Aafiaga i le Tosina Atu i le Itupa e Tasi—Pe o le a Toe Faafeiloai Atu Au e Tagata o le Ekalesia?
Atatusi mai le Getty Images
I le aso 27 o Iulai, 2013, ina ua mavae se taua umi ma le faamai o le Pepē o Matāuaola o le Faiai, na maliu ai lau paaga o le olaga mo le 25 tausaga. O Jay Eldredge o se fomai fatu lauiloa i le lalolagi. Sa ma auauna uma i ni misiona mo Le Ekalesia a Iesu Keriso o le Au Paia o Aso e Gata Ai a o ma laiti ae na ma taumamao mai le Ekalesia ona o le tosina atu i le itupa e tasi.
O le oti o Jay, e ui ina sa faafuasei, ae sa lofituina. Sa ou lagona le loto nutimomoia ma le tuulafoaiina ma le tuuatoatasi.
A o malaga atu i le fale ina ua maea le faiga o fuafuaga o le falelauasiga, sa ou lagonaina le faatosinaga a le Agaga sa matuai lofituina au ma sa tatau ai ona ou tu i autafa o le auala. Sa ou iloa sa fetalai mai le Atua ia te au, ma valaau mai ou te toe foi atu ia te Ia, ae sa ou tetee atu. “E te le o vaai mai a o loo ou mafatia?” Sa ou fai atu leotele ai. “E le mafai ona ou toe alu i le lotu i le taimi nei.”
Ae o le tele lava o lo’u tetee, o le tele foi lea o le Agaga na oo mai ia te au, ma valaaulia au ou te toe foi i le lotu.
Pe O Le a Taliaina Au?
Sa ou matuai popole lava e uiga i le toe foi atu i le lotu. Ou te lei toe alu i se sauniga faamanatuga i le 25 tausaga. Pe latou te talia ea au? Pe ou te taliaina i latou? O le a se tala a le epikopo e fai mai? Sa ou lagona le popole ma le le mautonu ma sa mamafatū pea lou loto i le faavauvau.
Ae o lau molimau i le talalelei e lei maluelue lava i na tausaga uma. Sa ma alolofa ma Jay i le Ekalesia ma ona mataupu faavae taiala—e pei o le, alofa mama, alofa mutimutivale, ma le faamagaloga. Sa ou iloa o Keriso o lo’u Faaola ma o Lana Ekalesia o Le Ekalesia a Iesu Keriso o le Au Paia o Aso e Gata Ai. Sa ou iloaina lava talu mai lo’u liua ma lo’u papatisoga i le 14 o ou tausaga. Ou te le fia faafitia lena mea i le taimi nei.
Mulimuli ane, ina ua uma ona aofai mai le lototele sa manaomia, sa ou telefoni loa i le uarota a Linwood i New Jersey, ISA, e sue po o le a le taimi e amata ai le sauniga faamanatuga.
A o latalata mai le Aso Sa, sa faia e le fili ni poloka se tele i lo’u ala lea semanu e faigofie ai lava ona taofia au mai le auai. Ou te matuai faafetai lava ona sa faaauau mai pea le Agaga Paia.
Sa ou lagona le popole a o ou ulu atu i totonu o le fale, ae na toe faamautinoa mai ia te au e le viiga amata o le sauniga faamanatuga ua ou toe i ai i le aiga. O le viiga “O Mai, Outou le Au Paia” (viiga, nu.17) na valaaulia malosi le Agaga lea na maligi ai o’u loimata. Sa ou iloaina i lena lava taimi, sa silafia e le Tama Faalelagi a’u ma le faanoanoa tele na ou lagonaina.
O lena viiga ua avea ma se ituaiga o vii e le aloaia mo le Ekalesia, ae ua avea foi ma lau lava vii patino.
“O Mai,” ua valaaulia ai au e le viiga. “E ui ina mata faigata, o le a manuia.”
Sa faigata la’u malaga. Ae na faatasi mai le alofa tunoa ia te au e pei ona folafola mai.
