ua ia poloaiina ai i latou” (1 Nifae 3:7). E finagalo o Ia ia tatou manuia!
E tatau ia i tatou taitoatasi ona faaaoga avanoa taitasi mo a’otauina ma le tuputupu ua tuu e le Alii i lo tatou ala, pe e ala mai le BYU-Pathway po o se isi lava avanoa faaleaoaoga. E alofa o Ia ia i tatou ma o le a Ia taitaiina pea i tatou. E finagalo o Ia ia tatou aoaoina mea uma tatou te mafaia iinei i le lalolagi. Ma ou te iloa e mafai ona tatou oo i ni vavega maoae pe a tatou galulue fiafia ma filiga ma faalagolago i Lana taitaiga. Ua ou iloa o loo ia te au.
ATA PUE MAI LE GETTY IMAGES