Filifilia o le Ala Sao ma le Vaapiapi Nai lo le Ala Lautele

Saunia e Elder Takashi Wada

O Le Fitugafulu

E lua auala sa i ou luma, ma na ou iloa e na o le tasi lava le auala e iloa ai po o le fea e ui ai.

Ata na tusia e Chris Ede

Sa ou ola ae i Nagano, Iapani, ma ou matua. O le talitonuga faalelotu o se vaega o mea uma sa faia e lou aiga. Sa tootuli lou tama i luma o le fatafaitaulaga o Puta i taeao ma po uma. Ou te lei manatu o le Puta o se tapuaiga—sa o se ituaiga olaga sa matou ola ai. Semanu e faigofie ia te au ona tumau i le lotu Puta mo aso uma o totoe o lou ola, ae ua faamaonia mai e le Atua ia te au i le tele o taimi o le auala faigofie pe lauiloa e le o le ala sili lea i taimi uma.

Tusi Aoga po o le Tusi Paia?

I le avea ai ma se tamaitiiti talavou, sa ou tauivi soo ma lou faasinomaga. Sa ou mafaufau pe aisea ua ou i ai i lenei lalolagi ma le tagata sa tatau ona avea ai au. Ina ua tusa ma le 13 ou tausaga, sa tuuina mai e le puleaoga o lau aoga i tamaiti aoga uma se kopi o le Feagaiga Fou e vaavaalua le Igilisi ma le faaIapani. “E le mo faamoemoega faalelotu,” o lana tala lea. “O se faaliliuga lelei tele, ia faaaoga e suesue ai le Igilisi.” Ina ua ou tatalaina, sa tuuina mai ai ni mau faasino mo taimi e te lagona ai le tuuatoatasi, manaomia tali i au fesili, po o e tauivi. E mafai ona ou fesootai i na tulaga uma!

Sa ou faitau e uiga ia Iesu Keriso. “Ia outou o mai ia te au, o outou uma o e tigaina ma mafatia i avega, o a’u foi e malolo ai outou” (Mataio 11:28). “Ave [lou] satauro, ma mulimuli mai ia te au” (Mataio 16:24). Sa musuia au e na upu e ui lava sa ou le malamalama atoatoa i ai. Sa ou mafaufau po o ai Iesu Keriso ma le uiga o le avea o ia ma se Faaola. Sa ou mafaufau pe na o au lava o lagonaina se sootaga i le mea sa tatau ona avea ma se tusi aoga.

Sola ese pe Nofo ma Faalogo?

I ni nai tausaga mulimuli ane sa ou feiloai ai i ni faifeautalai mo le taimi muamua lava. Sa lapataia au e ou matua e uiga i le au Kerisiano talavou o e sa feoai ma talai atu. A o ou savali atu i le fale, sa taofia au e se faifeautalai umī mai Amerika ma se ataata agalelei. Sa ou le iloa po o le a le mea a fai Sa ou fefe nei talanoa mai e uiga i lana lotu. Ana faapea na te faia, semanu ou te tamoe i le isi auala! Pau lava le mea na ia fesili mai ai o le auala e maua ai le falemeli. Sa ou tau atu ia te ia ona ou savali lea i le fale.

A o ou savali ese, sa ou lagonaina se mea. A ou toe vaai i faifeautalai, sa ou mafaufau ai, o le a ou talanoa atu ia i laua.

E lei leva lava, ae ou fetaui ma se isi vaega o faifeautalai. Sa ou tei i le faafofoga mai o le Atua ma tali mai i tatalo a se tamaitiiti e pei o au, seia oo ina ou faitau e uiga ia Iosefa Samita. Sa ou faitau i le Feagaiga Fou ina ia tatalo e le aunoa, ae o le faaali atu o le Atua i se tagata? Sa ou lagonaina le taua ma le sa’o. Nai lo le sola ese, sa ou faatulagaina se taimi la te aoao ai au.

Fai ni Alofaga pe Iloa le Mea Moni?

O se masina o feiloai ai ma faifeautalai, sa la valaaulia ai au ina ia papatiso. Ou te lei manao e talitualima i laua, ae sa ou musu ou te tuua le aga masani a ou matua ma tagata uma o siomia au. E lua auala na i ou luma atu, ma na ou iloa e na o le tasi lava le auala e iloa ai po o le fea e ui ai—e tatau ona ou tatalo e pei o Iosefa Samita. Sa ou ole atu i le Tama Faalelagi, i le suafa o Iesu Keriso, pe moni mea na aoao mai e faifeautalai ia te au.