Sa agalelei ma taliaina au e Epikopo Darren Bird ma isi tagata uma o le faapotopotoga. Sa latou taliaina au o lo latou uso ia Keriso.
Faalelei ma le Atua, e ala ia Keriso
E ui i lea, o upu o le “O Mai, Outou le Au Paia” sa tele atu se uiga ia te au, a o ou lagonaina le taitaiina o au e le Tama Faalelagi i le auala e tatau ona ou faaauau ai.
E i ai se nuu ua saunia e le Atua,
Mo tatou i Sisifo,
E le i ai ni e faasaua mai;
Manuia ai tatou.
Sa ou alu i Sisifo ma faatau ai se fale i Fountain Hills, Arisona, ISA, lea na ma feiloai ai ma Epikopo Jerry Olson. Ina ua ou talosaga e feiloai ma ia ma faatalofa atu ia te ia, sa faagaeetia au e le Agaga o le a fesoasoani mai lenei tagata e toe aumai au i le toaga atoatoa i le Ekalesia.
Ina ua amata ona ou asiasi atu i le epikopo ma ulu atu i lenei faaleleiga ma le Tama Faalelagi, sa ou molimauina le tele o vavega faaleagaga. Sa ou talanoa sao atu i le epikopo, lea sa ia faafetai ai. Sa ia fai mai na fesoasoani ia te ia e malamalama lelei ai i le mea sa ou i ai ma le mea ua ou i ai i le taimi nei i le ma mafutaga ma le Atua. Sa ia tau mai foi ma le alofa ia te au o le taimi muamua lea sa ia maua ai se avanoa e auauna atu ai i se tasi na tosina atu i le itupa e tasi, ma sa ia talosaga mai mo lo’u onosai ma le faamagaloga pe afai na te tau mai pe faia se mea e faatiga ai au i le faagasologa atoa.
Sa ou faafetai ia te ia mo lona faamaoni ma fai atu, “Ia, o lo’u taimi muamua foi lea. O le a ta aoao faatasi.”
Sa faapea ona amata ai se malaga matagofie ma se faauoga!
E lei umi ae ou faia se fuafuaga faatino i le auala e toe avea ai ma se tasi o le au paia. Sa ou taliaina le fautuaga alofa ma le agaga tatalo faatasi ma se loto faafetai ma amata loa le faagasologa.
Ata na tusia e Jenna Palacios
O Le Filemu i le Malumalu
Mulimuli ane, a o ou mulimuli i lena fautuaga ma galue malosi e faalatalata atili atu ia Keriso, sa ou maua ai le toefuataiga o lou perisitua ma faamanuiaga o le malumalu ma taliaina ai se valaauga e auauna atu i le korama a toeaina. I le malumalu paia, ao ou talanoa atu i le Tama Faalelagi, sa Ia faailoa mai ia te au le tele o Lona alofa i Ana fanau uma. Sa ou lagonaina le toafilemu ma se manao loloto e faafiafia ia te Ia.
O ni masina mulimuli ane, na valaauina ai se epikopo fou, lea na ou atiina ae foi se faigauo alofa. Sa silafia e Epikopo Larry Radford lo’u tulaga ma talisapaia la’u auaunaga i le korama a toeaina, lea na ia fai mai ai, sa ou auauna atu ai ma le alofa ma le tuuto e le gata mo le korama ae faapea foi—ma le mea e sili ona taua—mo le Atua. O ana upu agalelei ma faamalosiauga na fesoasoani ou te lagona ai sa fiafia le Alii ma ou uso a Au Paia i la’u auaunaga.
O loo ou auauna atu nei ma le faamaoni o se failautusi a le uarota.
Malamalama Po O Ai Au
O le i ai o le tosina atu i le itupa e tasi ma le avea ma se tagata toaga o le Ekalesia e le faigofie i taimi uma. Ae ao ou tuuina atu lo’u faatuatua atoa ma faalagolago i le Atua, ou te lagonaina Lona faamalosia o au. O le a le masalomia lava le faapea mai o le au faitio ou te le faamaoni i le tagata ua avea ai au pe ua ou le faafiafiaina le LGBT + nuu.
