O Auala Tatou te Faamalolosia ai o Tatou Faatuatua—Faatasi

I la tatou suesuega o le Tusi a Mamona i lenei masina, tatou te aoao ai e uiga ia Korioa, o lē sa faatalitonuina le toatele o tagata o le Ekalesia ua faaseseina i latou e perofeta ae na mulimuli ane faailoa mai o ia lava sa faaseseina e Satani ma sa ia faaseseina ai isi. Tatou te aoao e uiga i sā Soramā, o ni tagata uma o e na vavaeese i latou lava mai le Ekalesia. Ma ua tatou vaai ia Alema le Itiiti, o lē sa tau malosi faasaga i le Ekalesia, ma saili e faamalosia lana lava fanau matutua e tetee atu i filifiliga e mafai ona taitaieseina ai i latou mai le Alii ma Lana Ekalesia.

O nisi o i tatou o loo i ai ni tagata o le aiga po o ni uo ua filifili ia le toe auai i le Ekalesia toefuataiina a le Alii. E mafai ona avea lenei mea ma mea tiga mo i tatou o e manatu ua matua malosi lava lo tatou faatuatua. Tatou te fia fesoasoani, ae toatele i tatou e tuufesili pe faapefea.

E le mafai e se lomiga e tasi o le mekasini ona tuuina atu uma mafuaaga e vaivai ai le faatuatua pe faamatala tonu ai le auala e tali atu ai pe afai e tupu. E eseese uma lava malaga o le faatuatua a tagata. Ae matou te faamoemoe o le a saunia se fesoasoani e lenei tusiga, e pei:

O le aafiaga o se tasi alii na toe foi mai i le Ekalesia ma mea sa ia aoaoina mai ai (tagai i le itulau 26).
O le taua o le faafeiloaia o tagata uma (tagai i le 40).
Fautuaga mo matua i le auala e fai ai a latou fegalegaleaiga ma tamaiti matutua o e ua filifilia se ala e ese mai (tagai i le itulau e 30).
Manatu aoga i luga o le talafaasolopito o le Ekalesia ma le auala e mafai ai ona faamalosia lo tatou faatuatua (tagai i le itulau e 12).

Matou te faamoemoe o loo tuuina mai e nei tusiga se amataga mo oe e saili ai le taitaiga faalelagi mo ou tulaga faaletagata lava ia.

Ma le faamaoni lava,

Adam C. Olson

Pule Faatonu