O le mea lena na ou sui ai. Mai lena taimi, na ou iloaina ai mo au lava e moni le talalelei toefuataiina. E leai se tasi e mafai ona aveesea lena malamalama mai ia te au. Na ou iloa le ala e mulimuli ai, ma e leai se mea e mafai ona suia lena mea.

Sa tele ni au fesili a o ou laitiiti. Sa ou aoaoina o au o se atalii o le Atua, e alofa o Ia ia te au, o loo i ai Sana fuafuaga mo au, ma e finagalo o Ia e tali mai i au tatalo. O lenei malamalama na suia ai lau vaaiga atoa i le olaga. Sa ou aoaoina o le tagata o loo ou i ai ma le mea ou te faia e taua.

Faatutusa ma Isi po o le Tulaga Ese?

Ae ou te lei iloaina o au o se atalii o le Atua, sa ou manao e ogatasi ma tagata uma. Sa ou fefe e tulaga ese. Ae ina ua uma ona ou iloa o au o se atalii o le Atua, sa ou iloaina e mafai ona ou tulaga ese; e mafai ona ou ese mai isi.

O le tatalo ma le iloaina o au o se atalii o le Atua na tuuina mai ia te au le lototele e faamatala atu ai ou lagona i ou matua, ae la te lei malamalama lelei. Sa la manatu ua ou fouvale ma ua laitiiti tele e fai se faaiuga e papatiso. Sa la matamumuli o le a mulimuli atu lo la atalii i lenei lotu uiga ese nai lo a latou tu masani. Sa ou iloa le tagata sa ou i ai ma le mea sa ou manao i ai, ae sa ou manao foi e ava i ou matua ma faamoemoe o le a la faamamaluina lau tapuaiga.

Ava i Ou Matua po o le Lē Amanaia o o La Popolega?

Sa ou faamalamalama atu lou tulaga i faifeautalai tamaitai. Sa i ai so la manatu—e mafai ona la o mai e talanoa i ou matua ina ia lelei la laua faalogona e uiga i lenei tapuaiga. Sa ou fai i ai ou te fefe nei le fia talanoa atu ou matua ia i laua. Ona fautua mai lea o se tasi o tamaitai matou te anapopogi faatasi.

Ina ua ou le ai i le taeao, sa popole lou tina. “Aisea ua e le ‘ai ai?” na ia fesili ai. Sa ou faamatala atu sa ou anapogi, ma na atili ai ona popole o ia.

“Muamua lava ua e alu i lena lotu e leiloa e se tasi, ae o lenei ua e le ‘ai. Ua ou popole. Ua ou le fiafia! O le a ou valaau atu i na faifeautalai.”

Sa ia valaau atu i faifeautalai tamaitai, ma i se mafuaaga e le mailoa, na faapea ona valaaulia i laua i lo matou fale mo le taumafataga i le afiafi!

Sa maua e tagata uma se taimi matagofie. Sa aoao atu e faifeautalai i ou matua le viiga “O le Atua Lou Tama” (viiga, nu. 184), ma sa matou usuina faatasi. Sa matuai fiafia i ai lo’u tama. Ina ua uma le taumafataga o le afiafi ma faifeautalai, e lei toe popole ou matua ia te au i le alu i le lotu. Ma sa ou lagona na mafai ona ou ava ia i laua e ala i le ola ai i le talalelei aua na aofia moni ai mea uma sa la aoaoina mai ia te au. Sa ou mafaufau afai ou te alofa tele ia i laua ma lava le agalelei ia i laua, o le a iu lava ina la malamalama. Na alu ai le 35 tausaga talu ona ou papatiso, ae na papatiso lou tina ma na faatoa ulu i le malumalu i ni nai tausaga ua mavae!

O le iloaina o au o se atalii o le Atua ua aafia ai le tele o faaiuga o lou olaga. Ua ou iloa foi a tatou mulimuli i le Agaga ma fai le mea e poloai mai ai le Tama Faalelagi ia i tatou, e tusa lava pe foliga mai e faigata, o le a Ia faamanuiaina i tatou. O le filifiliga sili lava lena.