Ua ou malamalama i lo latou le fiafia, ma e mautinoa lava ou te lei mauaina uma ni tali. E na o lo’u lava aafiaga e mafai ona ou tautala i ai. Ma o lena aafiaga ua aoaoina ai au: o au o le atalii o le Tama Faalelagi, o se atalii o le Atua. E na o le tasi ma e pau lena o le faalagiga e taua ia te au. O se taunuuga, ou te taumafai e aua nei faatagaina igoa a le lalolagi e faamatala ai au. Ou te fefe o lena mea o le a tuuitiitia ai lo’u gafatia ma le alualu i luma e faavavau.
E poto tele Satani. Na te iloa o le faaaogaina o igoa, e mafai ai ona ia vaevaeina i tatou o se nuu ma se lotu.
Faatasi ai ma lena vaaiga i le mafaufau, o filifiliga ou te faia e le faavae lea i luga o lo’u tosina atu i le itupa e tasi ae o le auala e avea ai ma se soo moni o Keriso e i ai le tosina atu i le itupa e tasi. E pei ona fai mai ai Nifae:
“Le Alii e, ua ou faalagolago ia te oe, ma o le a ou faalagolago pea ia te oe e faavavau. O le a ou lē tuu atu loʼu faalagolago i le lima o le tagata. …
“ … Ioe, ua ou iloa o le a foai tele mai le Atua i lē e ole atu. Ioe, e foai mai loʼu Atua ia te aʼu, pe afai e lē sese ona ou ole atu; o le mea lea o le a ou sii aʼe ai loʼu leo ia te oe; ioe, o le a ou tagi atu ia te oe, loʼu Atua e, le papa o loʼu amiotonu. Faauta, o le a alu aʼe pea i luga e faavavau loʼu leo ia te oe, loʼu papa ma loʼu Atua tumau-faavavau” (2 Nifae 4:34–35).
Alofa o O’u Uso a Au Paia
I le taimi atoa lava o lo’u toe foi mai, sa ou lagonaina le mafutaga alofa a ou taitai ma uso a Au Paia, e aofia ai tagata malolosi ma le malolosi o le LGBT+. Sa ou maua se nofoaga e mafai ona ou tupuolaola ai. Sa ou mauaina i totonu o i latou uiga auaumamā o Keriso lea sa ou fesootai i ai i taimi uma ma lo’u faatuatua: alofa mutimutivale, agaalofa, malamalama, ma le mea sili, o le alofa.
A o ou tauivi ai i le ala faatasi ma lo’u Faaola, sa ou lagonaina le mafanafana ma le filemu a o ou liliu atu ia te Ia, i le iloaina ou te lei savalia na o au lena ala. Sa i ai iina ni epikopo i ou autafa. Uso o la’u korama. Tuafafine i le uatota Sa fesili mai foi se alii talavou i le uarota ia te au pe mafai ona ou faauuina o ia o se ositaulaga. Sa matuai faagaeetia au i lana valaaulia agalelei. Sa ia vaai mai ia te au o se alii o loo umia le perisitua a le Atua, ma e mafai ona ia faaaogaina lena perisitua i auaunaga i isi.
O nei avanoa e auauna atu ai ma tapuai ma au uo a Au Paia ua siitia ai au ma—faatasi ai ma le tele o faamanuiaga na ou maua mai le Alii—na fesoasoani ou te maua ai le alofa, malamalama, ma le taliaina lea sa ou manaomia.
Na fetalai mai le Faaola, “Ou te le tuua outou o matuaoti: ou te sau ia te outou” (Ioane 14:18). E moni na upu! Sa ou manaomia le faamafanafanaga, ma sa oo mai o Ia ia te au, e sili atu nai lo mea e mafai ona ou mafaufauina.