Molimau ma le Liuaina

Saunia e Elder David A. Bednar

O Le Korama a Aposetolo e Toasefululua

Mai se lauga o le konafesi aoao o Oketopa 2012.

O se lesona taua e uiga i le sootaga i le va o le molimau ma le liuaina, ua vaaia i le galuega faafaifeautalai a atalii o Mosaea.

“E pei o le toatele o e na aumai i le malamalama o le upumoni, e ala i le talaiga a Amona ma ona uso, e tusa ma le agaga o faaaliga ma valoaga, ma le faia e le mana o le Atua o vavega e ala atu ia te i latou—ioe … e pei ona soifua le Alii, o le toatele o sa Lamana o e na talitonu i la latou talaiga, ma faaliliuina i le Alii, sa lei pauu ese lava.

“Ona sa avea i latou ma tagata amiotonu; sa latou tuu i lalo auupega o lo latou fouvale, sa latou le toe tau faasaga i le Atua.

“O lenei, o i latou nei o e na faaliliuina i le Alii” (Alema 23:6–8).

O elemene taua e lua o loo faamatalaina i nei fuaiupu: (1) o le malamalama o le upumoni, lea e mafai ona faamatalaina o se molimau, ma le (2) faaliliuina i le Alii, lea ua ou malamalama i ai o le liua lea i le Faaola ma Lana talalelei. O lea, o le tuufaatasiga mamana o le molimau ma le liuaina i le Alii e fua mai ai le tumau ma le mausali ma maua mai ai le puipuiga faaleagaga.

O le molimau o se malamalama faaleagaga o le upumoni e maua mai le mana o le Agaga Paia. O le liua faifai pea o se tuuto lea e le aunoa i le upumoni faaalia tatou te mauaina—ma se loto e naunau ma mo mafuaaga amiotonu. O le iloaina e moni le talalelei, o le fatu lea o se molimau. O le faamaoni e le aunoa i le talalelei o le fatu lea o le liuaina. E tatau ona tatou iloa e moni le talalelei ma ia faamaoni foi i le talalelei.

O le faataatia ese o “auupega o le fouvale” e pei o le manatu faapito, faamaualuga, ma le le usiusitai e tele atu mea e manaomia ai nai lo le na o le talitonu ma le iloa. O le talitonuga maumaututu, lotomaualalo, salamo, ma le usiusitai e ta’imua i le lafoaiina o a tatou auupega o le fouvale. Pe o e ma ou umiaina pea ni auupega o le fouvale lea e taofia ai i tatou mai le liua i le Alii? Afai o lea, ua tatau nei loa ona tatou salamo.

Ou te folafola atu a tatou malamalama i le upumoni, ma ua faaliliuina i le Alii, o le a mautu lo tatou tutumau ma le mausali ma o le a le pauu ese lava.