Lesona Faatino o le Afiafi Faaleaiga
O LE FAAAOGAINA Lelei o Lou Taimi
A e faamuamua le Alii, e i ai le avanoa mo isi mea uma.
Ata na tusia e David Habben
E fia ni gaoioiga eseese e tausiniō mo lou gauai atu i ai i aso uma? E tofu uma i tatou ma tai 24 itula e faaalu, ae o le auala tatou te filifili e faaaoga ai lena taimi e faia ai se eseesega tele!
Na aoao mai Peresitene Dallin H. Oaks, le Fesoasoani Muamua i le Au Peresitene Sili: “O le aofaiga o mea lelei e mafai ona tatou faia, e sili mamao atu i lo le taimi e maua e faataunuu ai.” O nisi mea e sili atu i le na o le lelei, ma o mea nei e tatau ona ave i ai le faamuamua i o tatou olaga. … E ao ona tatou tuuese nisi o mea lelei ina ia filifili ai isi mea e lelei atu pe silisili ona lelei.”1
I lenei gaoioiga, o le a e faaalia ai le mea e tupu pe a tatou faia le galuega a le Alii ma mea tatou te faamuamuaina.
1. Faatumuga o le Taimi
E tele gaoioiga lelei e mafai ona faaaoga ai o tatou taimi e tulitulimatagauina. Fai atu i lou aiga e faasoa mai nisi o mea latou te faaalu ai o latou taimi i aso taitasi e fai.
Faamalamalama atu e faapea, o le fagu e suitulaga i le taimi. O maa ma oneone ua faatusa i mea eseese e mafai ona tatou faia i lo tatou taimi: o maa tetelē e mo mea ua fetalai mai le Alii tatou te faamuamua, e pei o le suesueina o tusitusiga paia, auaunaga, galuega o le malumalu ma talafaasolopito o aiga, ma le auai i le lotu, ae faatusa le oneone i isi gaoioiga lelei, e pei o le faia o meaaoga ma le faaaluina o le taimi ma uo.
2. Sese Mea e Faamuamua
Sasaa uma muamua oneone i totonu o le fagu, ona faaopoopo lea o maa tetelē i luga. Pe a e tuuina muamua le oneone i totonu, e le lava se avanoa mo maa uma e tetele atu—e pei lava o le auala e faatulaga ai isi a tatou gaoioiga nai lo mea ua poloaiina i tatou e le Tama Faalelagi e fai, atonu o le a lē lava lo tatou taimi mo mea e sili ona taua.
3. Fetaui Tonu le Tulaga
Na poloai mai Iesu Keriso, “Aua le saili i mea o lenei lalolagi a ia outou muai saili e fausia le malo o le Atua, ma faatuina lana amiotonu” (Faaliliuga a Iosefa Samita, Mataio 6:38 [i le Mataio 6:33, vaefaamatalaga a]). Ia talanoaina pe mafai faapefea ona e faamuamua lou taimi e ala i le sailia muamuao le malo o le Atua.
Sasaa lau fagu ma toe amata i aitema lava ia e tasi. Atonu e mananao ni nai ou tei laiti e fesoasoani atu. Tuu atu ia i latou e tuu muamua ia maa tetelē i totonu o le fagu. A o e faaopoopoina le oneone mulimuli ane, matamata i le ala e faatumulia ai isi avanoa faataamilo i maa tetelē seia oo ina ofi uma i totonu le oneone.
Fesili i lou aiga po o le a so latou manatu i le uiga o lenei folafolaga mai ia Peresitene Russell M. Nelson: “A o e foai atu e le aunoa i le Alii se vaega limafoai o lou taimi, o le a Ia faateleina le vaega o totoe.”2
Faamuamua le Alii
A tatou saili e fai muamua, le finagalo o le Atua, e fesoasoani o Ia ina ia lava le taimi mo isi mea e manaomia ma faagaeetia. Afai la o loo e tauivi ia lava le taimi e faauma ai se meaaoga, atiina ae au taleni, po o le moe pe a e manaomia, fesili i le Alii po o le a se mea e mafai ona e faia e faamuamua ai lou taimi e tusa ai ma Lana fuafuaga. Ia faatutu faatasi sini o se aiga e tuu le galuega a le Alii—ma la outou sootaga ma Ia—e faamuamua i aso taitasi.